1 ✝Nao long namba fo yia we King Jehoeakim, we papa blong hem King Josaea i king blong Juda,* Hae God i toktok long Profet Jeremaea from ol man Juda. Hemia long fas yia we King Nebukadnesa i king blong Babilonia. 2 Nao profet i talem long ol man Jerusalem* wetem ol narafala man Juda se, 3 "Olgeta. Hae God i stap toktok long mi twanti tri yia finis, i stat long namba totin yia we King Josaea we papa blong hem King Amon i king blong Juda, i kam kasem tede. Mo oltaem, mi mi stap talemaot olgeta samting we hem i talem long mi, we mi no mestem nating, be yufala i no wantem harem tok blong hem. 4 Nating we hem i stap sanem ol profet we oli man blong wok blong hem, oli kam talemaot tok blong hem long yufala, be yufala i no wantem harem tok blong hem. 5 Oli stap talem long yufala, se yufala i mas tanem tingting blong yufala from ol rabis fasin we yufala i stap mekem, blong yufala i save stap long graon ya we hem i bin givim long ol bubu blong yufala bifo, blong yufala i save holem olwe. 6 Oli stap blokem yufala, blong yufala i no mekem wosip long ol narafala god, mo yufala i no mekem wok blong olgeta, mo blong yufala i no mekem Hae God i kros long fasin ya we yufala i wokem ol aedol, nao yufala i mekem wosip long olgeta. Oli stap talem se sipos yufala i obei long Hae God, bambae hem i no save panisim yufala. 7 Be hem i talemaot we yufala i no wantem lesin long hem. Yufala i girap, yufala mekem hem i kros tumas long yufala from ol aedol ya, nao yufala nomo i stamba blong panis ya we i kam kasem yufala.

8 "Nao from samting ya, Hae God we i gat olgeta paoa, hem i talem se, 9 ‘Bambae mi mi sanem tok i go long ol man blong olgeta kantri long not, mo long man ya blong wok blong mi King Nebukadnesa blong Babilonia, blong oli kam faet agens long yufala long Juda, mo blong oli faet tu agens long ol man blong ol kantri we oli stap raonabaot long yufala. Bambae mi mi spolem kantri blong yufala, wetem olgeta kantri we oli stap raonabaot long yufala, nao bambae oli kam nogud olgeta. Mo olgeta we bambae oli luk samting ya, bambae oli fraet gud long hem. 10 ✝Bambae mi mekem we yufala i no moa save singsing, mo yufala i no moa save singsingaot blong soemaot we yufala i glad tumas. Mo bambae mi mekem we i no moa gat ol lafet blong mared. Bambae yufala i no moa gat olifoel* blong laet blong yufala, mo bambae yufala i no moa gat kakae blong yufala tu. 11 ✝Olgeta samting long kantri ya bambae i kam nogud olgeta, mo man we i luk, bambae i sek gud from. Ol narafala kantri we oli stap raonabaot long yufala, bambae oli kam man blong wok blong king ya, gogo kasem seventi yia. 12 Mo biaen long taem ya, mi bambae mi panisim olgeta man long Babilonia wetem king blong olgeta, from ol sin blong olgeta. Bambae mi spolemgud kantri blong olgeta, nao bambae i kam nogud olgeta, mo bambae i stap olsem, gogo i no save finis. 13 Bambae mi letem ol bigbigfala trabol i kam kasem olgeta, olsem we mi talem long Profet Jeremaea, se bambae oli kam kasem ol naranarafala kantri, nao hem i talemaot long yufala, mo oli raetemdaon finis long buk ya. 14 Plante man blong ol narafala kantri wetem ol king blong olgeta bambae oli tekemaot olgeta, oli go wok slef* blong olgeta. Bambae mi mekem olsem long olgeta, blong givimbak ol samting ya we oli stap mekem long ol narafala man. Mi mi Hae God, mo hemia tok blong mi.*’ "

15 Nao Profet Jeremaea i talem se, "Olgeta. Yumi ol laen* blong Isrel,* mo Hae God i God blong yumi, mo hem i talem long mi se, ‘Kap waen ya we mi mi holem, i fulap gud, mo hem i saen blong kros blong mi. Yu mas tekem kap ya, yu go long evri kantri we mi bambae mi sanem yu yu go long hem, mo yu mekem ol man oli dring long hem. 16 Taem oli dring long hem finis, bambae oli stap wokbaot olbaot, olsem man we i drong, we hed blong hem i krangke. Bambae oli mekem olsem, from bigfala faet ya we bambae mi sanem i kam kasem olgeta.’

17 "Nao mi tekemaot kap ya long han blong hem, mi go givim long ol man blong olgeta kantri ya we hem i sanem mi mi go long olgeta, mo mi mekem olgeta evriwan oli dring long hem. 18 Mi mekem ol man Jerusalem* mo ol man blong ol narafala taon long Juda,* wetem ol king mo ol lida blong olgeta, olgeta evriwan oli dring long hem. Mi mekem olsem, blong ol ples blong olgeta oli kam nogud olgeta olsem draeples. Man we i luk samting ya, hem i fraet gud long hem, from we ol ples ya oli kam nogud we i nogud olgeta. Mo mi mekem olsem, blong ol man oli stap yusum nem blong olgeta blong singaot* trabol i kam long man, mo ol man oli stap mekem olsem yet, kam kasem tede.

19 "Mo ol narafala man we oli dring long kap ya, i gat king blong Ijip, mo ol haeman blong hem, mo ol lida blong ples ya, mo olgeta man Ijip 20 wetem ol strenja we oli stap long ples ya. Mo i gat olgeta king blong kantri ya Uj. Mo i gat olgeta king blong Filistia we oli king blong ol taon ya, Askelon, mo Gasa, mo Ekron, mo smol haf blong Asdod we i stap yet we ol enemi oli no bin spolem. 21 Mo i gat olgeta man Edom, mo ol man Moab, mo ol man Amon. 22 Mo i gat olgeta king blong Taea mo Saedon. Mo i gat olgeta king we oli stap rul long ol ples raonabaot long Mediterenian Si. 23 Mo i gat ol man blong ol taon ya Dedan, mo Tema, mo Bus. Mo i gat ol man ya we oli stap katem hea blong olgeta i sotsotfala. 24 Mo i gat olgeta king blong Arebia. Mo i gat olgeta king blong ol man we oli stap olbaot long draeples. 25 Mo i gat olgeta king blong Simri, mo Elam, mo Media. 26 Mo i gat olgeta king blong not, sam we oli stap longwe, mo sam we oli stap klosap. Olgeta ya wanwan oli dring long kap ya.

"Olgeta kantri we oli stap long wol ya, oli dring long kap ya, mo las man we bambae i dring long hem, king blong Babilonia.

27 "Nao Hae God i talem long mi se, ‘Mi mi Hae God, mi God blong yufala, mo mi gat olgeta paoa. Yu go talem long ol man ya we mi mi talem long olgeta, se oli mas dring long kap ya gogo oli fuldrong, mo oli traot, mo oli stap folfoldaon, we oli no moa save girap bakegen. Olgeta oli mas mekem olsem, from bigfala faet ya we mi bambae mi sanem i kam long olgeta. 28 Be sipos oli no wantem tekem kap ya blong dring long hem, yu mas talem long olgeta we mi talem se nating we oli no laekem, be bambae oli mas dring long hem. 29 Mi mi mas spolem ol taon ya, i stat long Jerusalem we i taon blong mi. ?Weswe? ?Ol man ya oli ting se bambae oli save ronwe long panis ya? !Nogat! Oli mas kasem panis, from we mi mas mekem olgeta man long wol ya oli mekem faet long olgeta bakegen. Mi mi Hae God, mi gat olgeta paoa, mo hemia tok blong mi.’

30 "Mo Hae God i talem long mi, blong mi talemaot olgeta tok blong hem long ol man. Hem i talem se,

‘Mi mi stap long heven

mo bambae mi singaot i kam,

mo voes blong mi

bambae i olsem tanda

we i finisim olgeta ples long skae.

Bambae mi singaot bigwan

agens long ol man blong mi.

Bambae mi singaot olsem man

we i purumpurumbut long ol grep*

blong wokem waen.

Taem mi mi tok,

bambae olgeta man long wol oli harem.

31 Voes blong mi

bambae i kasem olgeta ples long wol.

Olgeta kantri long wol ya,

be mi mi gat poen agens long olgeta.

Mi bambae mi jajem olgeta man,

mo olgeta we oli man nogud,

bambae oli ded long faet.

Mi mi Hae God,

mo hemia tok blong mi.’

32 " ‘I gat bigfala trabol i stap kam, we bambae i spolem olgeta kantri. I gat bigfala hariken i aot finis long narasaed wol, i stap kam blong spolem olgeta. 33 Long taem ya, ol dedbodi blong ol man ya we mi bambae mi kilim olgeta, bambae oli finisim olgeta ples long wol. Bambae i no moa gat man i stap blong krae from olgeta, mo blong berem olgeta. Bambae oli stap olbaot long graon nomo olsem sitsit blong buluk.

34 " ‘Ol lida. Yufala i man blong lukaot long ol man blong mi. Yufala i mas krae, we yufala i krae bigwan. Yufala i mas rol olbaot long asis faea, blong soemaot we yufala i harem nogud. Naoia, dei blong kilim yufala i kamtru finis. Ol enemi blong yufala bambae oli katkatem yufala long ol smosmol pis. Bambae yufala i kam olsem gudfala graonpot we i foldaon i smas, i kam nogud olgeta. 35 Bambae yufala i no gat rod nating blong ronwe long panis ya. 36,37 Yufala i mas harem nogud, yufala i mas krae, from we mi mi kros tumas long yufala, mi stap spolemgud yufala. Kantri blong yufala we fastaem yufala i stap gud long hem, yufala i gat pis, be naoia mi mi stap spolemgud. 38 Yufala i man blong mi, be mi mi lego yufala finis, stret olsem we laeon i aot long hol blong hem long ston, i go. Mi mi kros we mi kros long yufala, nao mi letem bigfala faet ya we i nogud we i nogud, i kam kasem yufala, nao i spolem kantri ya blong yufala, i mekem i kam olsem draeples.’ "