1 Aipau cai tinggimgwame hang mdai kideu kung mdai ga sap kebam Ih ngau, kideu kaigui mdaidung swapung lu eh, iciu eh kideu reu ga, mede jaaidi, mede tsingbang gede tingkai guilwa melu kerane. 2 Pecai naimiak kepetle de tinggimgwame kedage gwangkela Ih ngau, pa ringkela Tinggwang gu kaugiak pwala. Pa kideube nah jaaidi de tei keherei kera kengkieng kepeu tinggimgwame hang mdai bau dage sahbak eh, 3 ranggai, "Anui anui Tinggwang kilame de penui sipiedung gage kaugiak giaklu kemaktane kideu, mede jaaidi, mede tsingbangdung de tei ngkap diso."✝ 4 Nah Ih kaugiak giak kelume riak daikie ge bi kecu siu: Israel leuh pelane gade kaugiak giak kelume 144,000:

5 Judah leuh gade cang kereiekena de giaklu,

Reuben leuh gade cang kereiekena,

Gad leuh gade cang kereiekena,

6 Asher leuh gade cang kereiekena,

Naphtali leuh gade cang kereiekena,

Manasseh leuh gade cang kereiekena,

7 Simeon leuh gade cang kereiekena,

Levi leuh gade cang kereiekena,

Issachar leuh gade cang kereiekena,

8 Zebulun leuh gade cangkereiekena,

Joseph leuh gade cang kereiekena, nah

Benjamin leuh gade cang kereiekena de giaklu.

9 Aipau cai Ih piegai, ge ainie hemaa maadi ge migede peikap gai kelak ge bam—heleuh pelane, mina pelane, nah helet leune gade—hegwangbam dwaga nah Meurünnabe dwaga sap bam. Penui paini keha bah nah penui ba ga palm kiakdung pwala, 10 nah penui sahbak eh ranggai,

"Kelikelu hegwangbam ga kebambe anui Tinggwang, nah Meurünnabe da la!"

11 Nah tinggimgwame pelane hegwangbam, hangkiamedung nah ringkela kaunedung mdai de sap twagwa bam, nah hegwangbam dwaga keumie delwe Tinggwang de reca eh, 12 ranggai,

"Amen!* ketwa nah kendu nah maci nah hetwakepeu nah kerüt nah kengkieng nah kengking de anui Tinggwang da lamui kelube teilo! Amen!"

13 Pecai hangkiame ge acu keteu eh ranggai, "Paini keha bah kebam aidungde caudung no, nah penui dai gade gwang no?" 14 Cine Ih pe dage ranggai, "A mpaubo, nang ne ci lie." Pecai pa a dage ranggai, "Aidungde au kehereisüt kecu gade kwak gwang kelumedung lie. Penui penui painidung heta luda nah cidungde Meurünna jai gade tei ha luda.✝

15 Aide ziemne, penui Tinggwang hegwangbam dwaga bam,

nah penui pe kerecaki gade pecu tingmui tingba reca bam.

Hegwangbam ga kebambe pe paiki lim pwa penuide gum luzie.

16 Penui mzeu dai lakta, mede penui hereu dai lakta,

mede tingnaimiak ne penuide puteei lak,

mede kelum ne de puteei lak.✝

17 Kedanemene Meurünna hegwangbam sum ga kebambe ne penuide kekwabe tei dizie,

nah pa penuide kering duipwakdung gage ngngwa gaibeu zie,✝

nah Tinggwang penui miak gade miakdui leune neu gi dizie."