1 Pecai Ih teikuu ge jaaidi gade mpetkela ngau. Cide pe kii kerei nah pe peu hena bam. Pe kiidung ga hegwangpeurwa kerei bam, nah pe peureu ga Tinggwang de rangkemsia zige laciau. 2 Cu Ih teikuu kengau aide heradi kaudauna ge nzwa. Pepi hegum pi nzwa, nah pemui hingho mui nzwa. Cide de neidi ne pe kengkieng, nah pe hegwangbam, nah hegwang tei kera kengkieng kedi peu. 3 Teikuu peu ket rezam msiasüt teu kela nzwa ngau, dede pe rezam zam de yi dailu. Kideube pelane penui swagah eh teikuu cai suila. 4 Penui pelane neidide de reca, kedanemene pa pe kengkieng teikuu de peu kedine. Penui makaune de reca eh ranggai, "Cau teikuu de nzwano?" nah "Cau pecu renia lubui no?" 5 Teikuu de ngangkela samdung nah Tinggwang de rangkemsia sam ranglukebui mui ge pwapeu, nah pecu kei riakdaiekena kengkieng teulu kebui peu. 6 Cine teikuu Tinggwang de rangmsia kera, pe zi, pa kelungh ni, nah tinggim ga lungh kebamme de rangmsia kerane pemui ngnga lu. 7 Teikuu de peu kemcimedung de ngngwa hereu tei eh penuide ngamlukera peu. Delwe cide de hepui, helet, minadung nah heleuh pelane reu kengkieng pwapeu.✝ 8 Kideu ga kelungh leune cide de reca zie, kideu damkelu gade, Meurünna daptset kedibe, Kering Laisiukwak gage pezi raulu kemakme leune de. 9 Keheibe de pekwen bamcai, pecu peu kingnei lulo.

10 Tui kerame keheibe de,

tui teudi zie.

Keheibe de kingtie le mide teitset kelame de,

kingtie le pecu teitsetdi maisia.

Aide kemcimedung de lia lulo nah nlum bam lulo rang kelia da.✝

11 Pecai Ih teikuu kedage kideu gade pet kela ngau. Cide meurünna nzwa kiina bam, nah cide neidi nzwa marang. 12 Teikuu pe kenabe de teikuu keraibe dwagade pe kengkieng pelane teu delwe kideu ga lungh kebamme depeu teikuu keraibe de recadi—pe rezam zam yi kelube de. 13 Cide miswakegah bata kedidung teigai, pa minadung dwagade mi tinggim gade kideu gage cakmie kecu de teigai.✝ 14 Teikuu keraibe zi gade mimakecang tadung teilu kebui kepeu gade pa kideu ga kelunghme de cwadi. Teikuu pekenabe kideu ga kelunghme de teikuu keraibe rezam di eh yi kelube ziemne mamie tei lulo rangbeu. 15 Teikuu pekenabe de peu teikuu keraibe mie gage keringcui ngngi gai kera teibeu, iciu eh peu teikuu mie de maranglu kerane, nah teikuu mie de reca kemakme leune de teitsetdi kerane.✝ 16 Cide mina leune, keceume nah kedime, keheime nah kegahme, mibaang keteime nah kemakme de penui ba zetle mede penui sipie gage kaugiak de giaklu kera ketang. 17 Nah cine kaugiak de giaklu mecai migede malui mede mazwa gailak—cide teikuu zi, mede pezi kaupei. 18 Aide maci lulo rang kelia: Maci kebambe de peu teikuu kaupei de peilu. Kedanemene cide mina kaupei da, nah pe kaupei de au 666.