Lucas 9

Ebasondange itucha Yesu

57 Yesu n’ebanafunsi bae barekia bari mu munse, mwea uma were Yesu mbu: «Nendi nikumisange ekuti kwaseta ǒngo.» 58 Ina Yesu wamwire mbu: «Emiterere irikanga na biribu by’isame mo, n’emirónge irikanga na birumba, ina ani Mwana w’eMwea nisira n’ehamusame ani.»

59 Yesu were umpe mwea mbu: «Nimise.» Emwea o nae weba mbu: «eNyere Kuritu, nikuhemange mbu nendi kasa kataa tita.»*9.59 EkuBayuta, itaa tita ng’erimuranga mu matu ebukungu bwae ieya n’erotu rusekwayo we. 60 Yesu wamwire mbu: «Reke ebakwire batae ebakwi babo, ina ǒngo enda katura emwasi w’eBwami bwa Ongo.»

61 Umpe mwea were Yesu mbu: «eNyere Kuritu, nendi nikumisange, ina nikuhemange mbu nendi kasa karaa eruanda rwani.» 62 Yesu wamusako mbu: «Emwea wamabucha ihinga nukaengi tu kuruma, nti twakomenwa ikora mu Bwami bwa Ongo.»