13 Nao God i talem long Noa se, "Noa. Mi mi tingbaot finis blong mekem lasdei blong olgeta man blong wol. Bambae mi spolem wol ya wetem olgeta man ya evriwan, from we olbaot long evri ples, ol man ya oli stap faet mo oli stap kilim man i ded. 14 Naoia yu mas tekem ol gudfala timba, mo yu mas wokem wan bigfala sip blong yu long hem. Yu mas wokem ol rum long hem, mo yu mas pentem insaed blong hem mo afsaed blong hem long kolta. 15 Bambae yu wokem we longfala blong hem i kasem wan handred toti tri meta, mo bigfala blong hem i kasem twanti tu meta, mo hae blong hem i kasem totin meta. 16 Mo taem yu wokem haos blong sip ya, bambae yu no blokem saed blong hem olwe go kasem ruf antap. Yu mas livim tufala saed i stap open nomo antap, we hae blong open ples ya bambae i samwe long haf meta, blong bambae win i save kam insaed. Yu mas wokem tri dek blong hem insaed, mo yu mas wokem wan doa long saed blong hem.