मत्ती 13

येशुले साम्बाअल आहानल अर्थ आपानन्या

36 तब येशुले रुयाङ हुलजन बनाएस्यु झिम भितरलं हिनौ, ओटन सिइयाङ आल्योङ रा:स्यु ऐराढोव, "खेएला साम्बाअल बारेल नपानन्या आहानल अर्थ गेजन पानस्यासिन्ते।"

37 येशुले नकाङजन जबाक आयोवाङ, "चान्या धूर वाइन्या रुल ज़ा हो। 38 खेए सङ्सार हो। चान्यावाला धूर राज्यल सन्तान हो, ओटन साम्बाअ दुस्टआत्मालं ज़ा हो।" 39 ओटन साम्बाअ लाइन्या शत्तुर दियाबलस हो। अनल समायकने जुगल अन्त हो। अन दुउन्याङ स्वर्गदुतयाङ हो। 40 "जोमनलेस्यु साम्बाअ भोअस्यु मीले भसम जाएसि, जुगल आसापट नैज ताइन्या लेया। 41 नकाछिम्क रुल ज़ाले आस्वर्गदुतयाङ परिङन्या लेया, ओटन पाप ढाऔ परिङन्या रु सनर दुस्ट काम ढान्या ईका राज्यभरिला सोगलै रुयाङजन दुउन्या लेरा, 42 ओटन ओयाङजन मील भुबराल क्याइन्यालेरा। नल रुयाङ व्‌रन्यालेरा ओटन रांह्वाजिङ कैन्यालेरा। 43 तब धर्मि रुयाङ रांबौल राज्यला नमिउमन चम्किन्यालेरा, जोल नां ले, ओले ग्याथटौत्या।