1 Pecai tinggimgwabe pemengeibe pe telui kwagai, ge tinggim gade hegi ge kideu ga cak kemie Ih ngau. Hegi de de penli kegah hekwa kecok* cabi de peudi. 2 Pa penli kegah hekwa kecok de ngkeigai, ge cikade mika mimang kedi ge mika nzwa kapet. Hekwa gade kepet mikade ne tingnaimiak nah tingkai de tei muidi. 3 Pecai mika gade tangrimdung kideube reu ga gwang, nah penuide kideube ga heruingapuidung kengkieng nzwa kengkieng pwapeu.✝ 4 Penuide kideu reu tsehei kemdiak, mabang kemdiak mede tsingbang gede tei msiadi helo, dede Tinggwang kaugiak penui sipie gage giak kemakme de rünne ngkapdi lulo rangbeu.✝ 5 Tangriemdung de penuide teitset kera peu ma, dede penuide kei mengei ge teikeherei kera rünne pwapeu. Penui rei au heruingapui ge ne mide ngki dige teei kela nzwa zie. 6 Cipau kei mengei tingdau minadung ketsai peei zie, dede cide ngaugai lak. Penui tsai neusüt dizie, dede ketsai penui dade pak dizie. 7 Tangrimdung rehi au hekwendung hereu tei kerane mtei pwakebam nzwada. Penui peu ga kecak hegwang peurwa kenzwadung ge pungla, nah penui zu au mina zu nzwa.✝ 8 Penui peutam mipuime peutam nzwa, nah penui gei hingho gei nzwa. 9 Penui hekarakcumdung hegeu hekarakcumdung nzwa, nah penui hesiu kwa au hekwen kekiee ge bagi teulwe hereu ga pak kelwet kwa nzwa.✝ 10 Penui heruingapuidung nzwa penui mi ga penui keu bam, nah kei mengei ge minadung de tei rezam kera penui mi ga kengkieng bam. 11 Penli kegah hekwa kecok samgwabe penui reu hegwang teibam. Pe zi Hebrew let gade Abaddon,* nah Greek let gade pezi Apollyon lie qula.

12 Nreikeiketei keraibe au cang dida. Ainie! Aipau cai de nreikeiketei kena gwang si zie reu.

13 Pecai tinggimgwabe peherokbe pe telui kwagai, ge Tinggwang dwaga kebam kecak recabam kii mdai gade makwa ge Ih siu. 14 Makwa de telui pwa kebam tinggimgwabe peherokbe dage ranggai, "Euphrates Reuki kedi gage baang pwa kebam tinggimgwame hang mdai de lungmpet dilu." 15 Cine tinggimgwame hangmdai cipau bamdakkak, cipau tingba, cipau kei, nah cipau mmi de ziemne mteilwe kebamme de lungmpetdi, iciu eh penui mina zicum zi ge de teitsetlu kerane. 16 Hekwen cwa kela reugwame riak cai 200,000,000. Ih penui riak aide siu. 17 Ih marengei gade hekwendung nah pereu cwa kelame de ainzwa ngau: penui hekarakcum gierei, mzai, nah sulfur nzwa nzien. Hekwendung peu hinghodung peu nzwa, nah penui muidung gade mi, mika, nah sulfur pet. 18 Tei keherei kecu kecum penui mui gade kepet mi, mika, nah sulfur aidungde ne mina zicum zi ge de teitsetdi. 19 Kedanemene hekwendung kengkieng au penui muidung* nah penui midung ga kebamne—penui midung heneidung nzwa penui peu bam, nah cidungde le penui minadung de tei rezam la. 20 Mina kedamedung, keherei aidungde ne teitset kemakmedung, penui batadung gade helungnreulu ma, mede herakesiadung nah kecak, rangkanggeu, hetageu, tangtsu, nah tsing le teikelu mamiedung—ma ngau kemak, mede siu kemak, mede tetgai kelak miedungde kereca mtak ma. 21 Mede penui mide dapketset, mede penui rekata, mede penui kemmha ta, mede penui kerega batadung gade helungnreu luma.