23 Nao Ebraham i kam klosap long hem, i askem long hem se, "?Olsem wanem? ?Sipos yu panisim ol man blong ples ya, bambae yu spolem olgeta man evriwan? ?Bambae yu kilim ol man nogud wetem ol stret man tu? 24 ?Sipos i gat fifti man i stap long taon ya we oli stap mekem i stret nomo, yu ting se bambae yu mas spolem olgeta man blong taon ya? Mi mi ting se yu save letem olgeta man blong taon ya oli stap laef, blong sevem fifti man ya we oli stap mekem i stret. 25 Long tingting blong mi, yu yu no save spolem olgeta evriwan. Sipos yu kilim ol man nogud, be yu no save kilim ol stret man tu wetem olgeta. !Hemia i no fasin blong yu ya! Yu yu no stap mekem i sem mak nomo long man we i mekem i stret mo man we i mekem i no stret. Yu yu man blong jajem olgeta man blong wol. !Yu yu stap jajem man long stret fasin nomo!"

26 Nao Hae God i talem se, "Sipos mi faenem we i gat fifti man i stap long Sodom ya we oli stap mekem i stret nomo, bambae mi letem olgeta man blong taon ya oli stap laef from fifti man ya."

27 Be Ebraham i tok bakegen, i talem se, "Masta, plis yu no tingbaot we mi mi man nomo, nao mi girap long fes blong yu blong tokbaot samting ya. Mi save we mi mi no gat raet blong tok. 28 ?Be sipos i no gat fifti man we oli stap mekem i stret, i gat foti faef nomo i stap, bambae i olsem wanem? ?Bambae yu save spolem olgeta man blong taon ya from we namba blong ol stret man i no kasem mak ya, i gat faef man i sot long hem?"

Mo Hae God i talem se, "Sipos mi faenem we i gat foti faef man i stap long taon ya we oli stap mekem i stret nomo, bambae mi no save spolem taon ya."

29 Be Ebraham i tok bakegen, i talem se, "Maet i gat foti man nomo olsem i stap."

Mo Hae God i talem se, "Sipos mi faenem we i gat foti man nomo olsem i stap, bambae mi no save spolem taon ya."

30 Be Ebraham i talem se, "Masta, plis yu no kros long mi, be mi mas tok bakegen. ?Sipos i gat toti man nomo olsem i stap, bambae i olsem wanem?"

Mo Hae God i talem se, "Sipos mi faenem we i gat toti man nomo olsem i stap, bambae mi no save spolem."

31 Be Ebraham i talem se, "?Masta, plis yu no ting se mi stap mekem flas blong mi, we mi stap toktok wetem yu olsem, be sipos i gat twanti man nomo olsem i stap, bambae i olsem wanem?"

Mo hem i talem se, "Sipos mi faenem we i gat twanti man nomo olsem i stap, bambae mi no save spolem."

32 Be Ebraham i talem se, "Masta, plis yu no kros. Hemia i lastok blong mi. Bambae mi no moa tok bakegen. ?Sipos i gat ten man nomo i stap we oli stap mekem i stret nomo, bambae i olsem wanem nao?"

Mo Hae God i talem se, "Sipos mi faenem we i gat ten man i stap we oli stap mekem i stret nomo, bambae mi no save spolem taon ya."

33 Mo taem tufala i toktok finis, Hae God i aot long Ebraham, i gowe, mo Ebraham i gobak long ples blong hem.