1 ✝Nao Profet Jeremaea i talemaot we Hae God i talem long hem se, "Jeremaea. Nating we sipos Moses mo Samuel, tufala man ya blong wok blong mi bifo, tufala i kam stanap long fes blong mi, tufala i krae long mi from olgeta ya, be bambae mi no save sore long olgeta nating. Yu ronemaot olgeta oli gowe long fes blong mi. Mi mi no wantem luk olgeta. 2 ✝Sipos oli kam askem long yu se, ‘?Bambae mifala i go wea?’, bambae yu talemaot long olgeta we mi mi talem se,

‘Sam long yufala we mi makemaot

se bambae oli ded long bigfala sik,

hemia nao ples we bambae oli go long hem.

Mo sam long yufala we mi makemaot

se bambae oli ded long faet,

hemia nao ples we bambae oli go long hem.

Mo sam long yufala we mi makemaot

se bambae oli hanggri gogo oli ded from,

hemia nao ples we bambae oli go long hem.

Mo sam long yufala we mi makemaot

se ol enemi bambae oli kam tekemaot olgeta,

oli go wok slef* long narafala kantri.

Hemia nao ples we bambae oli go long hem.’

3 Mi mi makem fo samting finis we oli nogud olgeta we bambae oli kam kasem yufala. Faswan, ol enemi bambae oli kam faet long yufala, oli kilim yufala. Mo sekenwan, ol dog bambae oli kam pulum ol dedbodi blong yufala i go olbaot. Mo namba tri, ol pijin bambae oli kakae ol dedbodi blong yufala. Mo laswan, ol dedbodi we oli stap, ol wael anamol bambae oli kam kakae olgeta. 4 ✝Bambae mi mi mekem olgeta man long wol ya oli fraet, oli harem nogud tumas long ol samting ya we bambae i kasem yufala. Be bambae ol samting ya i kasem yufala olsem, from ol rabis fasin ya we King Manase, we papa blong hem Hesekia, hem i bin mekem bifo long Jerusalem,* long taem ya we hem i king blong kantri ya.

5 "Ol man Jerusalem.

?Hu bambae i sore long yufala?

?Hu nao bambae i krae from yufala?

Bambae i no gat man i gat taem

blong askem long yufala se,

‘?Olsem wanem long yufala?’

6 Yufala i lego mi finis,

mo yufala i tanem baksaed finis long mi.

Naoia mi no moa save sore long yufala,

mi taed gud long yufala,

nao mi mi leftemap han blong mi,

mi flatemgud yufala.

7 Long ol taon blong yufala,

mi mi sakemaot yufala i go wanwan olbaot,

olsem we man i sakem wit* i go antap

blong win i blu long hem,

i karemaot doti blong hem i go.

Yufala ol man blong mi,

be mi mi spolemgud yufala,

mo mi kilim ol pikinini blong yufala oli ded,

from we yufala i no lego ol rabis fasin ya

we yufala i stap mekem.

8 Ol wido long kantri blong yufala

oli plante we plante,

i winim sanbij long solwota.

Ol yangfala blong yufala

we oli strong man yet,

be mi letem ol enemi oli kilim olgeta oli ded

long medel dei nomo,

mi mekem we ol mama blong olgeta

oli harem nogud tumas.

Mi mi spolem olgeta wantaem nomo

long wan trabol we i nogud we i nogud.

9 Woman we i gat seven pikinini blong hem,

fastaem hem i stap harem gud,

be naoia hem i lusum olgeta evriwan.

Nao hem i stap harem nogud,

gogo i hafded from,

mo i stap traehad

blong pulum win blong hem bakegen.

Bambae hem i sem,

mo nem blong hem bambae i kam nogud

long fes blong ol man.

Mo yufala we i stap laef yet,

mi bambae mi letem

ol enemi blong yufala oli kam kilim

yufala evriwan i ded.

Mi mi Hae God,

mo hemia tok blong mi."

10 Nao Profet Jeremaea i talem se, "Mi mi harem nogud tumas. ?From wanem mama blong mi i bonem mi? Oltaem nomo, mi mi stap rao, mo mi stap tok kros long olgeta man we oli stap long ples ya. Mi mi no stap givim mane samtaem i go long narafala man, se bambae hem i pembak long mi, mo neva mi tekem mane long narafala man samtaem, blong mi pembak biaen. Be olgeta man oli stap singaot* trabol i kam long mi. 11 Hae God, sipos mi mi no stap mekem i gud long ol man, plis yu letem trabol ya we oli stap singaot i kam long mi, i kam kasem mi. Mo sipos mi mi no stap krae i kam long yu blong yu givhan long ol enemi blong mi we oli stap long bigfala trabol, oli stap harem nogud, i gud yu letem ol tok blong olgeta ya i kam kasem mi."

12 Nao profet i talemaot we Hae God i talem se, "I no gat man i save brekem aean, mo i strong moa blong brekem aean blong not we i miks wetem bras.* 12 I no gat man i save brekem aean, mo i strong moa blong brekem aean blong not we i miks wetem bras." 13 Mi bambae mi sanem ol enemi i kam, blong oli tekemaot ol gudgudfala samting blong yufala, wetem ol samting we oli mekem yufala i rijman, oli karem i blong olgeta. Bambae mi mekem olsem blong panisim yufala from ol sin blong yufala, we yufala i stap mekem long olgeta ples long kantri ya. 14 Bambae mi mekem yufala i go mekem ol wok blong ol enemi blong yufala, long wan kantri we yufala i no save nating. Bambae mi mekem olsem, from we mi mi kros tumas long yufala, mo kros blong mi bambae i stap gogo i no save finis."

15 Nao profet i talem long Hae God se, "Hae God, yu yu savegud ol samting ya we i kasem mi. Olgeta ya we oli stap ronem mi, klosap oli kilim mi mi ded. Plis yu tingbaot mi, yu givhan long mi, yu panisim olgeta from rabis fasin ya blong olgeta. Plis yu no wet gogo oli kilim mi mi ded. Yu no fogetem we olgeta oli stap tok nogud long mi, from we mi mi man blong wok blong yu. 16 Hae God. Yu yu God blong mi, mo yu gat olgeta paoa. Mi mi man blong wok blong yu. Taem yu toktok long mi, mi lesin gud long tok blong yu, mo oltaem, tok ya blong yu i mekem mi mi harem gud, mi glad we mi glad. 17 Mi mi no stap go joen wetem ol narafala man we oli stap harem gud, oli stap laf. Be oltaem, mi stap obei long ol tok blong yu, nao mi go stap mi wan nomo, mo yu yu mekem we mi tu mi kros long olgeta. 18 ?From wanem mi mi stap harem nogud olsem? ?From wanem ol trabol blong mi oli olsem soa we i no save finis? ?From wanem mi no save harem gud bakegen? Ating yu wantem nomo blong mekem tingting blong mi i foldaon, olsem man we i go long krik blong kasem wota, be i luk we i drae, nao tingting blong hem i foldaon olgeta."

19 Nao Hae God i talem se, "Sipos yu yu tanem tingting blong yu, nao yu kambak long mi bakegen, bambae mi tekem yu yu kam man blong wok blong mi bakegen. Mo sipos yu lego fasin ya we yu stap toktok olbaot nomo, nao yu stap talem ol gudfala toktok, bambae yu save talemaot tok blong mi bakegen. Mo bambae yu no moa save go luk ol man, bambae olgeta nomo oli stap kam luk yu. 20 Bambae mi mi mekem yu yu stanap strong long medel blong ol man ya, olsem wan strong wol we oli wokem long bras. Taem oli faet agens long yu, be bambae oli no save winim yu, from we mi bambae mi stap wetem yu blong mi blokemgud yu, mi sevem yu. 21 Mi bambae mi tekemaot yu long paoa blong ol man nogud, mo ol man blong mekem faet. Mi mi Hae God, mo hemia tok blong mi."