1 Nao Profet Jeremaea i talem se, "Olgeta. Yumi ya, yumi ol laen* blong Isrel,* mo yumi mas lesin gud long ol tok ya we Hae God i talemaot long yumi. 2 Hem i talem se,

‘Yufala i no mas folem

fasin blong ol man blong ol narafala kantri.

Sipos yufala i sek long wan saen

we i kamaot long skae,

nating we ol narafala man

oli fraet long hem,

be yufala i no mas fraet long hem.

3 Fasin blong skul blong ol man olsem,

i blong nating nomo.

Ol god blong olgeta,

oli wokem long wud nomo.

Fastaem oli katemdaon tri long bus,

nao ol man we oli gat gudhan,

oli yusum ol jisel blong katemgud.

4 Biaen oli flasemgud long silva mo gol,

mo oli yusum nil blong nilim i stanap strong,

blong i no save foldaon.

5 Ol aedol ya oli olsem giaman man nomo,

we man i putum long garen,

blong ronemaot ol pijin.

Olgeta oli no save toktok nating.

Man i mas karem olgeta i go olbaot,

from we olgeta oli no save wokbaot.

Yufala i no fraet long olgeta.

Oli no save spolem yufala,

mo oli no save givhan long yufala tu.’ "

6 Nao profet i prea, i talem se,

"Hae God.

Nem blong yu i hae we i hae,

mo yu yu gat olgeta paoa.

I no gat man nating we i olsem yu.

7 ✝Olgeta man oli mas ona long yu,

from we yu yu King blong ol man

long olgeta kantri.

Long olgeta ples long wol,

i gat ol waesman mo ol king oli stap,

be i no gat wan man nating we i olsem yu,

mo from samting ya,

i stret nomo,

blong ol man oli ona long yu.

8 Be olgeta oli krangke,

oli no gat hed.

Ol aedol ya oli wud nomo,

mo ol man oli no save lanem

wan samting nating long olgeta.

9 Ol man oli flasemgud olgeta

long silva we oli tekem long Spen,

mo long gol we oli tekem long Ufas.

Ol aedol ya,

ol man nomo oli wokem

long gudhan blong olgeta.

Nao oli putum ol gudfala klos long ol aedol ya,

we i pepol olsem klos blong king.

Ol gudfala klos ya,

ol nambawan man blong wokem klos oli wokem.

10 Be yu Hae God,

yu nomo yu tru God.

Yu yu God.

Yu yu laef, yu stap we yu stap.

Yu yu King.

Yu stap oltaem nomo,

gogo i no save finis.

Taem yu yu kros,

olgeta ples long wol oli seksek,

mo taem kros blong yu i kam kasem ol man,

oli no moa save laef."

11 Nao hem i talem long ol man se, "Yufala i mas talemaot long olgeta, we ol god ya blong olgeta oli no mekem wol mo skae, mo Hae God bambae i spolem olgeta evriwan. Bambae oli no moa save stap long wol ya bakegen."

12 Nao Profet Jeremaea i leftemap nem blong Hae God, i talem se,

"Hae God i mekem wol ya

long paoa blong hem nomo.

Long waes blong hem,

hem i putum wol ya i stap gud,

mo long save blong hem,

hem i putum skae long ples blong hem.

13 Taem hem i tok,

wota long skae i mekem bigfala noes.

Hem i stap mekem

ol klaod oli aot long narasaed wol,

oli kam.

Hem i mekem

laetning i laet long bigfala ren,

mo i mekem

win i kamaot long ples blong hem,

i stap blu.

14 Taem ol man oli luk ol samting ya,

oli harem se oli no gat hed,

oli krangke nomo.

Ol man blong wokem ol samting long gol,

we oli stap wokem ol aedol,

oli sem gud,

from we ol god ya we oli wokem,

oli giaman god nomo,

oli no gat laef nating.

15 Ol aedol ya oli no save mekem wan samting nating,

mo i stret nomo blong ol man

oli ting rabis long olgeta.

Taem Hae God i kamtru,

hem bambae i spolemgud olgeta,

nao bambae oli lus.

16 God blong yumi,

hem i God blong olfala Jekob* ya bifo,

we yumi kamaot biaen long hem,

mo hem i no olsem ol god ya.

Hem nomo i mekem olgeta samting long wol ya,

mo hem i jusumaot yumi,

se yumi ol man blong hem nomo.

Nem blong hem,

Hae God we i Gat Olgeta Paoa."

17 Nao Profet Jeremaea i luk wan vison,* nao i talem se,

"Ol man Jerusalem.*

Mi mi luk we ol enemi

oli kam raonem yumi finis.

Yumi mas mekemrere olting blong yumi,

blong yumi aot long ples ya,

18 from we Hae God i talem

se bambae i no longtaem,

hem i sakemaot yumi long kantri ya.

Bambae hem i flatemgud yumi,

gogo kasem we bambae i no moa gat wan long yumi i stap.

Hae God i God blong yumi,

mo hemia tok blong hem."

19 Nao hem i harem we ol man Jerusalem oli talem se,

"!Naoia, mifala i harem nogud tumas!

Ol soa blong mifala oli no save finis.

Fastaem mifala i ting se hemia i wan sik

we mifala i save winim.

20 Be naoia, ol enemi ya oli mekem

we ol haos tapolen blong mifala

oli folfoldaon finis,

mo ol rop blong holemtaet olgeta

oli brobrok tu.

Ol pikinini blong mifala oli lus finis,

mo naoia i no moa gat man i stap,

blong putumap ol haos ya blong mifala bakegen.

Mo i no moa gat man

blong hangem ol kaliko blong ol haos ya."

21 Be profet i gohed long vison blong hem, i talem se,

"Olgeta.

Ol lida blong yumi oli no gat hed nating.

Oli no save luk long Hae God

blong faenemaot tingting blong hem.

From samting ya nao,

wok blong olgeta i foldaon,

mo ol man blong yumi oli go wanwan.

22 !Yufala i lesin!

Wan nius i kamtru

we i gat noes blong bigfala kampani blong ol soldia

i kamaot long wan kantri long not.

Olgeta bambae oli spolemgud ol taon long Juda,*

bambae oli mekem olgeta oli kam olsem draeples,

we i ples blong ol wael dog nomo."

23 Nao long vison ya, hem i prea, i talem se,

"Hae God.

Mi mi save

we i no gat man i save wanem samting

bambae i kamtru long laef blong hem,

mo we i no gat man i save kam bos

long laef blong hem.

24 Mifala i man blong yu.

Plis yu stretem laef blong mifala,

be bambae yu no mekem i strong tumas long mifala,

mo plis yu no mekem long taem we yu kros,

from we sipos yu mekem olsem,

bambae yu flatemgud mifala.

25 Be bambae yu soemaot kros blong yu

long ol man blong ol narafala kantri

we oli no stap mekem wosip long yu,

oli tanem baksaed long yu.

Olgeta ya oli kilim mifala

we oli flatemgud mifala,

mo oli spolemgud kantri ya blong mifala,

oli livim i stap we i nogud olgeta."