Lucas 19

Yesu wakumanana na Sakayo

1 Yesu wakianga wakime murubungu rwa ku Yeriko, weta munkati na ro. 2 Kai murubungu ndo nti muri mwea uma mbu nge Sakayo. Sakayo ngo wabesenga kapita k’ebakongori b’ehoro, na nti mutumba. 3 Wabesenga uhunange isunga Yesu, ina bushwa mbu wabesenga mwihi, ntíwakochanga imusunga bushwa n’ebwingi bw’ebea. 4 Bushwa nancho, watibita tete kubusondori n’ebea n’itaya mu muti kongo wasunga Yesu, bushwa mbu himpo nge hakomenwanga ho ieta Yesu. 5 Yesu wakianga weya mpo, wararame ekwio n’iire Sakayo mbu: «Sakayo, hita tete, bushwa mbu runotu nakomenwa isame mu mwabe.» 6 Sakayo wahita tete n’ienda kakoke Yesu mu mwae na ngoa.

7 Ebea bati bakianga basunga mbo, babucha imutera mbu: «Rero-rero, Yesu wenda kasame mu numba ya mwea wa nsambi!» 8 Ina Sakayo wasimana, were Yesu mbu: «eNyere Kuritu, nasebanyie ebasene muhango w’ebehe byani, na kuba nashumanga kikai cha mwea mwimuhusa, nasemukuruchie cho meta anye.» 9 Yesu weba mbu: «Runotu, Ongo wamashukaya enumba ino bushwa mbu emwea uno hotu mwana wa mu ruanda rwa Iburahimu, 10 bushwa mbu ani eMwana w’eMwea nareya kasonda ebariminanga n’ishukaya bo.»