Atos 8

शाऊलले मन्डलीजन आसताइन्या

1 स्तिफनसल हत्या आताहौक शाऊल बै मिलिस्यु लेऊ। ओछिम्कै यरुशलेमल लेन्या मन्डलीलं बिरोदल घिन्या सटावट सुरु ताहौ, ओटन प्रेरितयाङ बाहेक नकाङ सोगलै यहूदिया सनर सामरीयाला इलाकादेए तत्तर बित्तर ताइवाङ। 2 भक्तजनयाङै स्तिफनसजन लाङस्यु रारीनौ, ओटन नकाल नाल्ट घिन्या शोक रामनाहौ। 3 तर शाऊलले मन्डलीजन दुख यांज्याव। नकाले झिम-झिमल पसिस्यु ल्हेपाङ सनर मेएमाङजन घिसारस्यु घिसारस्यु लाङस्यु झ्यालखानाल आझोअवाङ।

फिलिपले सामरीयाल चान्याथाई प्रचार ढोङा लेसिन्या

4 तब नका तत्तर बित्तर ताइन्याङै चारैवरदेए हिनस्यु बचन प्रचार रांढोव। 5 फिलिपलेकने सामरीयाल तोलोअ सहरल हिनस्यु नकाङजन ख्रीस्टल प्रचार आढोव। 6 फिलिपले आपानन्या बचन राथटौ ओटन नकाले आढान्या अचम्मला कामयाङ रङस्यु, हुलले त यिङला ताइस्यु नकाल छेनत ध्यान रांयोव। 7 दानाङभन्या तबर जनाङन दुस्टआत्माङ घिन्या ग़ाले चिचच्याइस्यु पलिहौ लागिवाङ, ओटन तबर जनाङ लुलाइन्या रोगियाङ सनर दुन्डाङ बै सबेल्सिवाङ। 8 ऐलेस्यु ना सहरल भ्याई आनन्द ताहौ।

सिमोन जादुवाला

9 सिमोन मिनला तोलोअ रु नङ लेऊ। नकाले हादेएकन्जै ना बजारल जादुगर ढास्यु सामरीयाला रुयाङजन अचम्म छक्कै पराइस्यु लेऊ, ओटन ओलझन्जै ङाई ज्या घिन्या ऐलेस्यु यिङवा। 10 नका रुजन इङन्याङतन घिन्या समन सोगलैले ऐलेस्यु रामानिऊ, "ईका रु परमेस्वरलं ना सक्ति ज्या, जोजन महासक्ति ऐढासिया।" 11 नकाङै नाजन रामानिऊ, दानाङभन्या तबर हाकन्जै नकाले आमि जादुगरीले रुयाङजन अचम्म जाएस्यु आनाटौ। 12 तर जब नकाङै परमेस्वरलं राज्य सनर येशु ख्रीस्टल मिनङन चान्याथाई सथएन्या फिलिपल छेन बिस्वास रांढोव, तब ल्हेपा सनर मेएमाङै बप्तिस्मा राहोनौ। 13 सिमोनले ओलं बै बिस्वास आढोव। नकाले बप्तिस्मा आहोनौ, ओटन नकाई फिलिपसैज लागिज्याव, ओटन अचम्मला अचम्मला कामयाङ सनर घि-घिन्या अचम्मला काम आढान्या रङस्यु नाजन छक्कै ताइवाङ।

14 सामरीयाला रुयाङै परमेस्वरलं बचन ग्रहन रांढोव ऐलेन्या थएस्यु यरुशलेमल लिज्यान्या प्रेरितयाङै पत्रुस सनर यहुन्नाजन नकाङल्योङ रांपरिङौ। 15 नकाने नङ रा:स्यु नकाङै पबित्र आत्मा ग्याडोएरत्या लेस्यु छार बिस्वासीयाङ नाल्ट प्रार्थना नेंढोव। 16 दानाङभन्या नवाए बेला समन नकाङ मध्य काङ्काईलयर्त बै पबित्र आत्मा राइस्युमालेऊ। नकाङल बप्तिस्मा प्रभु येशुल मिनङन याएज ताइस्युलेऊ। 17 तब पत्रुस सनर यहुन्नानेंले नें कुई नकाङलयर्त नेंनाटौ, ओटन नकाङै पबित्र आत्मा रांडोटौ।

18 आब प्रेरितयाङै कुई रांनाटौक पबित्र आत्मा डोएसिऊ रैस ऐलेन्या रङस्यु सिमोनले ऐलेऊयन नकाङजन रुप्या यांन्या लेस्यु आहोनौ, 19 "ङाजन बै ईका सक्ति यांङचिन्ते, ओटन ङा बै जोल यर्त कुई नाटङ नकाले पबित्र आत्मा ग्याडोटौत्या।"

20 तर पत्रुसले ऐलेऊ, "न रुप्या नङसं नस्ट ग्याताइत्या, दानाङभन्या परमेस्वरलं बरदान रुप्याले लङौ दुदुसिया लेस्यु नङ बिचार नढोनु। 21 ईका बारेल न त नमी कोबाअ भागले न त बठाइज ले, दानाङभन्या परमेस्वरलं सामन्दी न यिङ सोझा मालेऊ रैस।✝8:21 भजनसङ्ग्रह ७८:३७ 22 नैताइस्यु नङ नमी ईका पापल नाल्ट पस्चाताप ढोते ओटन प्रभुत प्रार्थना ढोते, ओटन पक्का बै यिङला ऐटाइन्या बिचार छेमा ताहा। 23 दानाङभन्या नङजन ङा ङारङज्यानु, नङ पापले भरिस्यु लेना, ओटन अधर्मल बन्धनल लिज्याना।"✝8:23 ब्यबस्था २९:१८; बिलाप ३:१५

24 तब सिमोनले ऐलेऊ, "झेन्जै ङा नाल्ट प्रभुत प्रार्थना ढास्याङचिन्ते, ओटन झेन्जै झेनपानन्या नैज बै छेन ङा यर्त तालागित्या।" 25 ओटन नकानेले गवाइ योंन्यापाइनाई सनर प्रभुल बचन छ्योङस्यु खेमन्यापाइनाई सामरीयाङल तबर नङ्गरल चान्याथाई प्रचार ढाऔयन नकाने यरुशलेम वलौने।

फिलिप सनर इथियोपियाला अढिकारी

26 नकाल छिन्ट प्रभुल तोलोअ दुतले फिलिपजन आढोव, "सोस्यु दच्छिनदेए यरुशलेमङन गाजादेए हिनन्या यमल हिनन्ते। नल यम माखअन्या पो लेया।" 27 ओटन फिलिप च्याङस्यु हिनौ, ओटन तोलोअ इथियोपियाली मिहिरीजन आडोटौ, जो इथियोपिया देसला माहारयनी कन्दाकीला घिन्या पदाधिकारी सनर सोगलै धनसम्पतलं कोस अढक्छ्या लेऊ। ओ यरुशलेमल आराधना ढानास्यु लेऊ। 28 नका वलस्यु रांज्याऔ, ओटन आरथल चुङस्यु यशैया अगमबक्ताल किटाप परीज्याव। 29 तब पबित्र आत्माले फिलिपजन ऐआढोव, "हिनन्ते ओटन ना रथवाला सकाए बान्ते।" 30 फिलिप नका ल्योङ चोएस्युकने हिनौ, ओटन नकाले यशैया अगमबक्ताल किटाप आपरिज्यान्या थएस्यु आगिनौ, "नङ नपरीज्यान्या छेन नबुझिनु?"

31 तब नकाले ऐलेऊ, "काङ्काईले मापानस्यास्यु ङा कैलेस्यु बुजिऊ ढुदुङ का?" ओटन नकाले फिलिपजन रथत वूमस्यु ओलसं चुङनते ऐलेस्यु बिन्ति रांढोव। 32 आब नकाले आपरिज्यान्या पबित्रशास्त्रलं अध्याय ईका लेऊ, "जोमनलेस्यु भेडा पलन्याल नाल्ट लाङसी, या थुमा उन कतरिन्याल ल्यौक छपक्कै दिङज्या, नैलेस्यु जै नकाले आयां: माफएदा। 33 नकाल अपमान आताहौ बेलाक नाले निया माडोएदा। नकाल पुस्तालं चर्चा काङ्काले ढान्या? दानाङभन्या नकाल जिबन पिरथ्बीलन लाङसिऊ।"✝8:33 यशैया ५३:७-८

34 तब ना मिहिरी फिलिपजन ऐआढोव, "किर्पा ढास्यु ङाजन पानस्याङते, अगमबक्ताले ईका काङ्काल बारेङन आपानौ, ओलं आमि बारेल सन् अपुर काङ्काङै बारेल?" 35 तब फिलिपले आयां: खुलिस्यु पबित्रशास्त्रलं ईका खन्डलन नकाजन येशुल चान्याथाई आसथटौ। 36 ओटन नकाने यमल नेंहिनज्याऔ नेंहिनज्याऔकै तचिइ री लेन्या तोलोअ पोल तापराऔने। ना मिहिरी ऐलेऊ, "ब्याएते, इल री लेऊरैस, ङाजन बप्तिस्मा होनन्याङन नैले रुकिऊढुदुउ?" 37 फिलिपले ऐलेऊ, "यदि सोगल यिङले जै बिस्वास ढोनकन नङ बप्तिस्मा होनौ ऐदुदुना।" नकाले जबाक आयोव "येशु ख्रीस्ट जै परमेस्वरलं ज़ा ज्या ऐलेस्यु ङा बिस्वास ढोङा।"

38 फिलिपले रथ रुकिन्या आग्या आयोव, ओटन फिलिप सनर नका मिहिरी नेंलोअनेंज रील लाहौने, ओटन ओले नकाजन बप्तिस्मा आयोव। 39 तर जब नकाने रील डुबिस्यु पाखा पलिईस्यु रांऔने, तब प्रभुल आत्माले फिलिपजन कोलोअस्यु आलाङौ, ओटन नका मिहिरी फिलिपजन फरि मारङदा, ओटन नका हेसाङस्यु आयम लागिऊ।✝8:39 १राजा १८:१२ 40 तर फिलिप अश्दोदल रंनौ, ओटन कैसरिया आमातापौ समन सोगल सहरजिऊल चान्याथाई पानौयन हिनौ।