1 Ya migumuko iheze, Pawulo aca atumako abigishwa abatera intege, hanyuma arabasezera, afata urugendo aja i Makedoniya. 2 Nuko aca muri iyo ntara yose aremesha abizera n’inyigisho nyinshi zo kubatera intege, maze ashika mu Bugiriki, 3 ahamara amezi atatu. Agira afate ubwato ngo aje muri Siriya, amenya ko hariho Abayuda bamugiriye inama, aca afata ingingo yo gusubira i Makedoniya. 4 Maze aca ajana na Sopatero mwene Puro w’i Beroya, na Arisitariko na Sekundo b’i Tesalonike, na Gayo w’i Derube, na Timoteyo, na Tukiko na Tirofimo bo muri Aziya. 5 Abo baba baragenda, baturindirira i Tirowa. 6 Natwe tuva i Filipi inyuma y’imisi mikuru y’imitsima itarimwo umwambiro, tubasanga i Tirowa haheze imisi itanu, duca tuhamara imisi indwi.

7 Ku mugoroba w’umusi w’Isabato duhurira hamwe ngo dusangire ingaburo y’Umwami, hanyuma Pawulo arabigisha gushika ijoro rigeze hagati kuko bwaca agenda. 8 Icumba co hejuru twari twakoraniyemwo, carimwo amatara menshi. 9 Maze umusore yitwa Eyutuko yari yicaye kw’idirisha, aremerwa n’itiro ryinshi Pawulo ariko arigisha. Amaze gusinzira cane, arakoroka avuye ku nzu yo hejuru igira gatatu, bamutora yapfuye. 10 Maze Pawulo arururuka, amwubamako, aramubumbatira, avuga ati: "Ntimuhagarike imitima, ni muzima!" 11 Hanyuma aca asubira hejuru, basangira ingaburo y’Umwami kandi iheze Pawulo aca abandanya yigisha gushika bukeye, ahejeje aragenda. 12 Nuko abantu batahana uwo musore ari muzima, kandi batewe intege cane.

13 Nuko tuva aho, twitangira Pawulo imbere, dufata ubwato butujana muri Aso, aho twategerezwa guhurira na Pawulo. Yari yabiteguye uko kuko we yashaka kujayo ajanye ibarabara. 14 Adusanze muri Aso, twaciye tujana mu bwato gushika i Mitulene. 15 Bukeye tubandanya urugendo, dushika hafi y’izinga Kiyosi. Ku musi ukurikira, turashishikara dushika i Samosi, maze bukeye dushika i Mileto. 16 Pawulo aca ahitamwo kubandanya adahagaze muri Efeso, kuko yanka kumara uwundi mwanya muri Aziya. Yariko yihutira ko, hamwe bimushobokeye, yoshika i Yerusalemu ku musi wa Pentekoti.

17 Tukiri i Mileto, Pawulo aca atumako abakuru b’ishengero ryo muri Efeso, kugira ngo baze babonane. 18 Bashitse, arababwira ati: "Murazi ingene nabanye namwe uhereye ku musi wa mbere nashikiye muri Aziya gushika n’uno musi. 19 Nakoreye Umwami Imana nciye bugufi kandi ndira cane, nihanganira amageragezwa menshi avuye ku mitego y’Abayuda. 20 Murazi ko mu vyashobora kubagirira ikimazi vyose ata na kimwe nabahishije, uhubwo navuze ubutumwa nongera nigisha mu makoraniro no mu nzu zanyu. 21 Nigishije Abayuda n’Abagiriki ko bakwiye kwihana bagahindukirira Imana mu kwizera Umwami Yesu.

22 None rero, ngoberewe na Mpwemu Yera, ngiye i Yerusalemu, ariko sinzi ibizonshikira ndi yo. 23 Ico nzi gusa ni uko, mu bisagara vyose ncamwo, Mpwemu Yera aguma amburira ko umunyororo n’amakuba bindindiriye. 24 Ariko mbona ko ubuzima bwanje atari ikintu c’agaciro kanini, ico nshaka ni kunonosora urugendo rwanje, no gusozera neza igikorwa Umwami Yesu yampaye co kubwira abantu Ubutumwa Bwiza bw’ubuntu bw’Imana.

25 None rero ndazi ko mwebwe abo nabwiye Ubutumwa Bwiza bw’Ubwami ata n’umwe azosubira kumbona. 26 Ni co gituma ndabamenyesha uwu musi ko nera ku maraso yanyu mwese, ko atazomparurwako. 27 Kuko ata na kimwe mu vyo Imana yashaka ko mumenya vyose ntababwiye. 28 Nuko rero mwirinde mwebwe ubwanyu mwongere murinde n’ubusho Mpwemu Yera yabahaye ngo mububere abungere. Muragire ishengero ry’Imana, iryo yaguze amaraso y’umwana wayo. 29 Ndazi ko ninamara kugenda hazokwaduka abigisha b’ibinyoma bameze nk’amabingira y’inkazi, bazinjira muri mwebwe, maze batikize ubusho. 30 Mbere no muri mwebwe nyene hariho abazokwadukana inyigisho zo kugoramika ukuri kugira ngo bikwegereko abigishwa. 31 Nuko rero mube maso kandi mwibuke ko mu myaka itatu tumaranye ntigeze mpengeshanya, ijoro n’umurango, kuburira umuntu wese muri mwebwe n’amarira menshi.

32 Ubu rero ndabaragije Imana n’ijambo ry’ubuntu bwayo, ryo rishobora kubakomeza mu kwizera no kubaha kuragwa ivyiza hamwe n’abera. 33 Sinigeze nipfuza ifeza, inzahabu canke impuzu vy’umuntu n’umwe. 34 Namwe ubwanyu murazi ko nakoresheje amaboko yanje nkibeshaho nkongera nkabeshaho n’abo twagendana. 35 Muri vyose, naberetse akarorero keza ko dutegerezwa gukora cane kugira ngo dufashe abatishoboye, twibuka amajambo y’Umwami Yesu ubwiwe, we yavuze ati: ‘Hari umugisha mu gutanga kurusha mu guhabwa.’ "

36 Ahejeje kuvuga ivyo, aca apfukama hamwe na bo barasenga. 37 Bose baraturikisha bararira, bamusezera bamugumbira. 38 Icabababaje kurusha ibindi, ni uko yari yababwiye ko batazosubira kumubona. Nuko baca baramuherekeza gushika ku bwato.