FAS SAMUEL 2

Hana i presem Hae God

1 ✝ 2.1: Luk 1.46-55 Nao Hana i prea, i talem se,

!Hae God!

!Yu yu mekem tingting blong mi

i glad we i glad!

!Mi mi glad tumas,

from samting ya we yu yu mekem!

Naoia mi stap laf nomo

long ol enemi blong mi.

!Mi mi glad we mi glad,

from we yu halpem mi!

2 "Hae God, yu yu tabu,

fasin blong yu i stret olgeta.

I no gat man we i olsem yu,

mo i no gat narafala god tu

we i olsem yu.

Yu yu wan strong sefples

blong mifala,

mo i no gat narawan we i olsem yu.

(Tok i go long ol man)

3 "Olgeta.

Yufala i stap leftemap yufala

long ol flas tok ya blong yufala,

be yufala i mas lego fasin ya,

yufala i mas stap kwaet.

Hae God ya, hem i wan God

we i save olgeta samting,

mo hem i stap jajem ol fasin

we ol man oli stap mekem.

4 Ol bonara blong ol strong man

oli brobrok,

be ol man we oli no strong

oli stap kam strong.

5 Olgeta

we fastaem oli stap kakae gud,

naoia oli go wok blong narafala man

blong kasem kakae blong olgeta.

Be olgeta

we fastaem oli stap hanggri,

naoia, oli no moa hanggri bakegen.

Woman we fastaem i no save karem

pikinini,

naoia, hem i karem seven pikinini,

be woman we i karem plante

pikinini,

naoia, hem i no moa gat wan i

stap.

6 Hae God i save mekem man i ded,

mo i save mekem man we i ded

i laef bakegen.

Hem i save sanem man

i go long hom blong ol ded man,

mo i save tekem man i kambak,

i laef bakegen.

7 Hem i save mekem rijman i kam pua,

mo i save mekem puaman i kam rij.

Hem i save mekem man we i praod

i godaon,

mo i save leftemap man we i

stap daon,

i go antap.

8 Hem i save leftemap laef blong ol

puaman

we oli stap daon long asis nomo,

mo i save givim plante samting

long ol trabol man.

Hem i save mekem olgeta oli

kampani

wetem ol pikinini blong king,

mo i save leftemap olgeta

blong oli sidaon wetem ol

haeman.

Ol fandesen blong wol ya

oli stap long han blong hem nomo,

hem nao i stanemap wol ya

long ol fandesen ya.

9 "Hem i stap lukaot gud long olgeta

we tingting blong olgeta i stap

strong long hem,

be ol man nogud oli gowe,

oli stap lus long tudak.

I no gat man i save win

long paoa blong hem nomo.

10 Hae God bambae i jajem ol man

long olgeta ples long wol.

Hem bambae i spolem

ol enemi blong hem.

Bambae hem i stap long heven,

i mekem tanda i faerap i kam long

olgeta.

Mo bambae hem i givim paoa

long king ya we hem i jusumaot,

bambae i leftemap hem,

i mekem hem i stap win oltaem."