1 जाहां ईसु ए आखी गोठी कोत नेवराअयू, ताहां तियाआ सेलाहां कोनु वोल्यू. 2 "तुमू जांअताहा, के बेन दिहोअ फाटी वल्हांडणोअ तिवार आवे; आन माहुंउं बेटुह्हू क्रुस खांबोपोअ सोढ़वाइलोअ काजे तोआत जाय."

3 ताहां मुख्य पुंजारा आन पुडारी नेहें कैफा नावोअ डाया पुंजाराआ राजवाड़ाम एक्ठा ओवा. 4 आन तियां तियांज विसार कोआ वोल्या के ईसुहू केहें कोइत तोइत माइत टाके. 5 पोन ते कोताते के, "वल्हांडण तिवारोअ होमसे नाहां; एहलोहो ने ओवुहूं जोवे के माअहूंमेहें दोंगा मातीज जाय."

6 जेहेलाम ईसु बेथानीम वोडा दुखोवाला शिमोनोअ कोअमेहें ओतू. 7 ताहां एक बाय संगमरमरोअ* बासनोमेहें अत्तर लेत कोइत ईसुउ जागे आयी, आन जाहां ईसु रोटू खानू बोठू, तेहेलाम तियी तियाआ मुंडोपोअ ओली देदो. 8 ओं पालीत, तियाआ सेला बावराइत कोना वोल्या, "ओं नुकसान काहा? तिंया कोयो. 9 ओं ते हाजी किमतेम वेसीत गोरब्योहों आपी देवाअतो."

10 ओं जाईंत ईसु तियांहां कोयो, "बायीही काहा तारास देताहा? यी माअरी हाजो आन बाहरी काम कोअयोहो. 11 गरीब माअहें सादा तुमाअरी रोतेहे, पोन आंय तुमाअरी सादाज नाहां रोनारु. 12 यी माआं डिलोपोअ जो अत्तर ओल्योहो, तों माहूं डाटीइलोअ तियारीइ काजे कोअयोहो. 13 आंय तुमुहूं नक्की कोहो, के आखी दुन्यामेहें जिहीं का बी ए हाजी बातमी परसार ओवे, तिहीं यीइ या कामोअ वर्णन बी तियीइ ईतेमेहें ओवे."

14 ताहां बारा सेलामेर्‍युउ एक जोऊं जियाआ नाव यहुदा इस्कार्योत, तो मुख्य पुंजाराआ जागे गोयू 15 आन तिये कोयो, "जर आंय तुमुहूं ईसुहू तोइत आपिहीं, ताहां तुमू माहूं कि आपहा?" तियां तियाहा तीस सांदीइ रुप्या गोणीत आपी देदा. 16 ताअहां रोत यहुदा ईसुहू तोइत आपिइलोअ काजे हाजो गालो पालु वोल्यू.

17 वल्हांडण तिवारोअ पेल्लेए दिहे सेला ईसुउ जागे आवित कोना वोल्या के, "ताआ काजे आमू वल्हांडण तिवारोअ रोटू खाअलोअ तियारी काअली जागे कोओ?"

18 तिये कोयो, "होयरोम अमुक माहुंउं जागे जात कोइत कोवा के, ‘गुरु कोहे, माआं वेल आहने होय, आंय माआं सेलांअरी ताआ जागे वल्हांडण तिवार कोअहीं.’"

19 ताहां सेलां ईसुउ आदेश मान्या आन वल्हांडणोअ रोटू तियार कोअयू.

20 जेहेलाम सिंजिवड़ो पोड़्यो, तेहेलाम ईसु बारा सेलांअरी रोटू खानू बोठू. 21 जेहेलाम ते खाताते तेहेलाम ईसु कोयो, "आंय तुमुहूं नक्की कोहो, के तुमामेर्‍युउ एक जोऊं माहूं तोइत आपे."

22 ताहां सेला खुब नाराज ओवा, आन हारेक जोओं तियाहा फुसा वोल्या, "गुरु, तो आंय होय के?"

23 ईसु उत्तर आप्यो, "जिये माअरी ठालीमेहें आथ टाक्युहू, तोज माहूं तोइत आपे. 24 माहुंउं बेटुह्हू ते जेहलोहो तियाआ बाप्तिमेहें लेख्योहो, तेहेंज कोइत तो जाहे खोरु; पोन तिया माहुंउं केतीही वाजे जियाअ आथोवाअहीं माहुंउं बेटुह्हू तोआये: जर तिया माहुंउं जल्मज ने ओवतो तों तियाआ काजे हाजो रोतो."

25 ताहां तियाहा तोइत आपनारु यहुदा कोयो, "गुरु, तो आंय होय के?"

ईसु तियाहा कोयो, "तुमे कोत देदो."

26 जाहां ते खाया कोअताते, ताहां ईसु रोटू लेदू, आन आशिर्वादोअ प्रार्थना कोअयी, आन रोटू मुड़्यू, आन सेलाहां आपीत कोयो, "ल्या, खावा; ओं माआं डिल होय."

27 फाशुउ तिये वाटकू लेत कोइत देवोअ धन्यवाद कोअयो, आन तियांहां आपीत कोयो, "तुमू आखा यामेहें रोत पिवा, 28 काहाके ओं माआं शप्पतोअ रक्त होये, जों जाअखीलां जोओंअ पापोअ माफीइ काजे वोहाड़्योहो. 29 आंय तुमुहूं कोहो, के दाराक्शाआ ओ रोहो तिये दिही जाआं आंय केदिहींज ने पिंव जाअहूं जाआं तुमाअरी माआं बाह्हाआ राजोमेहें नोवू दाराक्शाआ रोहो ने पिंव."

30 ताहराअ ते भजन गावीत जेयतुन डोगोपोअ गोया.

31 ताहां ईसु तियांहां कोयो, "तुमू आखा आजूज राती माहूं सोड़ीत जाता रोहा, काहाके वसन कोहे, ‘देव डोरक्याहा माईं देये; आन गोवाराआ मेडे वेरासेर ओत जाये.’ 32 पोन आंय जिवीत उठीहीं ताहां तुमारोत पेल गालीलोमेहें जाहीं."

33 यी गोठीपोअ रोत पेत्रे ईसुहू कोयो, "आखा ताहूं टाकीत जाता रोये, पोन आंय ताहूं केदिहींज टाकीत ने जांव!"

34 ईसु पेत्राहा कोयो, "आंय ताहूं नक्की कोहो, के आजूज राती कुकड़ा वांहीइलोअ पेल तू तीन वारी माहूं ने ओलखीइत्लू एहें कोही."

35 पेत्रे कोयो, "ताअरी माहूं मोअहूं पोड़े तेबी आंय एहें नेज कोंव!"

आन एहेंज कोइत आखा सेला बी कोयो.

36 ताहां ईसु तियाआ सेलांअरी गेथसेमनी नावोअ जागापोअ आयू आन तिये तियांहां कोयो, "आंय जात कोइत प्रार्थना कोअहो ताअहूं जाआं तुमू इंहींज बोहीत रोजा." 37 आन तिये पेत्राहा आन जब्दीइ बेन पोर्‍याहा आरी लेत गोयू, आन उदास आन दुखी ओनू वोल्यू. 38 ताहां तिये तियांहां कोयो, "माआं मोन खुब दुखी होये, एतोह दुखी के माईंत लेय एहेलोह लागेहे. तुमू इंहींज उबा रोवा, आन माअरी जागता रोवा."

39 फाशुउ तो थोड़ुक आगाड़ी जात कोइत उबडू पोड़ीत ए प्रार्थना कोअयी, "ए माआं आब्हा जर ओत सेके ते ओ दुखोअ वाटकू माआं जागे रोत टोलीत जाअहूं दे, तेबी माआं मोर्जी नाहां पोन ताआ मोर्जीइ परमाणे ओवुहूं दे."

40 ताहरुउ वापिस सेलाआं आहने आवित तियांहां हुवत्लाहा देख्या, आन पेत्राहा कोयो, "के तुमू तीनू माअरी एक तास जाआं जागित नाहां सेकता के? 41 जागता रोवा, आन प्रार्थना कोअता रोवा, के तुमू परिक्शाम ने पोडहा! आत्मा ते तियार होय, पोन शरीर कमजोर होय."

42 फाशुउ ईसु बिहीरी वारी जात कोइत ए प्रार्थना कोअयी, "ए माआं आब्हा, जर ओं माआं पिया वासी नाहां टोलीत सेकतो ते ताआ मोर्जी पुरी ओवे." 43 तो फाशुउ एक वारी वोलीत आयू आन सेलाहां हुवत्लाज देख्या; काहाके ते निंदवाअयाते.

44 आन फाशुउ एकवारी जाआं तियांहां टाकीत जातु रोयू, आन तेहेंज कोइत, तिसरी वारी प्रार्थना कोअयी. 45 ताहां तो सेलाआं जागे वोलीत आयू आन कोयो, "ओमे जाआं तुमू हुवयाज कोअताहा आन आराम कोअताहा के? पाला! वेल आवित लागीही, आन माहुंउं बेटुह्हू पाप्योअ आथम तोइत आपाअहे. 46 उठा, साला. पाला, माआं तोअनारु आहनेज आवित लागुहू."

47 ईसु ए गोठी कोत्लू तेहेलाजमेहें, यहुदा जो बारा सेलामेर्‍युउ एक जोऊं ओतू तो आयू, आन तियाअरी मुख्य पुंजारा आन डायहांआं वोडी गोरदी तारवाआ आन डेंगारा लेत कोइत आयी. 48 तियाहा तोइत आपनारे यहुदे माहुंहूं इशारु कोई देदू: "जियाहा आंय गुउं देही; तियाहा तोइत लेजा!"

49 आन यहुदा होल्लुज ईसुउ जागे गोयू आन कोयो, "गुरु, सलाम," आन तियाहा गुऊँ देदू.

50 ईसु तियाहा कोयो, "ए दोस्ता, जिया कामोंअ काजे तू आयुहू, तों मामार कोइत ले!" ताहां तियां माअहूं आहने आवित ईसुहू तोइत लेदू, आन बेड़ी लागाड़ी देदी. 51 ताहां ईसुउ हातीमेर्‍येए एके जोएं तारवाआ काड्यीन मुख्य पुंजाराआ पावरोअ कान साटकीत टाक्यु. 52 ताहां ईसु तियाहा कोयो, "ताआ तारवाआ मांय मिकीत ले, काहाके जें तारवाआ सालाडतेहें, तें आखे तारवाअ वाअहीं मोए. 53 केहें तू नाहां समजीइतू के, आंय माआं बाह्हाहा रावणी कोइत सेकोहो, आन तो देवदुतोंअ सेयनिकोअ बारा तुकड़ी रोत बी वादार माआं कोअते मोकलीत सेकेहे? 54 जर एहें कोअहूं ताहां, देवोअ वसन केहें कोइत पुरो ओवे, जों कोहे के एहेलोह ओवुहूंज जोवे?"

55 ताहां ईसु तियांहां कोयो, "केहें तुमू तारवाआ आन डेंगारा लेत कोइत माहूं डाखुउ होस तोआ आया? आंय दाड़ख्युउ मंदिरोमेहें बोहीत संदेश आपतुतो, तेहेलाम तुमू माहूं नाहां तोअयु. 56 पोन ओं आखो याअ काजे ओवो के भविश्यवक्ताआ वसने पुरे ओवे."

ताहां आखा सेला तियाहा टाकीत गुगदा वोल्या.

57 जिहीं कायदाआ मास्तरहों आन डायहां टोलू वोलीत रोयाते, तिहीं ईसुहू तोअनारा तियाहा कैफा नावोअ डाया पुंजाराआ जागे लेत गोया. 58 आन पेत्र सेटेज रोत फासाड़ी-फासाड़ी डाया पुंजाराआ खोलीमेहें जाआं गोयू, आन मांयते जात कोइत की ओवनारो होय तो पालिइलोअ काजे जागल्याआं जागे जात कोइत बोहीत गोयू. 59 डाया पुंजारा आन आखु पोन्सूज ईसुहू माईंत टाकीइलोअ काजे खोटू पुरावू होदताते. 60 पोन वारुज खोटू पुरावू आपनारा आया तेबी ने बोण्यी. आखरी पोअ बेन जोओं आगाड़ी आया, 61 ✝ आन कोयो, "ये कोयोहो के आंय तीन दिहोमेहें देवोअ मंदिरोहो पाड़ीत सेकोहो आन तीन दिहोमेहें बोणावीत सेकोहो."

62 ताहां डाये पुंजारे उबू रोत कोइत ईसुहू कोयो, "तू केहें नाहां उत्तर आपतू? एं माअहें ताआ विरुध्दामेहें कि पुरावू देतेहे?" 63 पोन ईसु ठावकुज रोयू. ताहां डाये पुंजारे तियाहा कोयो "आंय ताहूं जिवता देवोअ शप्पत खात कोइत कोहो, के खोरीज तू देवोअ बेटुह्हू ‘ख्रिस्त’ ओय ताहां आमुहूं वारुहूं कोत दे."

64 ईसु तियाहा कोयो, "तुमेज कोत देदो; पोन आंय तुमुहूं ओं बी कोहो, के ओमे रोत तुमू निस्तु माहुंउं बेटाह्हाहा आखा रोत वोडी ताकतवालाआ हाजाड़्यीइ वोगेहे बोठलू, आन जुगोमेर्‍याआ वाद्ला पोअ आवत्लाहा देखहा."✝

65 ताहां डाये पुंजारे सोताआ आंगड़े सिरी देत कोयो, "ये देवोअ निंदा कोअयिही! ओमे आपुहूं पुरावाआ की गरज? पाला, तुमू ओमेज ए निंदा उनाअयाहा!✝ 66 तुमू की समजीइताहा?"

तियां उत्तर आप्यो, "याहा माईं देअहूं जोवे."

67 ताहां तियां तियाआ सोबीपोअ थुप्यो आन तियाहा तुंबा वाअहीं देदू; जियां तुंबा वाअहीं देदू, 68 तियां कोयो "ए ख्रिस्ता! आमुहूं भविश्यवाणी कोइत को, के ताहूं कोडे देदू?"

69 पेत्र बाअथे खोलीमेहें बोठुतो आन एक पावरीइं तियाआ जागे आवित कोयो, "तू बी तोम गालीलवाला ईसुउरी ओतू."

70 तिये आखा सामने ओं कोत कोइत नाकार कोअयू, "तू की कोहे तोज माहूं नाहां समजाअतो." 71 जाहां तो बाअथे दरवाजामेहें जातु रोयू, ताहां बिहीरी पावरीइं जे तिहीं ओती तियी देखीत कोइत तिया माट्योहो कोयो, "ओं बी ताम नासरेथवाला ईसुउरी ओतो जी."

72 तिये फाशुउ शप्पत खात कोइत कोयो, "आंय तिया माहुंहूं नाहां ओलखीइतू."

73 थोड़ीक वेलेमेहें तिहीं उबे रोत रोयेते, तियां पेत्राहा आहने आवित कोयो, "खोरीज तु बी तियांमेर्‍युउ एक जोओं होय; काहाके ताआ बोली वाअहीं तू ओलखात जाहे!"*

74 ताहां तो शप्पत खात कोइत कोनु वोल्यू, "आंय या माहुंहूं ने ओलखीइत्लू!"

आन तेताजमेहें कुकड़े वाहीं देदो. 75 ताहां पेत्राहा ईसु कोल्यी गोठ ओर आयी, "कुकड़ू वांहीइलोअ पेल तू तीन वारी माहूं नाकारही," आन तो बाअथे गोयुन ताहरुउ फोको फोको रोड़्यु.