1 ईसु माअहोंअ गोवाराहा पालीत टुरापोअ सोड़ीत लागू, आन जेहेलाम निसे बोठू, ताहां तियाआ सेला तियाआ जागे आवया. 2 आन तो तियांहां सिकाडू वोल्यू.

3 "‘जें आत्मामेहें गरीब होय, तियांआं हाजो होय,

काहाके होरगाआ राज तियांआंज होय;

4 जें तारास कोअतेहे, तियांआं हाजो होय,

काहाके तियांहां होक जोड़े;✝

5 जें नम्र तियांआं हाजो होय,

काहाके तें धरतीइ आधिकारी बोणे;

6 जें सतीपणोअ काजे फुकल्ये आन तोरह्ये होय तियांआं हाजो होय,

काहाके देव तियांहां तारवे!✝

7 जें दयालू तियांआं हाजो होय,

काहाके तियांपोअ दया ओवे!

8 जें मोनोमेहें सोके होय, तियांआं हाजो होय,

काहाके तें देवोहो देखे;✝

9 जें होमजाड़ीलाआ काम कोअतेहे, तियांआं हाजो होय,

काहाके तियांहां देवोअ पोर्‍ये कोये.

10 सतीपणोअ काजे जियांहां तारास ओवू, तियांआं हाजो होय.

काहाके होरगाआ राज तियांआंज होय;’

11 "जाहां माआं काजे माअहें तुमाआं विरुद्धामेहें गोगे, तारास देय आन तुमाआं विरुद्धामेहें आखी जातीइ खाराब लबाड़ी कोइत गोगे, ताहां तुमाआं हाजो होय. 12 मोज्या कोआ, खुसीवाअहीं उसला, होरगामेहें तुमाआं इलाम वोडू होय; काहाके तुमा रोत पेल जे भविश्यवक्ता ओत गोया, तियांहां तियां एहेंज कोइत दुख वेठाड़्यो.✝

13 "तुमू धरतीइ खारो होय; पोन जर खाराआ खारी सव निहींत गोयी, ताहां फाशोअ तियाहा कि कोइत खारसो बोणावता आवे? ओनखे तियाआ कोड्लाज कामोम वापर ने ओवनारु, पोन तियाहा बाअथे टाकी देत आन माअहोंओं गुडाआ थुड़ी सेंदीइलाआ कामोम आवनारो.

14 "तुमू दुन्याआ उजालो होय; टुशा पोर्‍योओ होयर निकाइत नाहां सेकतो. 15 दिवू पेटाड़ीत कोइत टोपलीइ थुड़ी नाहां मिकते, पोन तियाहा बेलकाआ उसे मेकतेहे, याआ काजे के जें कोअमेहें होय तियां बादाहा तो उजालो आपित सेके; 16 तेहेंज कोइत तुमाआं उजालो माअहोंओं हुंबूर एहेलोहो पोड़ुहूं द्या के, तें तुमाआं हाजे कामे पालीत तुमाआं होरगामेर्‍याआ आब्हाआ नाव उसो कोए.

17 "एहेलोहो मा समजाहा, के आंय मोशेए कायदाआ नेताहां भविश्यवक्ताआं हिकवोण खुड़ीत टाकीइलो काजे आयुहू. आंय आरवीत टाकू नाहां, पोन पुरो कोउ आयुहू. 18 काहाके आंय तुमुहूं नक्की कोहो के, जुग आन धरती सेलाइत जाय, ताअहूं जाआं आखी गोठी पुरी ओया सिवाय कायदाआ पुस्तकोअ एक बी कानू नेत मात्रू ने टोले✝. 19 तिहीं वाअहीं जों कोडो या वाहीं एवडा आदेशोमेहें रोत एकदू काडीत टाके आन तेहेंज कोइत माअहुंहूं सिकाड़े, तों होरगाआ राजोमेहें जाअखो हानो गोणाय; पोन जों कोडो तियाहा माने आन सिकाड़े, तों होरगाआ राजोमेहें वोडो गोणाय. 20 आंय तुमुहूं कोहो, कायदाआ सिकाड़नारा मास्तर आन फरिसी यांआं सतीपणो रोत तुमाआं सतीपण वादार ओया सिवाय तुमू होरगाआ राजोमेहें ने जात सेकनारा.

21 "खुन मा कोअही; जों कोडो खुन कोए तों कोर्ठामेहें डोंडोअ दोशी ठरे, एहें कोइत वेगाआ माअहुंहूं कोयोतो, ओं तुमू उनाअयाहा.✝ 22 पोन आंय तुमुहूं कोहो के, जिया कोडाहा तियाआ पायहोपोअ उदड़ीज खोत लागतीय, तियाहा कोर्ठाम डोंड जोड़े; जों कोडो तियाआ पायहोहो ‘ए फोगा,’ एहें कोये, तों वोडा पोन्साम डोंडाअहूं जोगोहो बोणे, आन जों कोडो तियाआ पायहोहो ‘ओ विण ओकल्या!’ एहें कोये, तियाहा नरकाआ आगीम जाअहूं पोड़े. 23 तिहीं वाअहीं, जर तू ताआ गाराहा देवान्यापोअ लेत आवही, आन तिहीं ताहूं ओर आवे, के माआं मोनोमेहें माआं पायहोअ विरुद्दाम कि तेबी गोठ होय, 24 ताहां तू ताआ गाराहा तिहींज देवान्याअ सामने मिकी दे, आन जात कोइत पेल ताआ पायहोअरी होमजोण कोइत ले, आन तिहींइं फाटी आवित कोइत ताआ ते गाराहा आप.

25 "जर ताआ दुस्मोन ताआ विरुद्धामेहें आरोप लेतावे, आन ताहूं कोर्ठम लेत जाय, ताहां तापोअ वेल होय ताअहांज कोर्ठम जाअलोअ पेल तू तियाअरी होमजोण कोइत ले. नेत एकवारी तू तिहीं जाही, ताहां तो ताहूं न्यायाधिशोअ आथोम तोइत आपी देय, आन तो न्यायाधिश ताहूं पुलशोअ आथोम होपी देय, आन पुलिस ताहूं जेलेम टाकी देय. 26 आंय ताहूं नक्की कोहो, जाअहूं जाआं आनोन आनो डोंड ने पोई देही, ताअहूं जाआं तू तियामेहें रोत ने सुटही.

27 "तु सिनालो मा कोअही; एहें कोइत कोयोतो, तों तुमू उनाअयेहे.✝ 28 पोन आंय तुमुहूं कोहो के, जो कोडो एकदी बोईंइ वोग बाक्ती नजर बी टाक्यी, तेबी तो तियाआ मोनोम तियीइरी सिनालो कोइत सुकुहू. 29 जर ताआ हाजाड्यू डोऊ ताहूं पाप कोआड़तुय, ताहां तियाहा काडीत टाकी दे; काहाके ताआ पुरो डिल नरकाम जाय तिया रोत हाजो, ताआ डिलोअ एक भाग आरवात जाय तो फायदाअ होय. 30 जर ताआ हाजाड़्यू आथ ताहूं पाप कोअहूं लागाड़तुय, ताहां तु तियाहा वाडीत टाकी दे; काहाके ताआ पुरो डिल नरकाम जाय, या रोत हाजो जी तु ठुटू ओत जाही तो ताहूं पुरड़े.

31 "ओं बी कोयोतो के, ‘जों कोडो तियाआ लाडीही सोड़नारो ओय, तों तियीही सोड़सिट्टी आपुहूं जोवे.’ 32 पोन आंय तुमुहूं कोहो के, जों कोडो तियाआ लाडीही सिनालाअ वासी बिहीरा कोड्ला कारणो वाअहीं सोड़सिट्टी आपे, ताहां तों तियीही सिनालो कोआड़ेहे; आन जों कोडो तियी सोड़ल्यी बोईंइरी वेहवाल कोअहे, तों बी सिनालो कोअहे.✝

33 "ओं बी तुमू उनाअयेहे के जुना वाडोमेर्‍याआ माअहूं कोयोतो, ‘खोटी शप्पत मा खाही, पोन ताआ शप्पत प्रभुउ सामने पुरी कोअजी.’ 34 पोन आंय तुमुहूं कोहो, के शप्पत लेहाज मा; होरगाआ बी मा लेहा, काहाके तों देवोअ राजगादी होय; 35 धरतीइ बी मा लेहा, काहाके ते तियाआ गुडा मेकीइलोअ पाट्लू होय. येरुसालेमोअ बी मा, काहाके तों महान राजाआ होयर होय. 36 तू ताआ मुन्काआ बी शप्पत मा लेही, काहाके तू ताआ एक बी सिंग्यो पांडो नेताहां कालो नाहां कोइत सेकतु. 37 पोन तुमाआं गोगीइलोअ ‘होव’ ताहां होवजे आन ‘नाहां’ ताहां नाहांज जोवे. काहाके या रोत वादार जों होय, तों सैतानोप रोत होय.

38 "‘डोआअ बोदले डोऊ, आन दातोअ बोदले दात’ एहें कोयोतो, तों तुमू उनाअयेहे. 39 पोन आंय तुमुहूं कोहो, के जों कोडो तुमाआं बाक्तो कोए, तियाआ बोदलू मा लेहा; पोन जों कोडो ताआ हाजाड़्या गालोपोअ देय, ताहां बांगाड़्यू गाल बी आगोअ कोई दे. 40 आन जर कोडो ताहूं ताआ आंगड़ाआ काजे आरोप लागाड़ीत कोर्ठामेहें लेत जाअहूं होदे, ताहां तियाहा ताआ कोट बी आपी दे. 41 आन जर एकदो ताहूं उदाबादीज एक डोंग होंडाड़े, ताहां तियाअरी बेन डोंग जा. 42 जो कोडो तापोअ मागे, तियाहा आप; आन जों कोडो तापोअ उसन्यो मागे, ताहां तियाआ वोगेहे सोब मा मुउड़ीही.

43 "‘ताआ दोस्ती पोअ मेर कोअ, आन ताआ दुस्मोनोअ सीस कोअ’ एहें कोयोतो, तों तुमू उनाअयेहे. 44 पोन आंय तुमुहूं कोहो के, तुमू तुमाआं दुस्मोनोहों मेर कोआ, आन जे तुमुहूं तारास कोआड़तेहें, तियांआं काजे प्रार्थना कोआ. 45 एहें कोइत, तुमू तुमाआं होरगामेर्‍याआ आब्हाआ पोर्‍ये बोणहां; काहाके तो बाक्ता आन हाजा बेनू पोअ बी दिही उगाड़ेहे, आन धर्मी आन पापी बेनू पोअ बी वोऱ्हात पाड़ेहे. 46 काहाके जें तुमापोअ मेर कोअतेहे, तियांपोअ तुमू बी मेर कोअहा, ताहां तुमुहूं कि इलाम जोड़े? नाकेदार बी एहेंज कोअताहा के नाहां? 47 आन जर तुमू फक्त तुमाआं पाव्हीइलाहा एतेज गोगाड़हा, ताहां की वोडो काम कोअतेहे? बिहीरे माअहें बी तेहेंज कोअतेहे के नाहां? 48 तियाहा काजे जेहलुहू तुमाआं होरगामेर्‍युउ आब्हू पाक्कू होय, तेहलेज तुमू बी पाक्के बोणा.