1 Nǝ mkpaŋ yuŋɔ abɛ tsene maa anyɛ bǝn Yesɔ te rib bu, <<Ayi ŋɔwa ayi ŋgɔŋ ne ikɔb kǝ gbarshu?>>

2 A zhɔ vǝvǝn vǝtsɔb aŋyak ne atsutsu amene. 3 Te di, <<Mbla zhin izub, mba zhin te kam te ndi amumun amɔ tsɔtsɔb ba, ba zhin tei yir ikɔb kǝ gbarshu ba. 4 Amɛ, iwaŋ ndi te kam tu maa ate ndi vǝvǝn vetsɔb iwa atei yi ŋgɔŋ ne ikɔb kǝ gbarshu.

5 <<Waŋ ndi ate ta vǝvǝn vǝtsɔb ne sak muŋ ne ta ayi nga. 6 Fe waŋ ndi ate duŋ zhiin ne miŋ kɛ abɛ tanyɛmɛ bene bɛm abaŋa ate duŋ nuŋ azhaku nǝ lalɛ, itei rɛ ndi abɛ kpa nɛrɛ mkpaŋ nena ne tɔ te atugu azhɔk ne rɔŋ amashir ŋgɔŋ.

7 <<Zhin zhɔk atu amin gɔnmimi ne iki yi duŋ aneshir ana zumimin! Ikiki yiŋɛ nak nyɛ, waŋ ndi ate duŋǝ nyɛ bɛ zhin azhɔk tu ma! 8 Ate yi ndi ŋɔk mi kɔ za mi tei duŋu zhaku, sɛr kɛ kyaŋ tyak zhɔk. Ire te ubǝ yik ivli kǝ yaŋ klɛtu ne mkpɔk ŋɔk kɔ mkpɔk za, inaŋ yi ne aŋɔk ayaa bǝn aza ayaa te yir ilu kǝ yaŋ klɛtu. 9 Teyi ndi iyi mi tei duŋu zhaku, tun kɛ tyak zhɔk. Itei rɛ ubǝ yik ivli kǝ yaŋ klɛtu ne yi zhin te bǝ yi ne ayi ayaa te abɛ tyak gu azhɔk ne lu.

10 <<Kǝr zhin bǝ yaŋ tɔ izhiin ne miŋ kɛ amɔtsɔtsɔb abaŋa shak yi ba. Mbla zhin te di abɛ shar ayou Arik ne gbarshu ne tu amen anak ayik ti kɛ Tetɛɛ amuŋ ne gbarshu. 11 Izu neshir ne nyɛ tashur te wɔb abaŋ ndi ne dɔ.

12 <<Izhin ne yik kikin? Neshir ate yine awanta sɔk wur fe izhin ne miŋ mǝne ate dɔ ahwaŋ, batai duŋ sɔk teres ane teres ne atugbu te akɔmɔ gar wɔb izhin waŋ ndi ne dɔ kai? 13 Ate awɔbu avuŋ, mbla zhin izub atei nyɛr ndi wa ne yik wanta zhin waŋa anaŋ sɔk teres ane teres abaŋ ndi bane dɔ ba. 14 Anenen amɛ Tetɛɛ amɔr ne gbarshu ba ne ta anyɛ me inuŋ ne miŋ kɛ amɔtsɔtsɔb abaŋa abɛ yir lu ba.

15 <<Te yi ndi zumin kɔ va min ne lau lɛ, kɔ te yigu te blau lalɛ ma, zhineba ne akpa min. Ate wɔu, une kam zumin nyak ankɔŋɔ. 16 Te yi ndi te kyak wɔu, gli ner zhin kɔ aner ayaa te gar bene bɔu te duŋ, <kɔte lɛ takɛ ndi ru rɛ anu aner ayaa kɔ atar iyi kɛ gli mgbamgbaŋ.> 17 Ate kyak wɔ ba ma, bla abǝ zǝ Arik; ate kyak wɔ abɛ zǝ Arik ge, baŋ zhine wu ndi ner ne yaŋ zhi Arik ba kɔ ner ne ta gendu.

18 <<Mbla zhin izub, iki yiŋ ndi izhin ne tanyɛmɛ ne yi ne gɔnmimi Arik ne tanyɛmɛ ne yi ni gbarshu, Iki yiŋ ndi izhin ne kyagǝ ne gɔŋmimi Arik atei kyagǝ ni shu.

19 <<M tei na mbla zhin izub, te yi ndi aner ayaa ne miŋ mine ne akpa kinuŋ aŋyak ne gɔnmimi ndi ne bene, Tetɛɛ amuŋ ne gbarshu atei naa ba neyi. 20 kɔte mkpaŋ takɛ te yi ndi aneshir ayaa kɔ atar ne bin atu ne sak muŋ, me yi bene abɛba.>>

21 Ankyak Biturus ne nyɛ bǝn Yesɔ te rib bu tedi, <<Ŋgɔŋ, amkpaŋ aben izumɔr atei lam lɛ te M tei zugu zhɔk? Ayi Amkpaŋ taŋgba yi?>>

22 Yesɔ ata anyɛ me te di, <<Mblau, ba amkpaŋ ataŋgba ba, ayi amkpaŋ sɔk taŋgba amkpaŋa taŋgba.

23 <<Amɛ, ikɔb kǝ gbarshu iyi ndi itum waŋ ndi atei bla adudunki amaa ben agen amaa. 24 Ndi ne ayir blama, ne gliu neshir waŋ ndi agliu hria kɛ azɔb azhin awur 25 Ndi ki ya hria ma ne yaŋu ma, atukɔ amaa adi wa ben wa maa ben amumun amaa ben kiki maa bɔbɔk abɛ vu ba alɛb te ya hria ma.

26 <<Ankyak igen a tar agbarum ne aza maa te di. <Lɔ susun muŋ,> Mbenu, <M tei yau bɔbɔk.> 27 Atukɔ ayou igene akɔ lɔ susun ma, te duŋu hria maa te zugu zhɔk te duŋu kɔmɔ.

28 <<Ankyak ndi igene ne aru abɛm, ayik igen nuŋ ndi ayi ikpa ma ndi agliu hria azɔb sɔk wur. Aklau avuŋ te afǝru ne mli. Te diu yam hria muŋ.

29 <<Kpa maa igene atar agbarum ne ti maa te benu te di, lɔ susun muŋ, M tei yaau hria mi.>

30 <<Ne kyak. Te kɔmɔ te aduŋ avuŋ kpa ma ate ku ne jaru, se ndi ne yau hria ma. 31 Ndi anki agene ne yik ki yiŋ ndi gen waŋa ne nai ne te mfu te kɔmɔ te bla atukɔ amene iki yiŋ ndi ne na.

32 <<Ankyak atukɔ ama azhɔ igene agli ayire, <Igen ne susun mimin,> Adiu, <Mne nduŋu hria mi bɔbɔk te zugu zhɔk ndi une ben me. 33 Bane rɛ ndi ubǝ lɔ susun kɛ kpa ami igen waŋa ndi nga ma mne lɔ susun mi ka? 34 Atukɔ mɔ ne te mfu te adi aneshir abɛ tsǝgu ngɔŋ, se ne yam hria muŋ bɔbɔk. 35 Akyak Yesɔ adiba<<Waŋa ayi iyiŋ ndi Tetɛɛ amuŋ ne gbarshu atei na kɔte ŋɔwa se une zuk zumin zhɔk ne susun mi.>>