1 ✝Be long namba seven manis* blong sem yia ya, Ismael i tekem ten man, nao oli go long Mispa blong luk Gedalia. Ismael ya, papa blong hem Netania, mo bubu blong hem Elisama, mo hem i wan famle blong king, mo i wan haeman blong hem. Nao taem Ismael mo Gedalia olgeta oli stap kakae wanples long Mispa, 2 Ismael wetem ol man ya blong hem oli girap, oli tekem naef blong faet blong olgeta, oli kilim Gedalia i ded. 3 Mo oli kilim ol man Juda we oli stap wetem hem long Mispa, mo oli kilim ol soldia blong Babilonia tu we oli stap long ples ya.

4,5 Nao long nekis dei, i gat eiti man i kamtru. Ol man ya oli aot long Sekem, mo Silo, mo Sameria* oli kam, mo oli karem ol wit* mo insens,* blong go long haos* blong Hae God blong mekem wosip. Olgeta ya oli sevem ol mustas blong olgeta, mo oli brebrekem ol klos blong olgeta, mo oli katkatem bodi blong olgeta, blong soemaot we oli harem nogud tumas. Be long taem ya, i no gat man i save yet se Gedalia i ded. 6 Nao Ismael i aot long Mispa, i go blong mitim olgeta ya. Taem hem i stap wokbaot i go, hem i stap krae, mo taem hem i kam kasem olgeta, hem i talem long olgeta se, "Plis yufala i kam luk Gedalia." 7 Be taem olgeta i kam insaed long taon ya, Ismael wetem ol man blong hem oli kilim olgeta i ded, mo oli sakem ol dedbodi blong olgeta i go insaed long wan wel.

8 Be i gat ten man long olgeta ya oli talem long Ismael se, "Plis yu no kilim mifala. Mifala i gat ol wit, mo bale,* mo ol olifoel,* mo eg blong sugabag,* mifala i haedem olgeta long garen longwe." Nao hem i no moa kilim olgeta, i letem olgeta i go fri. 9 Wel ya we Ismael i sakem ol dedbodi blong ol man ya i go long hem, i bigwan we i bigwan, taswe hem i fulumap ol dedbodi blong ol man ya long hem. Wel ya, King Asa bifo i bin digim long taem ya we King Bahasa, king blong Isrel,* i bin kam faet agens long hem.* we King Bahasa, king blong Isrel i kam faet agens long hem. Nao hem i fulumap ol dedbodi blong ol man ya long hem. 10 Ol dota blong king mo ol narafala man long Mispa, we Nebusaradan, komanda blong ol soldia blong Babilonia i bin putum olgeta long han blong Gedalia, Ismael i holem olgeta evriwan, mo i fosem olgeta blong oli go wetem hem, nao oli aot blong go long kantri ya Amon.

11 Be taem Johanan wetem ol kapten blong ol soldia blong hem oli harem nius blong ol samting ya we Ismael i mekem, 12 olgeta oli girap, oli ronem hem, gogo oli kasem hem klosap long bigfala raonwota ya long Gibeon. 13 Nao taem olgeta ya we Ismael i bin tekemaot olgeta, oli luk we Johanan olgeta oli kamtru, oli harem gud tumas, 14 mo oli tanemraon, oli resis i go long olgeta. 15 Be Ismael wetem eit man blong hem oli ronwe long Johanan, oli go haed long Amon.

16 Nao Johanan olgeta oli tekem ol soldia, mo ol woman wetem ol pikinini, mo ol haeman* blong king, oli kambak. Hemia olgeta ya we Ismael i holem olgeta long Mispa, biaen long taem ya we hem i kilim Gedalia i ded. 17,18 Olgeta ya oli fraet tumas long ol man Babilonia, from we Ismael i kilim Gedalia, we king blong Babilonia i bin putumap hem blong i distrikejen* long ples ya. Nao oli girap, oli ronwe blong go long Ijip, be taem oli stap go, oli go stap fastaem long wan ples klosap long Betlehem, we nem blong hem Kimam.