Lucas 7

Yesu waramya mukori wa mukwakare w’ebasura

1 Yesu wakianga wameba ebinwa biti mbyo kuri ebea mbi babesenga bamurukirange, wenda murubungu rwa ku Kaperenaumu. 2 Nanko kwabesenga mukwakare uma wa basura wa Baroma. Emukwakare ngo wabesenga na mukori wae uma washima we nguru. Emukori ngo wabesenga usambange nti uri mu nsanga nareke. 3 Entambi yakianga emukwakare o warukira emwasi wa Yesu, watuma kuri we bakungu bima ba Bayuta imuhema weye karamya emukori wae. 4 Ebakungu mbo barekia basaa hari Yesu, bamuhema nguru mbu: «Emwea uno wakomenwa umukori ebikuhemange we, 5 bushwa mbu iwe utushimanga bate eBayuta, nae ngwakutwimbenga n’esinangoki yitu.»

6 Naha Yesu wenda hima nabo. Warekia weya kwihi n’enumba y’emukwakare ngo, watuma bira bae bamweberi kuri Yesu mbu: «eNyere Kuritu, kiro winubya, bushwa mbu ani ntínakomenwa ikukoke mu mwani. 7 Ngyasingwa nasunga nti tínakomenwa ieya harikire ǒngo. Ina, ǒngo eba kinwa kima ho, n’emukori wani waserama. 8 Niri n’ebanisimanirenga mu murimo witu, ina nani niri nambi basimanirenga ani. Namere uma mbu: ‹Enda!› Nae ntwenda na! Namere umpe mbu: ‹Iya!› Naha nti weya! Namere ntumwa yani mbu: ‹Kora buno!› Nae nti wakora na bumbo!»

9 Yesu warekia warukira ebinwa mbyo, washishara bushwa n’emukwakare ngo. Wakae kuri ekikembe ch’ebamumisange, n’ieba mbu: «Nibwirengi, ntangasunganga mu chuo kiti cha ku Isiraeri mwea uri n’isimira nguru buri uno!»

10 Ebea mbi batumwanga barekia bakuruka ekunumba, bakumana emukori ngo ntwamarama.