1 पास दिहोअ फासाड़ी डायु पुंजारु हनन्या थोड़ाक डायहां आन तिरतुल्लुस नावोअ एका वकीलोहो आरी लेत कोइत आयू. तियां फेलिक्सोअ सामने पौलुसोअ विरुद्दाम आरोप लागाड़्यु.

2 जाहां पौलुसोहो हाद्यु ताहां तिरतुल्लुस तियापोअ आरोप लागाड़ीत कोनु वोल्यू: "माननीय फेलिक्स, तावाअहीं आमुहूं खुब होक जोड़्युहू; आन ताआ पुढारपणो वाअहीं या देशोम वारुज हाजी गोठी हुदरीइतीही. 3 आमू यी गोठीइ बादी जागे आन आखु वारी स्वागत कोअताहा. आन आमू खुल्ला मोनोवाअहीं आभार मानताहा. 4 ताआ वादार वेल माहूं नाहां लेंव लागतो, पोन आंय ताहूं रावणी कोअहो के मेरवानी कोइत आमाआं बेनेक गोठी उनाइत ले. 5 काहाके आमुहूं ओ माटी अड़सन टाकत्लू आन दुन्याआं आखा यहुदीमेहें दोंगू माताड़नारु देखाअत्लू, आन ओ नासरीइ पन्थाआ पुडारी होय. 6 ये मंदिरोहो एठो कोइलोअ कोशित कोअयी, पोन ताअहूं आमू याहा तोइत लेदू.*24:6 थोड़हा लेख्यामेहें जोड़ेहे के, "आमू याहा आमाआं कायदाआ पुरमाणे डोंड आपनारा ओता." 7 पोन रोमी सेयनिकोअ मुख्यू लुसियासे याहा उदाबादीज आमाआं आथोम रोत बुउसीत लेदू,*24:7 थोड़हा लेख्यामेहें ओं वसन नाहां मिलतो. 8 आन आरोप लागाड़नाराहां ताआ सामने आविइलोअ आदेश आप्यू.*24:8 थोड़हा लेख्यामेहें ओं वसन नाहां मिलतो. यीं आखी गोठीही जियींइ बाप्तिम आमू यापोअ आरोप लागाड़ताहा, तू सोताहाज याहा फारकीत कोइत जाइंत लेही." 9 यहुदी बी तियाआ साथ देत कोइत कोयो, ए गोठी बोराबर होये.

10 जाहां राज्यपाले पौलुसोहो गोगीइलाआ इशारु कोअयू, ताहां तिये उत्तर आप्यो, "माहूं मुंदू होय के तू खुब वोर्‍ह्योंअ रोत या देशोअ न्याय कोअहे, तियाहा काजे आंय सोताहा ताआ सामने उत्तर आपीइलोअ काजे खुस होय. 11 तू सोताहा जाइंत सेकेहे के माहूं येरुसालेमोमेहें आराधना कोइलोअ काजे गोल्याहा बारा दिहो रोत उसे नाहां ओवा. 12 यां यहुदी माट्यों माहूं नाहां मंदिरोमेहें के नाहां आराधनालयोमेहें, आन नाहां गावोंमेहें कोडाअरी सोबी लागत्लाहा नेत पोड़कावत्लाहा देख्यू; 13 आन नाहां ते यीं गोठीइ खोरु पुरावू आपीत सेकता, जियींइं ते ओमे मापोअ आरोप लागाड़ताहा. 14 पोन आंय ताआ सामने ओं मानित लेहो के जिया पंथाहा ते खाराब पन्थ कोताहा, तियाआज रितीपोअ आंय आमाआं वेगाआ डायहांआं देवोअ सेवा कोअहो; आन जे गोठी कायदाआ आन भविश्यवक्ताआ पुस्तकोमेहें लेखल्यी होय, तियीं आखी पोअ विश्वास कोअहो. 15 आन जे आशा ते सोताहा मिकताहा तेहलीही आशा आंय बी देवोपोअ मिकोहो, के जिहींम धर्मी आन पापी बेनुउं जिवीत उठीइलोअ रोय. 16 तिहीं वाअहीं आंय सोताहा बी देवोअ आन माअहोंअ सामने माआं विसार सादाज निर्दुस मिकीइलाआ कोशित कोअहो.

17 "वारुज वोर्‍ह्योंअ आगोदर आंय आमाआं माअहोंअ काजे थोड़ाक पोशा आन मंदिरोम गाराहा आपू येरुसालेम आयुतो.✝24:17 प्रेशित 21:17-28 18 माहूं तियां सोकायीइ तिवार ओवू तिहीं रोत मंदिरोमेहें होदीत काड्यू, तेहें कोअताम माअरी गर्दीहाआं ने ओती आन माआं आथे कीज सुक बी ने पोड़्यी. 19 पोन, आसियाआ थोड़ाक यहुदी तिहीं ओता, जर माआं विरुद्दाम तियां पोअ काविहीं गोठ ओय ताहां ते सोताहा इंहीं ताआ सामने आवित कोइत मापोअ दोश लागाड़ुहूं जोवे. 20 नेत आंय महासभाआ सामने उबू ओतू, तेहेलाम तियां मामेहें कोड्लू गुनू देख्यू तो तेंव इंहींवालाहां कोत देखाड़ुहूं जोवे? 21 जे गोठ आंय तियांआं विसमेहें उबू रोत कोइत कोयीते तियी एकी गोठीही सोड़ीत: ‘मोल्याम रोत जिवीत उठीइलाआ गोठीपोअ विश्वास कोइलोअ बाप्तिमेहें आज तुमाआं सामने माआं सौकीशी ओवेहे.’"✝24:21 प्रेशित 23:6

22 फेलिक्से, जियाहा या पंथाआ बोराबर मुंदू ओतू, तिये ते केस आगाड़ी ठेपलीत कोइत कोयो, "जाहां रोमी सेयनिकोअ मुख्य लूसियास आवे, ताहां तुमाआं गोठीइ निकाल लागाड़े." 23 आन तिये पौलुसोअ राखवाली आधिकाऱ्योहो आदेश आप्यू के पौलुसोहो थोड़ुक मोकलू मिकीत कोइत राखवाली कोअजा, आन तियाआ दोस्त्योंमेर्‍याआ कोडाहा बी तियाआ सेवा कोइलाआ काजे मा रुकहा.

24 थोड़ाक दिहोअ फासाड़ी फेलिक्स तियाआ लाडी द्रुसिल्लाहा, जे यहुदी ओती, तियीही आरी लेत कोइत आयू आन पौलुसोहो हादाड़ीत कोइत ख्रिस्त ईसु पोर्‍याआ तियाआ विश्वासोअ बाप्तिमेहें तियाप रोत उनाअयू. 25 जाहां तो सतीपण, संयम, आन आवनारा न्यायनिवाड़ाआ सर्सा कोअतुतो, ताहां फेलिक्से बिय बिय उत्तर आप्यो, "ओमे तू जात सेकेहे; गालो पालीत आंय ताहूं फाशुउ हादीहीं." 26 तियाहा पौलुसोपोअ रोत वाजीहीं पोशा जोड़े कोत बी आशा ओती, तियाहा काजे फाशुउ बी हादी-हादीइ तियाअरी गोठी कोअया कोअतुतो.

27 पोन जाहां बेन वोरह्ये सेकित गोये ताहां पोरकियुस फेस्तुस, फेलिक्सोअ जागापोअ आयू; आन फेलिक्स यहुद्याहां खुश कोइलाआ इश्शा वाअहीं पौलुसोहो जेलेजमेहें सोड़ीत गोयू.