1 "Sardis namdi ga kebam ngqwa samgwabe dage rau gailu:

‘Tinggwang Rabe hena nah hegi henadung pwa kebambe aide rangzeu: "Ih n tadung cibam. Nang au ring bam lie kecu hezibe mzi pung bam, dede nang au tsai dida. 2 Mraklu delwe tsaidi lai eh kebam na de tei ngkieng lulo, kedanemene Ih n batadung a Tinggwang miakngau gade yicang kebam ngaulu melu. 3 Cine nang ngau nah siu kelude nsung lulo. Cide mzailu, delwe helungnreu lulo. Dede nang mraklu mecai, Ih keregame ge nzwa gwang zie, nah Ih nda daipau bamdakkak ga gwang ziebi kecu nang au cilak. 4 Dede Sardis namdi ga mina kiee kemaknage penui paini teihera kemakme bam, nah penui keha teulwe acu ngngwa tetzie, kedanemene penui au ciciulu kebuime lu. 5 Penui nzwa ngkieng kelube penui paini keha bah zie, nah Ih madaude Kering Laisiukwak gade pe zi mai ngga dilak, nah Ih pe zi Apei dwa gade, nah pe tinggimgwame dwa gade ndu gaizie.✝ 6 Pekwen kebambe de peu Tinggwang rabe ngqwamedung dage kerang de kingnei lulo."’"

7 "Philadelphia namdi ga kebam ngqwa samgwabe dage rau gailu:

‘Kemcibe, kesangbe,

David gu cabi kebambe,

pa ngkei kegaibe migede ngkui gai kelakbe,

nah pa ngkui kedibe migede ngkei gai kelakbe, pa aide rangzeu:

8 "Ih n batadung ci. Ainie, Ih n dwa gage kikam ge ngkei nzeu, cide migede ngkui gailak. Kedanemene nang n kengkieng kecam nage bam, ciciu de nang a sam mzai nah a zi de mlai dima. 9 Ainie! Satan ngqwamedung penui au Jewme lie rangla, dede penui au ma, meliene penui au kenretme, Pielo, Ih penuide peu gwang eh n pi dwaga keumie zie, ciciu eh Ih ncu hungla lie kecu penui cilu zie. 10 Nang lia sünne eh bamlu kera a sam kaizeu kelune, kideu ga lungh kebamme de kedei kera, kehedei kideu pelane ga kegwang tingdau, Ih de ncu gum luzie. 11 Ih kelwa gwang zeu. N da kebam de herak ntiplu, iciu eh migede n hegwang peurwa süt teudi melu kerane. 12 Ngkieng kelube de, Ih a Tinggwang kerecaki ga pecu hetsia ge tei beuzie. Pa cikade madau gede tet mpetdi lak, nah Ih pereu gage a Tinggwang zi rau gaizie, a Tinggwang namdi zi (Jerusalem keheci, a Tinggwang dade tinggim gade kehung de), nah a zi keheci de. 13 Pekwen kebambe de peu Tinggwang Rabe ngqwamedung dage kerang de kingnei lulo."’"

14 "Laodicea namdi ga ngqwabe samgwabe dage rau gailu: ‘Aide Amen,* nlumlu kebuibe nah zierang kesangbe, Tinggwang damkegai bangdwabe rangzeu: 15 "Ih n batadung ci, nang au ngkung mede lum de ma. Ih ncu peu ngkung mede lum neu! 16 Dede, nang au lumlwak kebamne—lum de ma mede ngkung de kemakne—Ih ncu a mui gade nlwak mpetdi lai zeu da. 17 Kedanemene nang rang, ‘Ih au mahei bam, Ih au mabam kekiee ge bam, nah Ih magede teu si maisia meda.’ Dede nang au reisüt, mi nggia teilung lungh, magah, miakcit nah paaula kebam nang ci ma.✝ 18 Cine nang a dade kecak mi gade teimci kelude luilu, ciciude nang mahei luzie, nah paiheni keha luilu, ciciude nang paini teulu eh nang paaula kebam ne hengngam ngau melu kerane, nah maca n miak püt kerane luilu, ciciude nang mangau luzie. 19 Ih hung kelame leune de Ih kesiu nah ledeula. Cine, laikai teilu nah helungnreu lulo.✝ 20 Ainie, Ih kikam ga sap eh ketung bam lie. Mina keheibe de a kwa siulu eh kikam ngkei beucai, Ih peda lüt eh pecu ngngwa matyei zie, nah pa acu ngngwa matyei zie. 21 Ngkieng kelube de, Ih a hegwangbam ga peu pecu acu ngngwa bam zie, Ih de ngkieng lu eh a Pei de ngngwa pe hegwangbam ga bam kelu nzwa. 22 Pekwen kebambe de peu Tinggwang Rabe ngqwamedung dage kerang de kingnei lulo."’"