Mateus 5

दुस्मोनोहों मेर कोइलोअ

43 "‘ताआ दोस्ती पोअ मेर कोअ, आन ताआ दुस्मोनोअ सीस कोअ’ एहें कोयोतो, तों तुमू उनाअयेहे. 44 पोन आंय तुमुहूं कोहो के, तुमू तुमाआं दुस्मोनोहों मेर कोआ, आन जे तुमुहूं तारास कोआड़तेहें, तियांआं काजे प्रार्थना कोआ. 45 एहें कोइत, तुमू तुमाआं होरगामेर्‍याआ आब्हाआ पोर्‍ये बोणहां; काहाके तो बाक्ता आन हाजा बेनू पोअ बी दिही उगाड़ेहे, आन धर्मी आन पापी बेनू पोअ बी वोऱ्हात पाड़ेहे. 46 काहाके जें तुमापोअ मेर कोअतेहे, तियांपोअ तुमू बी मेर कोअहा, ताहां तुमुहूं कि इलाम जोड़े? नाकेदार बी एहेंज कोअताहा के नाहां? 47 आन जर तुमू फक्त तुमाआं पाव्हीइलाहा एतेज गोगाड़हा, ताहां की वोडो काम कोअतेहे? बिहीरे माअहें बी तेहेंज कोअतेहे के नाहां? 48 तियाहा काजे जेहलुहू तुमाआं होरगामेर्‍युउ आब्हू पाक्कू होय, तेहलेज तुमू बी पाक्के बोणा.