1 Long buk ya, i gat ol tok we Profet Jeremaea i talemaot. Profet ya, papa blong hem pris ya Hilkia, mo hem i wan long ol pris ya we oli stap long distrik ya Benjamin,* long wan taon, nem blong hem Anatot. 2 ✝Hae God i toktok long profet ya long namba totin yia we King Josaea we papa blong hem Amon, hem i king blong Juda.* 3 ✝Mo hem i toktok long hem bakegen, long taem ya we King Jehoeakim, we papa blong hem King Josaea i king. Mo biaen, hem i toktok plante taem moa long hem, gogo kasem en blong namba leven yia we King Jedekia, narafala pikinini blong King Josaea ya hem i king. Nao long namba faef manis* blong yia ya, ol man Babilonia oli tekemaot ol man Jerusalem,* oli go wok slef* long kantri blong olgeta.

4 Nao Profet Jeremaea i talem se, "Hae God i toktok long mi i talem se, 5 ‘Jeremaea. Taem mi mi no wokem yu yet long bel blong mama blong yu, be mi mi save yu finis. Mo taem yu yu no bon yet, be mi mi jusumaot yu, mo mi makemaot yu, mi mekem yu yu tabu, blong yu kam wan profet, blong yu talemaot tok blong mi long ol man blong olgeta kantri long wol.’

6 "Nao mi mi talem se, ‘Hae God. Yu yu Masta* blong mi. Mi mi no save toktok, from we mi mi yangfala nomo.’

7 "Be hem i talem se, ‘Yu no talem se yu yu yangfala nomo. Yu mas go long ol man we mi bambae mi sanem yu yu go long olgeta, mo yu mas talemaot olgeta samting we mi bambae mi talem long yu. 8 Yu no mas fraet long olgeta, from we mi bambae mi stap wetem yu blong blokemgud yu. Mi mi Hae God, mo hemia tok blong mi.’

9 "Nao hem i pusum han blong hem i kam, i tajem maot blong mi, nao i talem se, Yu luk. Naoia, mi mi givim tok blong mi long yu, blong yu go talemaot. 10 Tede, mi mi givim paoa long yu, blong yu save talemaot tok blong mi long ol king blong olgeta kantri, wetem ol haeman blong olgeta, mo ol narafala man blong olgeta. Bambae yu talem long olgeta, se mi bambae mi pulumaot olgeta long kantri blong olgeta, mi brebrekemdaon ol taon blong olgeta, mi spolem paoa blong olgeta, mo mi flatemgud olgeta, mo biaen, bambae mi wokemgud olgeta bakegen, mo mi stanemap olgeta, blong oli save kam strong bakegen.’ "

11 Nao Profet Jeremaea i talem se, "Hae God i soemaot wan vison* long mi, mo long vison ya hem i askem long mi se, ‘Jeremaea. ?Yu stap lukluk wanem samting?’

"Nao mi talem se, ‘Mi luk wan han blong tri ya amon.*’

12 "Mo hem i talem long mi se, ‘Hem nao. Mo mi mi stap lukluk*, blong mekem se tok ya we mi mi talem bambae i kamtru.’

13 "Nao hem i soemaot narafala vison long mi bakegen, mo i askem long mi se, ‘?Naoia, yu stap lukluk wanem samting?’

"Mo mi talem se, ‘Mi lukluk i go long not, mo mi luk wan sospen we i stap boel, mo klosap i kafsaed, i kam long ples ya.’

14 "Nao hem i talem se, ‘Wan bigfala trabol bambae i aot long not, i kam kavremap yufala evriwan we i stap long kantri ya, nao bambae i spolem yufala, olsem wota we i boel, we i kafsaed, i kavremap yufala. 15 Naoia mi stap singaot ol man blong ol kantri long not blong oli kam. Ol king blong olgeta bambae oli kam, oli stanemap jea blong olgeta stret long ol doa* blong bigfala stonwol blong taon ya Jerusalem,* mo olbaot raon long stonwol ya. Mo bambae oli stap hivap raon long ol taon blong Juda* tu. 16 Yufala i man blong mi, be bambae mi mi givim panis long yufala, from we yufala i mekem i no stret. Yufala i lego mi finis, mo yufala i stap mekem sakrefaes long ol narafala god ya we yufala nomo i wokem, mo yufala i stap mekem wosip long olgeta. 17 Be yu yu mas rere blong go talemaot ol tok we mi bambae mi talem long yu, blong olgeta man blong mi oli harem. Naoia yu no mas fraet long olgeta. Sipos yu fraet naoia, be bambae mi mi mekem yu yu fraet moa long fes blong olgeta. 18,19 Yu mas lesin gud long toktok ya. Ol king blong Juda, mo ol haeman, mo ol pris, mo olgeta man long ples ya, olgeta evriwan bambae oli stap tok agens long yu. Be naoia, mi mi givim paoa long yu, blong mekem yu yu stanap strong agens long olgeta. Bambae yu yu strong olsem wan taon we stonwol i goraon long hem, mo yu olsem pos we oli wokem long aean we i no save foldaon, mo yu olsem wol we oli wokem long bras, we enemi i no save spolem. Bambae oli no save winim yu, from we mi bambae mi stap wetem yu, mi blokemgud yu. Mi mi Hae God, mo hemia tok blong mi.’ "