1 Afịd mbon Isrel emaedisoobo iwuod ye Defid ke Hibrọn enyʌñ ebo anye ete, "Ñnyịn ido abʌk ye iyiib mfo. 2 Ke mme usen edem, ke idaha Sọọl akedooho adidem, afo akedo awo akesidatta Isrel usʌñ akaa ekọñ. Ñko Abọọñ Abasi mfo amaudọkkọ fiin ate, ‘Afo ayaado andikpeme ikọd mmi Isrel, ndin afo ayaado andikara ammọ.’ "

3 Ndin ke ini afịd mme ñkpisọñ ke Isrel emaekedisoobo ye Adidem Defid ke Hibrọn, anye amaanam edioomo ye ammọ ke Hibrọn ke iso Abọọñ, ndin ammọ emaeyet Defid adan nte adidem enọ Isrel, naña Abọọñ akenwọñọ ato inua Samwel.

4 Defid ye afịd mbon Isrel emaenam isañ edʌk Yeruselem (a-adooho Yebus). Mbon Yebus e-ekedʌññọ do 5 Yebus emaebo Defid, "Afo uduudʌkkọ mi." Kpayeado Defid amaadʌk anyʌñ adat akpọsọñ itie ke Saiyọn, a-adooho Abio Defid.

6 Defid amaabo ate, "Awo ndomokeed se ida iso ekọñ adinwana mbon Yebus ayaado adaiso ekọñ." Yoab ayịn Seruya akedo akpa awo adito ndọọk, ke ntoro anye amaabọ itie ado.

7 Ndin Defid amaadat akpọsọñ itie Saiyọn anam itieidʌñ amọ, ndin emaekoot itie ado Abio Defid. 8 Anye amaabọp abio ado akanna anye akʌk, tọọñọ ke mme mben tutu akewuọ mme ñkanñkʌk ndibene, ke ini Yoab aketọọñọke ntak adiọñ mme abio ado. 9 Ndin Defid amaanenekke akop uko, sia Abọọñ Andikponñkan amaaba ye anye.

10 Mbon ami ekedoñño mbọọñ ke atu mbon uko ekọñ Defid, ammọ ye afịd mbon Isrel, emaenọ ubọọñ amọ akpọsọñ ibededem adinam ukara amọ atara ke afịd isọñ, naña Abọọñ akenwọñọ. 11 Anyịñ mme ñkpọsọñ mbonekọñ Defid edoñño emi:

Yasobiim, awo Hakmon, akedo abọọñ ke atu mme adaaha; anye amaabenne eduad amọ anwana ye awo ikie ita (300), ake anye akewotto akañ keed ke iso ekọñ keed.

12 Andikidiana anye akedo Eliasa ayịn Dodai awo Ahoa, keed ke atu mbon uko ekọñ ita. 13 Anye akeba ye Defid ke Pas Damịm idaha ake mbon Filistia ekebohoke ke ndo edinwana ekọñ. Ke itie inwañ a-akeyọhọke ye baali, mme mbon ekọñ emaefeeñe ke iso mbon Filistia. 14 Ado ammọ emaedat itie ammọ ke ufọọd inwañ. Ammọ emaetuak eda enyʌñ ewoot mbon Filistia ebono ke isọñ, ndin Abọọñ amaanọ ekamba edikan.

15 Awo ita ke atu mme adaaha ekọñ edịb mme duob emaetịkke ebịne Defid ke abaitiad Adulam, ke ini udịm mbon ekọñ Filistia ekenamma nnaaekọñ ekanna ke Abedeñ Refaim. 16 Ke ini ado Defid akeba ke akpọsọñ itie, ndin mbon ukpeme Filistia ekeba ke Betlehem. 17 Defid amaayem mmọọñ se anwọñ, ndin anye amaabo, "O, ubaha nte awo akpekoiyo unwọnwọñ mmọọñ annọ miin ke ube mmọọñ a-akpereke inuaatob Betlehem!" 18 Ke ntoro, mme adaaha mbon ekọñ Ita emaesiak usʌñ eboiyo ke ufọọd udịm mbon Filistia, ekekoi mmọọñ ke ube mmọọñ ke inuaatob Betlehem enyʌñ eben esọk Defid. Ado anye amaasịn adinwọñ mmọọñ ado; utu ke ado, anye amaakappa akaaña mmọọñ ado aduọk anọ Abọọñ. 19 Anye amaabo, "Abasi akan ami adikpinam utọ ñkpọ ami! Ana nte ami ñnwọñ iyiib mbon ake ekenyịmmeke edikpikiduọọk uwem ammọ?" Sia ammọ ekenyịmmeke edikpikiduọọk uwem ammọ ekedat mmọọñ ami edi, Defid idiinwọññọ mmọọñ ado.

Utọ ado akedo mme ñwuọnda adinam ñkpọsọñ mbon uko ekọñ ita ado.

20 Abisai ayịneka awodeen Yoab akedo adaiwuod ke atu mme adaaha Ita ami. Anye amaadịppe eduad amọ anwana awo ikie ita (300), ake anye akewotto, ndin anye amaakappa awuọ etob nte awo Ita ami. 21 Anye amaanie ukpono akañ iba akan mbon Ita ado anyʌñ akappa ado etubom adaiso ekọñ anọ ammọ, akpesʌkado awo ikibatta anye isịn ke atu ammọ.

22 Benaiya ayịn Yehoiyada, awo uko ke ekọñ aketooho Kabseel, amaanam mme awuọ etob ñkpoon utom uko. Anye amaawot ata ñkpọsọñ mbon ekọñ Mọb iba ekesọññọ adudu ekan. Anye amaanyʌñ asọiyọ adʌk ube ke usen sino akenekkeke aduọ awak akewot ekpe. 23 Ndin anye amaawot awo Iyib a-akenyọọñọ kubid ition*. Akpesʌkado awo Iyib ami amaakekama eduad a-akebaaha nte eto udọk afọñ ke ubọk amọ, Benaiya amaakama ibio akpeti eto anwana ye anye. Anye amaawappa awo Iyib ami eduad ke ubọk abọ anyʌñ akama kpa eduad awo ado awot anye. 24 Mme utọ ado ekedoñño mme ñwuọnda utom uko Benaiya, ayịn Yehoiyada; anye ñko amaanyʌñ awuọ etob nte mme ñkpọsọñ mbon ekọñ ita ado. 25 Emaenịm anye ke ataa ekamba itie ukpono ekan afịd mme awo edịb mme duob ado, ado awo ikisịnne anye ke atu mme ñkpọsọñ awo Ita ado. Ndin Defid amaanịm anye nte adaiwuod ke atu mbon ukpeme amọ.

26 Mme ñkpoon mbon ekọñ ado ekedoñño:

Asahel ayịneka awodeen Yoab,

Elhanan ayịn Dodo aketooho Betlehem,

27 Samod awo Harọ,

Heles awo Pelọn,

28 Ira ayịn Ikes a-atooho Tekoa,

Abiesa a-atooho Anatod,

29 Sibekai awo Husa,

Ilai awo Ahoa,

30 Maharai awo Netofa,

Heled ayịn Baana awo Netofa,

31 Itai ayịn Ribai a-atooho Kibie ke Benyamin,

Benaiya awo Piratọn,

32 Hurai a-atooho ñkañ abedeñ Kaas,

Abiel awo Abad,

33 Asmafed awo Baharum,

Eliaba awo Saalbọn,

34 nditọ ideen Hasem awo Kisọn,

Yọnatan ayịn Sakee awo Hara,

35 Ahiam ayịn Sakaa awo Hara,

Elifal ayịn Ọr,

36 Hefa awo Mekerad,

Ahiya awo Pelọn,

37 Hesro awo Kamel,

Naarai ayịn Esbai,

38 Yuel ayịneka awodeen Natan,

Miba ayịn Hakri,

39 Selek awo Amọn,

Naharai awo Beerod, akama ñkpọ ekọñ Yoab ayịn Seruya,

40 Ira awo Itriad,

Kareb awo Itriad,

41 Yuria awo Hed,

Saabad ayịn Alai,

42 Adina ayịn Sisa awo Rubịn, a-akedooho ekamba awo ke atu mbon Rubịn, ndin ye mme awo edịb mme duob ekebaaha ye anye,

43 Hanan ayịn Maaka,

Yosafad awo Mitan,

44 Usaiya awo Asterad,

Sama ye Yeiyel mme nditọ Hotam awo Arowa,

45 Yediayel ayịn Simri,

ayịneka amọ Yoha awo Tis,

46 Eliel awo Mahafa,

Yeribai ye Yosafia ayịn Elnaam,

Itma awo Mọb,

47 Eliel, Obed ye Yaasiel awo Mesoba.