Lucas 19

Yesu wakime ku Yerusaremu

28 Yesu wakianga wameba ebinwa mbyo, wasondore ekikembe ch’ebea mu rienda ku Yerusaremu. 29 Wakianga wasonda ieya kwihi n’erubungu rwa ku Betefake na ku Betania kumushi n’erou rw’eMiseituni, watuma banafunsi bae babi, were bo mbu: 30 «Mwendi murubungu eruri kubusondori ninu. Mukia mumeya kuro, mukusunga chana cha mbunda chaminwa kitangaria nensi umpe mwea, muboronga cho na murishe cho hano. 31 Kuba mwea wabushisha mbu bushwa nki mwobora cho, mumusakonga mbu: ‹Nyere Kuritu warae mu cho.›»

32 Ebanafunsi mbo benda. Bakumana ebikai biti imbu bwakukianga Yesu were bo. 33 Barekia boborange echana ch’embunda cha, bisa cho bashisha bo mbu: «Mbeni banu mwoborange echana ch’embunda bushwa nki?» 34 Basako bo mbu: «Nyere Kuritu warae mu cho.»

35 Ebanafunsi barishie Yesu echana ch’embunda cha. Batereka enchangi sabo hiyo n’emongo w’embunda, ituka mpo batarisha Yesu hiyo nayo. 36 Yesu wakianga ukiri muruendo, ebea nabo nti bansansange esanchangi sabo mu munse.*19.36 eBayuta bakianga bakokengi emukwakare, bansansangǎ esanchangi sabo mu munse mwimunika itunda. 37 Wakianga ubungurengi murubungu rwa ku Yerusaremu, ihita n’erou rw’eMiseituni, ebanafunsi babesenga bamoa nguru na nti batatange Ongo mu murenge mukiri bushwa n’ebishisharo biti byasunganga bo. 38 Babesenga bebange mbu:

«Wákasanirwe eMwami ngu weyange mu rina ra Nyere Kuritu!

Mu mbingu kubesi buhoro,

Na Ongo watatwe!»*19.38 Soma Sab 118.26.

39 Bushwa nambo, Bafarisayo bima munkati n’ekikembe ch’ebea, bere Yesu mbu: «eMuhani, fine ebanafunsi babe mbu bakobe!» 40 Yesu wasako bo mbu: «Nibwirengi banu: kuba ebea bano bamubibira, emakoi asekua.»