मत्ती 9

सिन्या किटी सनर नाएबोरन्या मेएमा नेंबेलन्या

18 जब येशुले नकाङजन ईका छेन पानस्याज्याऔ, तब बैठअझिमला तोलोअ शासक रांऔ, ओटन ओलजन धोक यांस्यु ऐआढोव, "औ गुरु मेएमा ङाज़ा भाबाअ सिस्यु लेऊ, नङ रा:स्यु नकाल यर्त नकुई नाएते, ओटन नका बान्चिन्या लेया।"

19 येशु सोस्यु च्याङस्यु आसिइयाङसं शासकलं छिनछिन हिनौ। 20 नवाए बेला बारं बर्सकन जी बगिन्या बेथा लेन्या तोलोअ मेएमा छिन्ङन रा:स्यु ओलं क्वाल टुप्पा आछुउ।✝9:20 मत्ती १४:३६ 21 दानाङभन्या नकाले आयिङयिङल यिङसिस्यु ऐलिज्याऊ, "इकाल क्वा याएज छुङकन बै ङा ऐबेल्ङा।" 22 येशुले फरअ वलस्यु आब्याटौक ना मेएमाजन आरङौ, ओटन ऐआढोव, "ऐ ज़ा, साहस ढोते, न बिस्वासले नङजन सबेल्दुन्वा।" ना मेएमा नवाए बेलाई बेलौ।

23 ओटन जब येशु शासकलं झिमल ताप्‌रा:औ, ओले बाङसुली तपन्याङ सनर रुयाङ हुलले चिचच्याबास रालज्यान्या आरङवाङ। 24 येशुले नकाङजन ऐआढोवाङ, "जे बाहेर हिन्चिते, दानाङभन्या किटी सिस्यु माल्दी, रुउज्याऔ दी।" ऐआलेऊक नकाङ शाईवाङ। 25 रुयाङजन बाहेर देए पलिटौरा पाइना ओलं भितरलं पसिऊ, ओटन ना किटील कुई आकोलोकौ, ओटन ना जरू सोव। 26 तब ईका छेनल बाए ना देसभरि फैलिऊ।