1 येशुले बारं गोटा सिइयाङजन खुल्स्यु अशुद्दआत्माङ पलिईन्या सनर सोगलै किसिमला नाएबोर सनर दुर्बलताजन सबेलन्या अढिकार आयोवाङ। 2 बारं प्रेरितयाङल मिन आकाई ज्या, पैला पत्रुस ऐढासिन्या सिमोन सनर नकाल भाई अन्द्रियास, जब्दियाल ज़ा याकूब सनर नकाल भाई यहुन्ना, 3 फिलिप सनर बारथोलोमाइ, थोमा सनर तिरो उठाइन्या मत्ती, अल्फयसलं ज़ा याकूब ओटन थेदियस, 4 सिमोन कनानी सनर यहूदा इस्करियोत, जोले येशुजन कोलोकौ आपरिङौ।

5 येशुले नका बारं गोटा सिइयाङजन आदेस यांस्यु आपरिङवाङ, "गैरयहूदीयाङल खार्ल ताहिनच्यो, अथाबा सामरीयाङल सहरल तापसिच्यो।"✝ 6 तर इस्राएल जातिला मांन्या भेडाङ ल्योङ हिन्चिते। 7 स्वर्गलं राज्य नेराकै ताप्‌रा:स्यु लेया, ऐलेस्यु प्रचार ढोचिते।✝ 8 नाएबोरन्याङजन सबेल्चिरते, सिन्याङजन जिङदा जाएचिरते, कोर लागिन्याङजन चोखा जाएचिरते, भूतयाङ पलिइचिरते। जे डाङज जेडोएचिऊ, डाङजै योंचिरते। 9 जे झेलील सुन, चान्दी सनर ताम्बाल पैसा तावुरच्यो, 10 जेबाऔक झ्योला, नें जोर दौरा, जुता, झुई तालाङच्यो। दानाङभन्या कामदारले आज्यान्या डोटौज परिया।✝

11 "जो सहर या नङ्गरल जे पसिच्यो, नल काङ्का लायकला लेऊ ऐलेस्यु रोअचिते, ओटन नलन बिदा जेमाताहौ समन नलै चुङज्याचिते।" 12 नका झिम भितरलं जेपसिऊक जडौ ढोचिरते। 13 यदि नका झिमला रुयाङै जेजन स्वागत ढाचिरकन नका झिमल शान्ति ग्यारांत्या। तर नला रुयाङै जे जडौ माहोलरकन, शान्ति जेल्यौदेए वलस्यु ग्यारांत्या। 14 यदि काङ्काङै जेजन स्वागत माढाचिरकन या जे छेन माथएदुरा भन्या, ना झिमलन अथाबा सहरलन जेपलिहौक जेखङला धुलो हरस्योचिरते।✝ 15 ङा जेजन, मछ्यु ऐढाच्या, नियाल दिनक ना सहरल दशातन बरु सदोम सनर गमोराल दशा भ्याई मासहिदुन्या ताहा।✝

16 "ब्याएचिते, ङा जेजन फ्याऊयाङ खार्ल भेडाङमन परिङज्याच्या, नैताइस्यु जे डाङमन चलाक सनर कचिकुरमन सोझा ताइचिते।✝ 17 तर रुयाङतन होसियार ताइचिते, दानाङभन्या नकाङै जेजन अदालतल सुम्पिचिरा, ओटन यहूदीयाङल आराधना झिमजिऊल जेजन कोर्ला राइस्याचिरा।"✝ 18 ङागर्दाले जेजन हाकिमयाङ सनर रययाङै सामन्दी सच्यानन्यालेरा, ओटन नकाङ सनर गैरयहूदीयाङल नाल्ट साची ताइन्यालेच्या। 19 तर जब नकाङै जेजन कोलोकौपरिङचिर, तब जे नै छ्योङै ऐलेस्यु ताआतिच्यो। दानाङभन्या जे नै छ्योङौ परिन्या, नवाए बेला जेजन पानस्यासिया। 20 दानाङभन्या जे जेईज छ्योङन्या माताइचिदी, तर जे बौल आत्मा जेल्योङन छ्योङन्या लेया। 21 "दाज्यूभाईले दाज्यूभाईजन सटौ नाल्ट जिम्मालाइरा, बौले ज़ायाङजन, ओटन ज़ायाङ बौ आमाङल बिरोदत च्याङन्या लेरा ओटन नकाङजन सटौ परिङन्या लेरा।"✝ 22 ङा मिनले गर्दा जे सोगलैङन सज्युस्युनीच्या। तर जो छिन्ट समन तनस्यु लिज्या, नकाईल उद्दार ताहा।✝ 23 जब नकाङै जेजन तोलोअ सहरल सटाइचिर तब छुट्टै सहरल ढोङचिते। दानाङभन्या मछ्यु ङा जेजन ऐढाच्या, रु ल ज़ा आमाराऔ हादेए जे इस्राएल सहरला जे डुलिस्यु खेमन्या माल्चिदी।

24 "सिइ गुरतन सनर नोक्कर साहूतन घिन्या माताइदी।"✝ 25 सिइ आगुरमन सनर नोक्कर साहूमनताइन्या पक्काई ज्या। यदि नकाङै झिमला साहूझन्ज बालजिबुल ऐढोरकन, आजाहानयाङजन ख्वाए भ्याई रांढोव होला?✝

26 "नैताइस्यु नकाङ रङस्यु ताछ्याएच्यो। दानाङभन्या कप्स्यु मारंनन्या सनर मोअस्यु थाह माताइन्या नैज माल्दी।"✝ 27 ङा जेजन चिऊन्याल जो पानस्याच्यो, ना जे रंनन्याल पानस्योचिरते, ओटन जे गोप्यल जेथएन्या, झिमल धूरीतन प्रचार ढोचिते। 28 नकाङसं ताछ्याएच्यो, जोले बुलजन सएर, तर आत्माजन सटौ माढुदुरदी। बरु आत्मा सनर बुल नेंलोअजन नरगल नास जाएन्या परमेस्वरजन रङस्यु छ्याएचिते। 29 नैति त पैसालं नेंलोअ भिङ्गुऱ्या मायहौने? नकाने मध्य तोलोअ बै जे बौल इच्छ्याबिना नामल तेइन्यामाल्नेदी। 30 जे ङएला स्वाट्टै चेमसऱ्या बै गनिस्यु नाएसिया।✝ 31 नैताइस्यु ताछ्याएच्यो, जे तबर भिङ्गुऱ्याङतन भ्याई करन्या लेच्या।

32 "नैताइस्यु जोले रुयाङ हार्मै ङाजन निज्याङु, ङा बै नकाजन स्वर्गल लिज्यान्या ङा बौल लेऊक मानिन्यालेङा। 33 तर जो-जोले ङाजन रुयाङल हार्मै मामानिङु, ङा बै नकाजन स्वर्गल लिज्यान्या ङा बौल लेऊक मामानिङदी।"✝

34 "ङा पिरथ्बील शान्ति होनन्या ङारांङु, ऐलेस्यु तायिङच्यो। शान्ति होनन्या माङडी, तर तरवाल चलाइन्या ङारांङु हो। 35 दानाङभन्या ङा रुजन आबौल बिरोदत, सनर मेएमाज़ाजन आअमाल बिरोदत, ओटन ब्वाहारीजन फुबुल बिरोदत ङाजाएराङु हो।"✝ 36 रुल शत्तुर नकाल आझिमलाइज ताइन्यालेरा। 37 "जोले ङातन भ्याई आबौ या आअमाजन प्रेम ढोव, ना ङा सिइ ताइन्या लायकला माताइदी। जोले ङा भन्या भ्याई ल्हेपाज़ा या मेएमाज़ाजन प्रेम ढोव, ना ङा सिइ ताइन्या लायकला माताइदी।" 38 जो आक्रूस वुरस्यु ङाछिन्ट मालागि, ना ङा लायकला माताइदी।✝ 39 जोले आपरान जोगाहौ, नाले आत्मा गवाइवा, ओटन ङा नाल्ट आपरान गवाइन्याले जिबन डोएवा।✝

40 "जेजन ग्रहन ढान्याले ङाजन ग्रहन ढाङवा, ओटन ङाजन ग्रहन ढान्याले ङाजन परिङन्याजन बै ग्रहन ढोवा।✝ 41 जोले अगमबक्ताजन अगमबक्ता लेस्यु स्वागत ढोव नकाले इनाम डोएवा, ओटन जोले धर्मि रुजन धर्मि लेस्यु स्वागत ढोव, नकाले इनाम डोएन्यालेया। 42 जोले आका इङन्याङ मध्य तोलोअजन ङा सिइ यिङस्यु त खुरी चिसो री ओव योंव, ङा मछ्यु जेजन ऐढाच्या, कि नकाले आइनाम ऐजै गवाइन्यामाल्दी।"