1 Yesu ni oyaluzidwa wake adafika kuchijya kwa nyanja ya Galilaya mjhiko la Agelasi. 2 Yesu yapo wadandochikape mboti, wadapezana ni mundhu uyo wadali ni chiwanda, mundhu mmeneyo wamachokela kumainja. 3 Mundhu mmeneyo wamakhala kujha kumainja, ni palibe mundhu wamakhoza kummanga ata kwa maunyolo. 4 Pakuti mala zambili amammanga maunyolo mmanja ni phingu mnywendo, nambho wamadula yajha maunyolo ni kuzidula zijha phingu myendo yake. Wadali ni nghongono zambili, ni padalibe mundhu waliyonjhe wamakoza kumgwila. 5 Usana ni usiku kuzungulila kumainja ni kuphili, niwabula pokoso ni kujhiduladula kwa myala.

6 Yapo wadamuona Yesu kwa kutali, wadamthamangila, ni kumgwadila. 7 Ni wadakekema kwa mvekelo wa ukulu, "Ufuna kunichita chiyani iwe Yesu Mwana wa Mnungu wali kumwamba kupunda? Nikupembha kwa jhina la Mnungu siudani vuticha!" 8 Wadakamba chimwecho pakuti Yesu wadachikambila, "Chiwanda, choka kwa mundhu uyu"

9 Ndiipo, Yesu wadachifunjha, "Jhina lako yani"

Wadamuyangha, "Jhina langa ni gulu pakuti tili tambili." 10 Ndiipo adampembha kupunda Yesu wasavitopola vijha viwanda ni kuvipeleka kubwalo kwajhiko lijha. 11 Pafupi ni pamenepo lidalipo gulu lalikulu la nguluwe nilidya pafupi ni phili. 12 Chimwecho vijha viwanda vidampembha Yesu, "Utipeleke kwa nguluwe, utisiye tizilowe izo." 13 Ndiipo Yesu wadavivomeleza, ni vijha viwanda vidamchoka mundhu yujha ni kulowa kwa nguluwe. Gulu lonjhe la nguluwe, zidachikilila kumchikililo ni kubila mmajhi ni kufa, zidali nguluwe alufu ziwili.

14 Anyiwajha amasunga nguluwe adathamanga, kupita kuvijhijhi ni kuminda kwakambila wandhu yameneyo yadachokela. Wandhu wonjhe adapita kuona yajha yadachokela. 15 Yapo adafika kwa Yesu, adamwona yujha mundhu wadazamwa ni viwanda vambili wakhala panjhi, uku wavala njhalu zonjhe, wali wolungwamika, ni wandhu wonjhe adaopa. 16 Wandhu wajha adaona vindhu vimenevo, adaakambila wandhu wina vindhu ivo vidamchokela yujha mundhu wadali ni viwanda ni lijha gulu la nguluwe. 17 Ndiipo, wandhu adampembha kupunda Yesu wachoke mjhiko mwao. 18 Ndiipo Yesu yapo wamakwela mboti, yujha mundhu wadachochedwa viwanda wadampembha Yesu apite wonjhe. 19 Yesu siwadamvomeleze, wadamkambila, "Pita kukhomo kwa achaabale wako ukakambile vindhu vavikulu ivo akuchitila Ambuye Mnungu, ni umo adakulengela lisungu." 20 Chimwecho yujha mundhu wadachoka ni kupita kuuzila ku Dekapoli mate yake mijhi khumi vindhu ivo Yesu wadamchitila, ni wandhu wonjhe adazizwa.

21 Yesu yapo wadayombokanjho kwa boti ni kufika kuchijya. Gulu lalikulu la wandhu lidamzungulila, iye wadaima mbhepete mwa nyanja. 22 Mmojhi wa achogoleli anyumba yokomanilana Ayahudi uyo wamatanidwa Yailo wadajha pamenepo, niiye yapo wadamwona Yesu wadamgwadila, 23 wadampemba niwakamba, "Mwali wanga wadwala pafupi kumwalila. Chonde nikupembha majha umuikile manja nawo wakhoze kulama ni kukhala wamoyo." 24 Chimwecho Yesu wadapita pamojhi niiye. Ni gulu lalukulu la wandhu limamchata, uku ni niabwanyizabwanyiza. 25 Pajha pagulu wadalipo ni wamkazi uyo wamadwala utenda wosusa nghole kwa vyaka khumi ni viwili. 26 Wamkazi mmeneyo wadavutika kupunda kwakupita kwa asing'anga ambili ni wadatumia chuma chake chonjhe, nambho siwadalame, ni wadaendendekela kudwala kupunda. 27 Wamkazi yujha yapo wadavela nghani za Yesu, wadapekenyela paghulu la wandhu, wadampitila Yesu kwa kumbuyo ni kugafya njhalu yake. 28 Wadajhikambila mumtima mwake, "Nikagafyape njhalu yake, sinilame." 29 Yapo wadagafyape njhalu ya Yesu, pampajha nghole idasiya kususa, nayo wadajhivela thupi lake lalamilatu.

30 Pampajha Yesu wadajhiwa kuti mbhavu zake zolamicha zatumika, chimwecho wadaling'anamukila lijha gulu la wandhu ni kufunjha, "Bwanji, yani uyo wagafya njhalu yanga?" 31 Oyaluzidwa wake adamuyangha, "Uona umo wandhu akubwanyizilabwanyizila, chipano ufunjha bwanji kuti yani wakugafya?" 32 Nambho Yesu wadayendekela kupenya kuti wamuone uyo wamgafya. 33 Wamkazi mmeneyo wadajhiwa yayo yadachitika kwa iye, chimwecho wadampitila Yesu uku ni watendhemela kwa mandha. Wadagwada pachogolo pa Yesu ni kumkambila uzene wonjhe. 34 Yesu wadamkambila, "Mwali, chikhulupililo chako chakulamicha. Pita kwa mtendele, walama utenda wako."

35 Yesu yapo wamaendekela kukamba, wandhu wina adajha kuchokela kwa Yailo, ni adamkambila, "Mwali wako wathomwalila, ndande yanji uyendekela kwaachaucha oyaluza?" 36 Nambho, Yesu yapo wadavela chindhu chijha adachikamba, siwadalitengele mate, wadamkambila yujha wamkulu wa nyumba yokomanilana, "Siudaopa, iwe khulupililape." 37 Ndiipo Yesu siwadafune mundhu waliyonjhe wamchate, nambho wadapita ni Petulo, ni Yakobo ni Yohana mphwake wa Yakobo.

38 Yapo adafika kukhomo kwa Yailo, Yesu wamavela mapokoso ni vililo. 39 Yesu wadalowa mkati, wadaafunjha "Bwanji mbula pokoso ni kulila? Mwana siwadamwalile, nambho wagonape." 40 Nambho wandhu wajha adamseka. Chimwecho wadaachocha kubwalo, wadaatenga atate ni amake wa yujha mwali, ni wajha oyaluzidwa wake yawo wadali nawo, adalowa kuchumba chijha adagoneka chitanda chayujha mwali. 41 Yesu wadamgwila jhanja, wadamkambila, "Talisa khumi!" Mate yake, "Mwali, nikukambila uka!" 42 Pampajha yujha mwali wadaima, ni kuyamba kuyenda, mwali yujha wadali ni vyaka khumi ni viwili. Chindhu chimenecho yapo chidachokela, obala ni wajha oyaluzidwa adalowa mujha adazizwa kupunda. 43 Yesu wadaakaniza kupunda siadamkambila mundhu waliyonjhe chindhu icho chidachokela. Ndiipo wadaakambila obala wake, "Mpacheni mwali chakudya kuti wadye."