1 Pecai Ih tinggim keheci ge nah kideu keheci ge ngau. Tinggim keraide nah kideu keraide gahdi, nah jaaidi bam si tadi.✝ 2 Nah Ih namdi kemci, Jerusalem keheci de, tinggim ga Tinggwang dade lakciube pui pe nahpei ziemne mtei teu eh kela nzwa hungla eh ngau. 3 Cidau Ih hegwangbam gade makwa ge sahbak eh rang kecu siu, "Ainie! Tinggwang paiki mina de ngngwa lungh dida, nah pa penuide ngngwa lungh zie. Penui pe minadung tei dizie, nah Tinggwang penuide ngngwa bamzie.* 4 Pa ne penui miak gade penui miakdui leune neu gi dizie nah cika ketsai, lungrei mede kehap mede keteei bam si lak. Cidungde bam si lakta kedanemene ma keraibedung gah dida.✝ 5 Pecai hegwangbam ga kebambe rangdi, "Ainie! Ih ma pelane tei heci dida." Nah pa a da rangdi, "Aide de raulu, kedanemene aipau samdung de au nlumlukebuibe nah kesang lu."✝ 6 Pa a dage ranggai, "Ma aidungde tei luda! Ih au Alpha nah Omega, pebangdwabe nah penlibe. Ih hereu kelame de peu pemi tei mene keringdui rwak gade mta sak zie. 7 Ngkieng kelube de aidungde gum luzie, nah Ih pe Tinggwang zie, nah pa a na tei dizie. 8 Dede kengngime, nlum kemakme, kemneuta keteime, mide dapketsetme, kemmhame, rekame, mamie kerecame, kenretme pelane, penui ziemne henibe au mi nah sulfur heukebam jaai de zie. Cide ketsai pekenabe da."

9 Pecai tinggimgwame hang hena gade hangge, hekwak hena ga keherei hena kamtube le kepui tei eh pwa kebambe de ada gwang, nah pa acu mpau eh ranggai, "Aika gwang lu, Ih ncu Meurünna nau lakciupui de lia zie." 10 Pecai pa acu Rabe gade ngngwa tet eh lamlwatu kedi husüt kecu ge reu ga ngngwa gwang delwe kemci namdi Jerusalem de tinggim ga Tinggwang dade hung kela liagai. 11 Cide Tinggwang kendu ne baa bam, nah pe kebaa au tangtsu pemi kehungbe nzwa, jasper tsu nzwa mcigi di. 12 Namdi ga kirie di, nah husüt kecu ge, herieki kereiekena* nah heriekidung ga tinggimgwame kereiekena bam. Heriekidung gage Israel leuhme kereiekena zidung raupwa bam. 13 Naimiak kepetle kirieki kecum, tingpeule kirieki kecum, tingpile kirieki kecum, nah naimiak kenlütle kirieki kecum bam. 14 Namdibe kirie de tsubam kereiekena bam, nah cidungde reu gage Meurünna gu langkegaime kereiekena zidung raupwa bam. 15 A dage marang kebambe da kecak le teikelu kemdet geutie ge bam, namdi de nah pe riekidung, nah pe kiriedung mdet kerane.✝ 16 Namdibe petie pedi nsamram; cide petie pedi nzwakap. Pa kemdet geutie dele namdibe mdetlu. Cide petie stadia cang kereiekena* (cide petie, pedi, nah pehu au nsam kap). 17 Pa kirie de mdet gai, mina kemdet rehi gade cubit 144* siu ge, tinggimgwame cide teu mdetgai. 18 Kirieki de Jasper le tei nah namdi de zudageu nzwa mcigi kecu kecak le tei. 19 Namdibe kirie tsubamkangdung au tangtsu pemi kehung ketsamtsam le tei hezuyi. Tsubamkang raitube au jasper, pe kenabe sapphire, pe kecumbe agate, pe mdaibe emerald,✝ 20 pe mengeibe onyx, pe herokbe carnelian, pe henabe chrysolite, pe hesetbe beryl, pe hekuibe topaz, kereibe chrysoprase, kereieketbe jacinth, kereiekenabe amethyst. 21 Herieki kereiekena de au tsugadung kereiekena; herieki ge tsuga kangge le tei. Namdi puidiki au kecak mcitube, zudageu nzwa ngau rela. 22 Cu Ih namdibe ga kerecaki gede ngau ma, kedanemene Ngkiengtube Rampaube Tinggwang nah Meurünna de pe kerecaki de kecune. 23 Namdibe de taumbaa kera tingnaimiak mede hekei teu maisia ma, kedanemene Tinggwang kendu dene cide gi mbaa bam nah pe mitaubung au Meurünna delu.✝ 24 Heleuhdung cipau namdi kebaa gade tetzie, nah kideu ga hegwangme penui kendu cika teugwang zie.* 25 Pe heriekidung tingna madaude ngkui dilak, nah cika tingmui ge de bamlak. 26 Penui cika ge penui leuhme kendu nah hetwa ngau keludung teu gwang zie, 27 dede mcikemakpe keheibe de mede keheibe de hengam ta tei kelame, mede mide cwa kelame cika madaude nlüt gailak, dede Meurünna kering laisiukwak gage hezi rauteu kelamedung rünne zie.✝