1 ✝Nao long namba ten yia we King Jedekia i stap rul long Juda,* Hae God i toktok long Profet Jeremaea bakegen. Yia ya i namba eitin yia we King Nebukadnesa i rul long Babilonia, 2 mo long taem ya, ol soldia blong hem oli kam hivap raon long Jerusalem* blong mekem faet long hem. Long taem ya, profet i stap kalabus long yad blong haos blong King Jedekia, 3 from we hem i stap talemaot ol tok we Hae God i stap talem long hem, we i agens long king ya. Hem i bin talemaot we Hae God i talem se, "!Ol laen* blong Isrel*! Bambae mi mi letem King blong Babilonia i kam holem taon ya i blong hem, 4 mo long taem ya, King Jedekia ya bambae i no save ronwe. Bambae mi mi putum hem long han blong king ya, nao bambae hem i luk king ya stret long ae blong hem, mo bambae i toktok wetem hem. 5 Mo bambae king ya i tekem hem i go long Babilonia, mo bambae hem i stap long ples ya, gogo kasem taem we bambae mi mi jajem hem. Nating we bambae hem i faet agens long ol man Babilonia, be bambae hem i no save win. Mi mi Hae God, mo hemia tok blong mi."

6 Nao long taem ya, Hae God i talem tok blong hem long profet ya, mo hem i talemaot we Hae God i talem long hem se, 7 "Jeremaea. Hanamel ya we papa blong hem Salum, we i brata blong papa blong yu, hem bambae i kam luk yu, blong talem long yu, se sipos yu wantem pemaot graon blong hem we i stap long distrik ya Benjamin,* long taon ya Anatot, bambae yu save tekem i blong yu. Hem bambae i kam luk yu olsem, from we yu yu wan famle blong hem, we yu klosap moa long hem, mo yu yu gat raet blong pemaot graon ya."

8 Mo profet i talem se, "Nao i no longtaem, Hanamel ya i kam luk mi long yad blong haos blong king, stret olsem we Hae God i talem, mo i askem long mi blong mi pemaot graon ya blong hem, i blong mi. Hemia i mekem mi mi savegud se Hae God nomo ya we i toktok long mi. 9 Nao mi pemaot graon ya long hem long silva we mi skelemgud. Praes blong hem, eit taosen faef handred* vatu.* 10,11 Long taem ya, mi saenem wan pepa we i gat ol toktok blong graon i stap long hem, wetem narawan we i kopi blong hem, mo mi tekem ol man i kam blong oli witnes long nem blong mi, nao mi putum mak blong mi long faswan ya blong soemaot se i tru, mo mi rolemapgud, mo mi fasemtaet blong i save stap longtaem. Nao mi tekem tufala pepa ya, 12 mo mi singaot Baruk we papa blong hem Neria, mo we bubu blong hem Mahasea, blong i kam. Nao long fes blong Hanamel, mo long fes blong ol witnes ya we oli saen long tufala pepa ya, mo long fes blong ol man we oli stap sidaon long yad ya blong haos blong king, mi givim tufala pepa ya long hem. 13 Mo stret long fes blong olgeta, mi talem long hem se, 14 ‘Hae God ya we i gat olgeta paoa, hem i God blong yumi, mo hem i talem se yu mas tekem tufala pepa ya, yu go fulumap long wan graonpot* we i naf blong holem tufala, blong bambae tufala i save stap longtaem. 15 Naoia ol man oli no glad blong pem graon, be hem i talem se long kantri ya blong yumi, i gat taem i stap kam we ol man bambae oli stap pem ol haos, mo bambae oli stap pem ol graon blong garen, mo bambae oli stap pem ol plantesen blong rop ya grep* bakegen.’ "

16 Nao Profet Jeremaea i talem se, "Taem mi givim tufala pepa ya finis long Baruk, mi mi prea se, 17 ‘Hae God. Yu yu Masta* blong mifala. Long bigfala paoa long yu, yu yu mekem wol ya, wetem skae mo olgeta samting we i stap long hem. I no gat wan samting nating we i strong tumas we yu yu no save mekem. 18 Fasin blong yu, oltaem yu yu stap lavem man, mo yu stap mekem olsem long plante taosen man. Be long semtaem, yu stap givim panis tu long ol man from ol sin blong ol olfala blong olgeta. Yu yu Hae God, we nem blong yu i hae we i hae, mo yu yu gat olgeta paoa. 19 Ol plan blong yu oli waes tumas, mo yu yu stap mekem plante bigbigfala samting. Oltaem, yu stap luk olgeta samting we ol man oli stap mekem, mo yu stap givim pei long olgeta, stret long mak blong ol samting ya we oli stap mekem. 20 Bifo, long taem ya we ol olfala blong mifala oli stap long Ijip, yu yu stap mekem ol merikel, mo ol bigbigfala wok long ples ya. Mo yu stap mekem ol samting ya kam kasem tede, long fes blong mifala ya we i laen* blong Isrel,* mo long fes blong ol man blong ol narafala kantri. Nao from samting ya, olgeta man blong evri ples oli save nem blong yu. 21 Ol olfala bubu blong mifala bifo oli man blong yu, mo taem yu tekem olgeta oli aot long Ijip, oli kam, yu yusum bigfala paoa ya blong yu blong mekem ol merikel olsem, nao long fasin ya, yu mekem ol enemi blong olgeta oli fraet we oli seksek gud. 22 Kantri ya we mifala i stap long hem i gud tumas, i gat fulap kakae long hem, mo yu yu givim kantri ya long ol bubu ya blong mifala, stret olsem we yu bin promes* long ol bubu blong olgeta bifo. 23 Olgeta oli kamtru long kantri ya, mo oli holem i blong olgeta, be olgeta we oli kamaot biaen long olgeta, oli no obei nating long tok blong yu, mo oli no folem ol loa we yu yu putum, olsem we yu yu talem long ol bubu blong mifala. Mo from we olgeta oli mekem olsem, yu yu tekem bigfala trabol ya i kam kasem mifala ya we i kamaot biaen long olgeta.

24,25 " ‘Ol man Babilonia oli kam finis, oli stap hivimap graon raon long bigfala stonwol blong taon ya, blong oli stanap long hem blong sut i kam insaed. Nao ol hadtaem we bambae mifala i kasem from faet, mo from we i no gat kakae, mo from ol bigbigfala sik, bambae oli spolem mifala, nao ol enemi ya bambae oli winim mifala.

" ‘Hae God. Yu yu Masta blong mifala. Ol samting ya we yu yu talem bifo finis, naoia yu save luk we oli stap kamtru. Klosap yu letem ol man Babilonia oli kam holem taon ya, be yu nao yu talem long mi, se mi mas pem pis graon ya, mo mi mas stretem ol bisnes blong hem long fes blong plante witnes.’

26 "Nao Hae God i talem long mi se, 27 ‘Mi mi Hae God, mi God blong olgeta man, mo i no gat wan samting we i strong tumas, we mi mi no save mekem. 28 ✝Bambae mi givim taon ya i go long han blong King Nebukadnesa wetem ol soldia blong hem. Olgeta ya bambae oli kam holem taon ya, 29 mo bambae oli bonem ples ya wetem olgeta samting we i stap long hem. Ol haos ya we ol man oli wokem olta long ruf* blong olgeta, blong bonem insens* blong mekem prea long god ya Bal,* mo blong kafsaedem waen blong givim i go long ol narafala god, oli mekem mi mi kros tumas. Be ol man Babilonia ya bambae oli bonemdaon olgeta. 30 I stat bifo we bifo olgeta, oltaem nomo, ol fasin ya blong ol man Isrel mo ol man Juda* oli stap mekem mi mi harem nogud tumas. 31 I stat long taem ya we ol olfala blong yufala bifo oli wokem taon ya, ol man blong ples ya oli stap mekem mi mi kros we mi kros. Nao mi mekem plan se bambae mi mas spolem taon ya, 32 from ol rabis fasin ya we yufala wetem ol narafala man Juda, mo ol king blong yufala, mo ol lida blong yufala, mo ol pris* blong yufala mo ol profet blong yufala, yufala evriwan i stap mekem. 33 Yufala ya, yufala i tanem baksaed finis long mi. Nating we mi mi stap tijim yufala oltaem, be yufala i no save lesin long mi, mo yufala i no save lan nating. 34 ✝Ol aedol blong yufala oli nogud we i nogud, be yufala i girap, yufala i go putum olgeta long haos blong mi, nao oli mekem haos ya i no moa tabu, i doti long fes blong mi. 35 ✝Yufala i go stanemap wan olta blong god ya Bal long krik ya Hinom, mo yufala i stap kilim ol boe mo gel blong yufala, yufala i stap bonem olgeta blong mekem sakrefaes long god ya Molek. Be mi mi no talem long yufala blong yufala i mekem olsem. Mi mi no tingbaot nating se bambae yufala i save mekem ol rabis samting ya, we oli stap pulum ol man ples blong yufala oli foldaon long sin.’ "

36 Nao Profet Jeremaea i talemaot long ol laen* blong Isrel* we Hae God we i God blong olgeta, hem i talem long hem se, "Jeremaea. Ol man oli stap talem se faet, wetem hadtaem blong kasem kakae, mo ol bigbigfala sik bambae i kam kasem ples ya, mo king blong Babilonia bambae i holem taon ya. Be naoia, mi wantem blong yu lesin gud long wan narafala tok we mi mi wantem talem. 37 Naoia, mi mi kros we mi kros tumas long yufala, mo bambae mi ronemaot yufala i go stap long ol narafala kantri, be biaen, bambae mi tekem ol pikinini blong yufala oli kambak long ples ya, nao bambae oli stap gud long ples ya bakegen. 38 Long taem ya, olgeta bambae oli man blong mi, mo mi bambae mi God blong olgeta. 39 Mo bambae mi mi givim wan tingting nomo long olgeta. Bambae olgeta evriwan oli wantem tumas blong oli ona long mi oltaem long laef blong olgeta, blong olgeta oli save stap gud, mo blong ol pikinini we oli kamaot biaen long olgeta, bambae olgeta tu oli save stap gud. 40 Long taem ya, bambae mi mi mekem wan promes* wetem olgeta, we bambae i stap oltaem, gogo i no save finis. Oltaem, bambae mi mi stap mekem i gud long olgeta, mo bambae mi stap mekem olgeta oli tinghevi long mi, oli ona long mi long olgeta tingting blong olgeta, blong bambae oli no save tanem baksaed long mi samtaem. 41 Oltaem, bambae mi mi glad nomo blong mekem i gud long olgeta, mo tingting blong mi bambae i stap strong long olgeta, blong mi putum olgeta oli stap oltaem long kantri ya, we neva bambae oli gowe bakegen long hem samtaem.

42 "Naoia, mi mi stap tekem trabol ya i kam kasem yufala, be long sem fasin, bambae mi stap givim ol gudgudfala samting i go long olgeta we bambae oli kamaot biaen long yufala, stret olsem we mi mi promes long yufala. 43 Naoia, ol man oli stap talem se kantri ya bambae i kam wan rabis ples, we ol man mo ol anamol oli no moa save stap long hem, nao biaen, ol man Babilonia bambae oli kam holem i blong olgeta. Be bambae i no olsem. Ol man we oli stap kamaot biaen long yufala, bambae oli stap pem graon bakegen long ples ya. 44 Bambae olgeta oli stap pem graon, mo bambae oli saenem ol pepa blong hem, mo bambae oli putum mak blong olgeta long ol pepa ya blong soemaot se oli tru, mo ol man we oli witnes blong olgeta, olgeta tu bambae oli saen. Long distrik ya Benjamin,* mo long ol vilej raonabaot long Jerusalem,* mo long ol taon long Juda,* mo long ol taon long ples blong hil, mo long ol taon long botom blong ol hil, mo long ol taon long haf blong Juda long saot, bambae olgeta oli stap mekem olsem. Bambae mi mi mekem olgeta ya oli stap gud bakegen long stret ples blong olgeta. Mi mi Hae God, mo hemia tok blong mi."