1 Pecai Meurünnabe kaugiak hena gade ket paube let kegai *dau Ih piegai, nah ringkela kaune mdai kakgade hangge tingceukwa kenzwa gade, "Gwanglu!" de eh kerang Ih siu. 2 Cine Ih piegai, ge ainie hekwen keha ge bam! Cipau reu ga kebambe lakpi ge pwala, nah pecu hegwang peurwa ge peu. Pa ngamlukelabe ge tei eh ngamlu zielie tet petdi.

3 Meurünnabe kaugiak pekenabe de let kegai dau, ringkela kaune pekenabe, "Gwanglu!" de eh kerang Ih siu. 4 Pecai hekwen kedage pet—gierei ge. Pereu cwa kelabe de kideu gade kezuyi keuteu di kera kengkieng pwapeu, ciciu eh minadung hangge hangge de teitsetlu kerane. Pecu kingtie kedi ge pwapeu.

5 Meurünnabe kaugiak pekecumbe de let kegai dau, ringkela kaune pekecumbe, "Gwanglu!" de eh kerang Ih siu. Ih piegai, ge ainie, hekwen ketiak ge bam! Pereu cwa kelabe pe ba ga riateukwak ge pwala. 6 Pecai ringkela kaune mdaidung kakgade makwa ge, "Wheat choenix ge* mi denarius ket,* nah barley choenice kecum mi de denarius ket. Dede macaa nah zau de au ngkap diso," de eh kerang Ih siu.

7 Pecai meurünnabe kaugiak pemdaibe de let kegai dau, ringkela kaune pe mdaibe, "Gwanglu!" de eh kerang Ih siu. 8 Pecai Ih piegai, ge ainie hekwen hamda ge bam! Pereu cwa kelabe zi au Ketsai, nah Hades * pecai sui la. Penai de kideu zi mdai zi ge reu kengkieng peu, kingtie, nah herakum, nah mateei, nah kideu ga renaamkaune de teu eh teitset kera.✝

9 Pecai meurünnabe kaugiak pemengeibe de let kegai dau, Tinggwang sam ziemne nah penui zierang de ga masang kebam ziemne teitset kedime rabedung recabam kangga kebam Ih ngau. 10 Penui sahbak eh ranggai, "Ma pelane reu kedibo, mci nah kesangbo, nang kideu ga kelunghme tutiak kera nah nang anuide teitset kedime kum pei kera peting daitie ge zie reuno?"✝ 11 Pecai penui hangge ge de paiha pwa peu, nah penuide peting kieekemak ge kwagai rielo rangbeu, penuide ngngwa hebaang keteimedung nah penui sinamedungde de penuide teitset kedi nzwa, teitset canglu kemaktane.

12 Pecai meurünnabe kaugiak peherokbe de let kegai dau, Ih piegai ge nnuih teu sütdi. Tingnaimiak rosopai mamai le tei kelu nzwa tiakti, nah hekei bungri de hejai nzwadi.✝ 13 Tinggim gade hegidung kideu ga cakmiedi, tangzüttsi meu kemakbe rahang tingkai gui kelai kegai dau tangzüttsibang gade cakmie di kela nzwa.✝ 14 Laisiudum kezuidi kela nzwa tingkam gahdi. Lamlwa nah duigwadeu leune pebam gade mlai tetdi. 15 Pecai kideu ga hegwangmedung, nah mina kenlangme, nah reugwa kedime, nah makeheime, nah kengkiengme, nah keheibe de, hebaangme nah kemakme tsupopdung nah lamlwa ga tsuradung kakga gwang mbaidi. 16 Penui lamlwadung nah tsuradung dage rangdi, "Anui reu ga cakmie lo! Anuide Hegwangbam ga kebambe dwagade nah Meurünnabe lunghop gade kebai beulo.✝ 17 Kedanemene penai lunghop tingba kedi de gwang bamdi delu, nah caune cide lialu laino?"✝