1,2 Bakegen Profet Jeremaea i talem se, "Olgeta. Yumi ol laen* blong Isrel,* mo Hae God i God blong yumi, mo hem i tok agens long ol lida we wok blong olgeta i blong lukaot long ol man blong hem. Hem i talem se, ‘!Ol lida! !Sore tumas long yufala! !Yufala i stap spolem ol man blong mi! Yufala i no stap lukaot gud nating long ol man blong mi, yufala i stap ronemaot olgeta, yufala i mekem olgeta oli go olbaot long evri ples. Mi bambae mi givim panis long yufala we i nogud we i nogud, from ol rabis fasin ya we yufala i stap mekem. Mi mi Hae God, mo hemia tok blong mi.

3 " ‘Be ol narafala man blong mi we mi letem olgeta oli stap olbaot long ol narafala kantri, mi bambae mi tekem olgeta oli kam wanples, mo bambae mi tekem olgeta i kambak long stret ples blong olgeta bakegen. Nao long ples ya, bambae olgeta oli stap gud, oli gat ol pikinini blong olgeta, mo bambae oli kam plante bakegen. 4 Mo bambae mi mi jusumaot sam lida blong olgeta, blong oli stap lukaot long olgeta. Nao ol man blong mi bambae oli no moa save fraet, mo tingting blong olgeta i no moa save foldaon. Mo bambae i no gat wan long olgeta i lus.* i olsem. Mo bambae mi mi no moa save panisim olgeta bakegen. Mi mi Hae God, mo hemia tok blong mi.’

5 ✝" ‘Ol man Juda.* I gat taem i stap kam, we mi bambae mi jusumaot wan king we fasin blong hem i stret olgeta. Hem bambae i kamaot biaen long King Deved ya bifo, mo bambae hem i waes, mo i jajem ol man long stret fasin. 6 Taem hem i kam king, bambae yufala i stap gud, yufala i gat pis. Mo nem blong hem, bambae oli talem se "Hae God i Stamba blong Stret Fasin blong Yumi."

7 " ‘I gat dei i stap kam we man bambae i no moa talem se, "Hae God i laef, i stap we i stap, mo long fes blong hem, mi mi talem tru long yufala, se hem nao i tekemaot ol bubu blong yumi long Ijip bifo." 8 Bambae man i talem se, "Hae God i laef, i stap we i stap, mo long fes blong hem, mi mi talem tru long yufala, se hem nao i tekemaot ol man blong hem long kantri ya long not, mo long ol narafala kantri we hem i mekem olgeta oli go stap olbaot long hem, nao i tekem olgeta oli kambak long kantri blong yumi bakegen." Mo bambae oli stap gud long kantri ya blong yufala.’ "

9 Nao Profet Jeremaea i talem se,

"Olgeta.

Mi mi harem nogud tumas,

tingting blong mi i foldaon olgeta,

mo mi seksek tumas from.

Taem mi stap tingbaot Hae God,

mo tabu tok blong hem,

mi harem se mi no moa save stanap,

mi olsem man we i dring waen

gogo i fuldrong long hem.

10 Mi mi harem olsem,

from we olgeta ples long wol ya

i fulap gud long ol man

we tingting blong olgeta

i no stap strong nating long Hae God.

Laef blong olgeta i no stret nating,

mo oli stap yusum paoa blong olgeta

long ol fasin we i no stret.

Hae God i putum strong tok blong hem finis long graon ya,

nao from samting ya,

i no gat wan samting i save gru,

ol gudfala gras oli drae evriwan."

11 Nao profet i talemaot we Hae God i tok agens long ol profet, i talem se,

"!Ol profet mo ol pris*!

!Yufala i no save mi nating!

!Mi mi faenemaot yufala finis!

Yufala i stap mekem ol rabis fasin

long haos* blong mi stret.

12 Ol rod we yufala i stap wokbaot long hem,

bambae oli tudak olgeta,

mo bambae oli glis we i glis.

Bambae mi mi mekem yufala i stambol,

yufala i foldaon.

Mo mi bambae mi letem

bigfala trabol i kam kasem yufala.

Mi mi makem wan dei finis

we bambae mi panisim yufala long hem.

Mi mi Hae God,

mo hemia tok blong mi.

13 "Mi mi luk finis

ol sin blong ol profet blong Sameria.*

Bifo, oli stap talemaot tok blong olgeta

long nem blong god ya Bal,*

mo oli stap lidim ol man blong mi

oli go long rod blong lus.

14 ✝Be mi luk we yufala ol profet long Jerusalem*

yufala i mekem ol samting we i nogud moa,

winim ol narafala profet ya.

Yufala i stap mekem fasin nogud wetem woman,

mo yufala i stap giaman olwe.

Yufala i stap givhan long ol man,

blong oli mekem ol samting nogud,

nao ol man ya oli no lego

ol rabis fasin ya we oli stap mekem.

Mi mi luk finis we fasin blong yufala

i no stret nating,

yufala i sem mak nomo

long ol man Sodom mo ol man Gomora bifo.

15 "Mi mi Hae God,

mi gat olgeta paoa,

mo from ol samting ya

we yufala ol profet i stap mekem,

mi mi talem long yufala

se bambae mi mi tekem ol kakae we i konkon,

mi givim long yufala

blong yufala i kakae,

mo bambae mi givim wota

we i gat posen long hem

blong yufala i dring.

Bambae mi mekem olsem,

from we yufala i mekem ples i fulap gud

long ol rabis fasin blong yufala."

16 Mo profet i talem se, "Ol man Jerusalem. Hae God i gat olgeta paoa, mo hem i talem long yufala se, ‘Yufala i no mas lesin long ol tok blong ol profet ya. Oli stap talem ol giaman toktok long yufala, nao yufala i putum tingting blong yufala i stap strong long hem. Be ol samting we oli stap talem long yufala, oli kamaot long hed blong olgeta nomo, mi mi no givim long olgeta. 17 Oli stap switim olgeta ya we oli no wantem harem mi se, "Evri samting bambae i oraet nomo long yufala." Mo oli stap toktok long olgeta ya we oli stronghed, oli wantem folem tingting blong olgeta nomo, oli talem se, "Bambae trabol i no save kasem yufala." Be olgeta ya oli giaman nomo.’

18 "Ol profet ya oli no save nating tingting blong Hae God. I no gat wan long olgeta nating we hem i harem save mining blong toktok blong hem, no i glad blong folem ol samting we hem i talemaot. 19 Hae God i kros tumas long olgeta ya we fasin blong olgeta i no stret. Kros blong hem i strong tumas, i olsem solwota we i raf, mo i strong olsem hariken. 20 Bambae kros ya blong hem i stap gogo kasem we hem i finisim olgeta samting we hem i wantem mekem. Mo i gat taem i stap kam we bambae yufala i savegud mining blong ol samting ya.

21 "Mo Hae God i talem se, ‘Ol profet ya, mi mi no sanem olgeta, oli jes go long tingting blong olgeta nomo. Mi mi no givim tok long olgeta blong oli kam talemaot, olgeta oli stap talemaot tok blong olgeta nomo long nem blong mi. 22 Sipos oli save tingting blong mi, bambae oli save talemaot ol tok blong mi long ol man blong mi, nao bambae olgeta ya oli save tanem tingting blong olgeta from ol sin blong olgeta, mo oli save lego ol rabis fasin blong olgeta.

23 " ‘Mi mi no olsem ol god ya we oli save stap long wan ples nomo, mi mi save stap long evri ples wantaem. 24 I no gat man i save haed, we mi mi no save luk hem. Yufala i mas save se long olgeta ples long heven mo long wol ya, be mi mi stap long hem. 25 Olgeta samting we ol profet ya oli stap talem, be mi mi save evriwan finis. Oli stap yusum nem blong mi blong talem ol giaman toktok, mo oli stap giaman se mi mi stap toktok long olgeta long ol drim blong olgeta. 26 Ol profet ya oli stap giaman long ol man blong mi long ol samting ya we olgeta nomo oli talem. ?Be bambae oli stap mekem olsem gogo kasem wetaem? 27 Oli stap ting se ol drim ya blong olgeta we oli stap talemaot long ol man blong mi, bambae i mekem olgeta oli fogetem mi, olsem we ol bubu blong olgeta bifo oli fogetem mi, nao oli go mekem wosip long god ya Bal. 28 Sipos wan profet i drim, hem i mas talem se samting ya i drim nomo. Be profet we i harem tok blong mi, hem i mas go talemaot stret tok ya, we mi mi givim long hem. ?Kakae blong wit* mo stik blong hem, be wanem i gud moa? ?Stik blong hem, no kakae blong hem? 29 Tok blong mi i olsem faea, mo i olsem bigfala lamas we i save brebrekem ol bigbigfala ston long ol smosmol pis. 30 Mi mi Hae God, mo yufala i man blong mi. Mo from samting ya, yufala i mas lesin gud long tok blong mi. Mi mi agens long ol profet ya we wan i harem tok blong narawan, wan i harem tok blong narawan, nao oli go stap taltalemaot ol tok ya, se i tok blong mi. 31 Olgeta ya oli stap talemaot tok blong olgeta nomo, be oli stap talem se i tok blong mi. 32 Mo oli stap talemaot ol drim blong olgeta we i fulap long ol giaman toktok, mo long ol tok flas blong olgeta, mo ol drim ya oli stap lidim yufala i go long rod blong lus. Ol man ya, mi mi no sanem olgeta i kam, mo mi no talem ol tok ya long olgeta blong oli talemaot. Ol profet ya oli no save givhan nating long yufala. Mi mi Hae God, mo hemia tok blong mi.’ "

33 Nao Hae God i talem long Profet Jeremaea se, "Sipos wan man, no wan profet, no wan pris* i kam askem long yu se, ‘?Hevi samting we Hae God i talemaot, i olsem wanem?’ bambae yu talem long hem se, ‘!Hevi samting we i mekem hem i harem nogud tumas, yufala nao! Mo bambae i no longtaem, hem i sakemaot yufala.’ Mi mi Hae God, mo hemia tok blong mi."

34 Nao profet i talemaot we Hae God i talem se, "Olgeta. Sipos wan man, no wan profet no wan pris, i stap talem se, ‘Hemia hevi samting we Hae God i talemaot,’ bambae mi mi givim panis long hem mo long ol famle blong hem tu. 35 Be i moa gud we yufala i stap asaskem long ol fren blong yufala no long ol famle blong yufala, se, ‘?Wanem ansa we Hae God i givim?’ no ‘?Hem i talem wanem?’ 36 Yufala i no mas yusum tok ya bakegen se, ‘Hemia hevi samting we Hae God i talemaot,’ from we sipos man i talem olsem, bambae mi mi tanem ol tok blong mi i kam wan hevi samting long laef blong hem. Mi mi Hae God, mi God blong yufala, mi laef mi stap we mi stap, mo mi mi gat olgeta paoa, be ol man ya oli tekem ol tok blong mi oli tanem i kam narafala. 37 Rod blong go askem samting long wan profet i olsem se, ‘?Wanem ansa we Hae God i givim long yu?’ no ‘?Hem i talem wanem?’ 38 Nao sipos yufala i no obei long tok blong mi, mo yufala i talem tok ya se, ‘Hemia hevi samting we Hae God i talemaot,’ 39 bambae mi holem* yufala, mi sakemaot yufala i gowe long fes blong mi. Taon ya we mi mi bin givim long ol bubu blong yufala bifo, bambae mi putum long han blong ol enemi blong yufala. 40 Bambae mi letem ol enemi ya oli lukluk nogud long yufala, mo bambae yufala i stap sem, gogo i no save finis, mo sem ya, bambae yufala i no save fogetem samtaem."