1 ✝Nao bakegen, Hae God i givim tok blong hem long Profet Jeremaea, we i tok agens long ol man Amon, mo profet i talemaot we hem i talem se, "Ol man Amon. ?Yufala i ting se i no moa gat ol laen* blong Isrel* i stap? ?Yufala i ting se oli no moa gat pikinini blong holem graon blong olgeta? ?From wanem yufala ya we i stap mekem wosip long god ya Molek, yufala i kam holem graon ya we i blong ol laen blong Gad,* nao yufala i go stap long ol taon blong olgeta? 2 I gat taem i stap kam, we bambae mi mekem ol man Raba we i kaptel blong yufala, oli harem noes blong ol enemi blong yufala, we oli stap singsingaot bigwan blong faet agens long yufala. Taem faet ya i kamtru, bambae oli spolemgud taon ya, mo bambae oli bonem olgeta vilej raonabaot long hem. Nao bambae ol laen blong Isrel oli kam ronemaot yufala, oli holem ol graon blong olgeta bakegen. Mi mi Hae God, mo hemia tok blong mi.

3 "Ol man Hesbon. Yufala i mas krae bigwan, from we ol enemi oli spolem taon ya Eae finis. Ol woman Raba. Yufala i mas harem nogud, yufala i krae. Yufala i mas krae bigwan, yufala i putum ol rabis klos, mo yufala i resis olbaot blong soemaot we tingting blong yufala i lus. Yufala i mas harem nogud, from we god ya blong yufala Molek, ol enemi bambae oli karemaot hem i go long kantri blong olgeta. Mo bambae oli karemaot ol pris blong hem mo ol haeman blong yufala tu, oli go wok slef* long ples ya blong olgeta. 4 ?From wanem yufala i stap tok flas from ol gudgudfala graon blong yufala long medel blong ol hil? !Yufala i no bilif long mi nating! ?From wanem yufala i stap trastem ol gudgudfala samting blong yufala, nao yufala i stap talem se, ‘I no gat man nating i save kam faet agens long yumi’? 5 Mi bambae mi mekem ol man we oli stap raonabaot long yufala, oli mekem yufala i fraet we i fraet. Bambae oli ronemaot yufala i go wanwan, nao bambae i no moa gat man blong tekem yufala i kam wanples bakegen. 6 Be biaen, mi bambae mi mekem kantri ya blong yufala i kam gud bakegen. Mi mi Hae God, mo hemia tok blong mi."

7,8 ✝Nao bakegen, Hae God i givim tok blong hem long Profet Jeremaea, we i tok agens long ol man Edom, mo profet i talemaot we hem i talem se, "Ol man Edom. Yufala i laen blong Esao. ?Weswe? ?Fastaem yufala i gat hed, be naoia olsem wanem? ?Ol man ya we oli stap givim gudfala tok long yufala, oli no moa save givim advaes long yufala? ?Olsem wanem? ?Waes blong olgeta i finis? Ol man Dedan. I gud yufala i ronwe, yufala i go haed. Mi bambae mi spolemgud ol man Edom, from we taem i stap kam we mi bambae mi panisim olgeta. 9 Taem man i tekemaot ol grep* long plantesen blong hem, be hem i no save tekemaot evriwan. Mo taem man blong stil i go stil long naet, be hem i save stilim ol samting nomo we hem i wantem. 10 Be mi bambae mi flatemgud olgeta, we bambae i no moa gat wan i stap. Mo bambae mi spolem ol ples blong haed blong olgeta, mi mekem olgeta oli kam open ples, blong bambae oli no moa save haed. Bambae mi spolem olgeta gogo i no moa gat wan man nating i stap, we bambae i talem se, 11 ‘Olgeta ya we papa blong olgeta i ded, yufala i livim olgeta oli stap, mi bambae mi lukaot long olgeta. Mo ol wido blong yufala, oli save trastem mi.’*. 11 Olgeta ya we papa blong olgeta i ded, yufala i livim olgeta oli stap, mi bambae mi lukaot long olgeta. Mo ol wido blong yufala, oli save trastem mi.

12 "Ol man Edom. ?Sipos ol man we oli stret, oli mas kasem panis ya we mi bambae mi givim, yufala i ting se panis ya bambae i no save kasem yufala? !Nogat! Yufala evriwan i mas kasem panis ya. 13 Mi mi mekem strong tok finis long nem blong mi, se bigfala taon ya blong yufala Bojeraha, bambae i kam nogud olgeta, we man bambae i fraet blong luk. Bambae hem i kam olsem draeples, mo ol man bambae oli laf nogud long hem, mo bambae oli stap yusum nem blong hem blong singaot* trabol i kam long narafala man. Mo ol taon raonabaot long hem bambae mi mi spolemgud olgeta, we bambae oli stap nogud olsem gogo i no save finis. Mi mi Hae God, mo hemia tok blong mi."

14 Nao profet i gohed, i talemaot we Hae God i talem se, "Mi mi sanem wan man i kam blong karem tok blong mi, we hem i talemaot long ol kantri raonabaot, we oli mas tekem ol soldia blong olgeta oli kam wanples blong faet agens long yufala. 15 Mi bambae mi mekem yufala i no moa strong, mo bambae i no moa gat man i ona long yufala. 16 Yufala i praod tumas, mo yufala i ting se ol man oli fraet tru long yufala, be fasin ya blong yufala i trikimgud yufala. Yufala i stap mekem ples blong yufala insaed long ol hol long ston long klif, be nating we yufala i stap antap olgeta olsem pijin ya igel,* be mi bambae mi pulumdaon yufala. Mi mi Hae God, mo hemia tok blong mi.

17 "Bigfala trabol ya we bambae i kam kasem yufala, bambae i nogud we i nogud. Taem ol man oli pas long ples ya, mo oli luk, bambae oli fraet tumas, oli seksek from. 18 ✝Trabol we i spolemgud tufala taon ya Sodom mo Gomora bifo, wetem ol taon we oli stap raonabaot long tufala, bambae i mas kam kasem yufala. Bambae man i no moa save stap long ples ya bakegen samtaem. Mi mi Hae God, mo hemia tok blong mi. 19 Plante taem, laeon i aot long bus klosap long Jodan Reva, i wokbaot i kam long ples we ol sipsip oli stap kakae long hem, mo i ronem olgeta oli go wanwan. Mo long sem fasin, mi bambae mi kam, mo kwiktaem nomo, bambae mi mekem yufala i ronwe long kantri blong yufala. Nao biaen, man ya we mi mi jusumaot hem blong i lida, bambae hem i rul long kantri blong yufala. I no gat wan man nating we i sem mak wetem mi, mo i no gat man i save tekem mi mi go long kot. I no gat wan lida nating we i gat paoa blong faet agens long mi. 20 Yufala i lesin gud long plan ya we mi mekem agens long kantri ya blong yufala, mo long ol man blong taon ya Teman. Bambae ol enemi oli kam pulumaot ol pikinini blong yufala, oli karem olgeta i go. Nao olgeta man we oli luk, bambae oli fraet tumas, oli harem nogud from. 21 Taem ol enemi oli holem kantri blong yufala, bigfala noes blong hem bambae i mekem graon i seksek, mo olgeta we oli stap longwe long Red Si, bambae oli save harem noes blong yufala, we yufala i stap krae. 22 I no longtaem, ol enemi bambae oli kam kwiktaem nomo, oli holem taon ya Bojeraha, olsem bigfala pijin ya igel we i stap flae antap, nao i sut i kamdaon wantaem nomo blong holem kakae blong hem. Long dei ya, ol soldia blong yufala bambae oli harem nogud, oli fraet, olsem woman we klosap pikinini blong hem i bon."

23 ✝Nao bakegen, Hae God i givim tok blong hem long Profet Jeremaea, we i tok agens long ol man Damaskes, mo profet i talemaot we hem i talem se, "Ol man Damaskes. Ol man blong tufala taon ya blong yufala, Hamat mo Apad, bambae oli kasem wan badnius, nao bambae oli wari tumas, mo oli trabol bigwan. Bigfala fraet bambae i kasem olgeta olsem we bigfala solwota i kam kavremap olgeta, mo oli no save harem gud nating. 24 Bambae yufala i no moa gat paoa. Bambae yufala i ronwe, from we yufala i fraet we yufala i lusum hed. Bambae yufala i harem nogud tumas, olsem woman we klosap pikinini blong hem i bon, nao i stap harem nogud from. 25 Bigfala taon ya blong yufala, bifo nem blong hem i go kasem evri ples, mo oltaem yufala i stap harem gud, be bambae i no moa gat man long hem. 26 Long taem ya, ol yang man blong yufala we oli strong man blong faet, bambae ol enemi oli kilim olgeta evriwan oli ded olbaot long ol rod blong taon ya. 27 Mi bambae mi putum faea long stonwol blong taon ya, nao bambae i bonem ol strong ples blong haed blong King Benadad. Mi mi Hae God, mi gat olgeta paoa, mo hemia tok blong mi."

28 Nao bakegen, Hae God i givim tok blong hem long Profet Jeremaea, we i tok agens long ol laen blong Kedara, mo ol ples we oli stap aninit long ol man Hajoro*, mo profet i talemaot we hem i talem se, "Ol man Babilonia. Yufala i girap, yufala i kam mekem faet long ol laen long Kedara. Olgeta oli stap long saed i go long is, mo yufala i mas kam flatemgud olgeta. 29 Yufala i kam tekemaot ol haos tapolen blong olgeta, mo ol kaliko blong ol haos tapolen ya, wetem ol narafala samting blong olgeta, mo ol sipsip, mo ol nani, mo ol kamel blong olgeta, yufala i karem i blong yufala. Mo yufala i singsingaot long olgeta se, ‘Trabol i raonem yufala finis.’

30 "Ol man Hajoro. Mi mi talem strong long yufala, se yufala i mas ronwe, yufala i go haed. King Nebukadnesa blong Babilonia, hem i mekem plan blong kam mekem faet long yufala, mo hem i rere finis blong gohed long plan ya blong hem.

31 "Ol man Babilonia. Ol man ya, i no gat wan samting nating blong mekem olgeta oli fraet, olgeta oli stap gud nomo. Oli no gat stonwol i goraon long ol vilej blong olgeta blong blokem olgeta. Olgeta oli stap olgeta nomo, we oli no miksap wetem narafala man. Yufala i girap, yufala i kam mekem faet agens long olgeta. 32 Yufala i mas tekemaot ol kamel wetem ol narafala anamol blong olgeta i gowe long olgeta. Ol man ya oli stap katem hea* blong olgeta i sotsotfala, mo mi bambae mi ronemaot olgeta oli go wanwan olbaot long evri ples, mo long olgeta ples we oli go stap long hem, bambae mi letem bigfala trabol i kam kasem olgeta. 33 Ples ya Hajoro bambae i kam olsem draeples, mo bambae i stap olsem gogo i no save kam gud bakegen samtaem. Bambae hem i kam ples blong ol wael dog ya jakol,* mo bambae i no moa save gat man i stap long hem bakegen. Mi mi Hae God, mo hemia tok blong mi."

Nao biaen King Nebukadnesa blong Babilonia hem i kam mekem faet long olgeta, mo i winim olgeta.

34 Taem King Jedekia i kam king long Juda,* biaen i no longtaem, Hae God i givim tok blong hem long Profet Jeremaea we i tok agens long kantri ya Elam. 35 Mo profet i talemaot we Hae God i gat olgeta paoa mo hem i talem se, "Ol man Elam. Yufala we i man blong sut long bonara, yufala i paoa blong kantri ya, be bambae mi mi kilim yufala evriwan i ded. 36 Bambae mi mekem strong win i blu i kam long evri saed, blong i blu long yufala. Nao bambae mi ronemaot yufala gogo yufala i go stap long evri kantri, we bambae i no gat wan kantri long wol we yufala i no stap long hem. 37 Bambae mi mekem yufala i fraet long ol enemi ya blong yufala, we oli kam blong kilim yufala. Mi mi kros tumas long yufala, mo from samting ya, bambae mi mekem bigfala trabol i kam kasem yufala. Bambae mi sanem plante soldia oli kam faet agens long yufala, oli kilim yufala i ded we oli flatemgud yufala. 38 Bambae mi kilim ol king mo ol lida blong yufala oli ded, mo mi bambae mi tekem ples blong olgeta, mi rul long yufala. 39 Be i gat taem i stap kam, we mi bambae mi mekem kantri blong yufala i kam gud bakegen. Mi mi Hae God, mo hemia tok blong mi."