1 Akem adidem Defid amaabo afịd esob ate: "Ayịn mmi Sọlọmọn, anye A-Abasi akemekke, ado etəkayịn ye akọi. Ubiọñutom akpon, sia ufọkabọọñ ami idooho ake awo, ado ake Abọọñ Abasi. 2 Ye afịd inie mmi ami mmebono ñkpọ nnọ tembịd Abasi mmi, kold nọ enam utom kold, silfa nọ enam utom silfa, brọns nọ enam utom brọns, ukwak nọ enam utom ukwak ye eto nọ enam utom eto, ndian ọniks se edat esịn mben ekanna, tọkwọis, nsio-nsio ñkem itiad, ye afịd nsio-nsio mfọọn itiad ye mabịd, afịd ami akedo uwak-uwak. 3 Ke akanna ado, ke ñwaidem mmi ke utom tembịd Abasi mmi ami mmenọ akpọ-akpọ inie kold ye silfa ke tembịd Abasi mmi, akan afịd ñkpọ se nnọ ke adisana tembịd ami: 4 talen kold tọsịn ita* (kold ake Ọfia) ye tọsịn silfa itiaba*, ke adikama ndot mme ndibene ufọk ami, 5 ke adikama nnam utom kold ye utom silfa, ye afịd mme utom a-anaaha nte mme anam utomusọ enam. Idahami, mme anie awo ibeeñe idem adidiọñ idem ammọ nnịm nnọọ Abọọñ mfịn ami?"

6 Akem mme adaiwuod ke mme ufọk, mme adaaha ke mme esiin Isrel, mme adaiso ekọñ ke mme tọsịn ye mme adaiso ekọñ ke mme ikie, ye ikpọawo ekeseeghe ñkpọ ebaña utom adidem emaenọ mme enọ awo ikinyịkkenyịk ammọ. 7 Ammọ emaenọ talen tọsịn ition* ye darik kold tọsịn duob*, talen silfa tọsịn duob*, talen brọns tọsịn duob mme itiaita* ye ukwak tọsịn ikie* se edat enam utom ke tembịd Abasi. 8 Awo keed akeedodo a-akenieghe nsọñudua itiad amaanọ ammọ nọ enịm ke itie unịm ñkpọ tembịd Abọọñ a-akebaaha ke idak ukpeme Yehiel awo Kesọn. 9 Mme awo emaenem esịd ebaña naña mme adadusʌñ ammọ ekebọọrọ ke eti usʌñ, sia ammọ emaenọ Abọọñ ke ntadubọk ke afịdesịd. Adidem Defid amaanyʌñ anem esịd eti-eti.

10 Defid amaatooro Abọọñ ke iso afịd esob, abo ate,

"Itooro unie fiin, Abọọñ,

Abasi mme ete ñnyịn Isrel,

tọọñọ ke nsi-nsi tutu ke nsi-nsi.

11 Ake mfo, Abọọñ ado ubom ye adudu

ndin itooro ye ubọọñ ye uku,

ke afịd ñkpọ ke anyọñ ye ke ederimbod ado ake mfo.

Ake mfo, Abọọñ, ado abioubọọñ;

afo ke edịppe nte iwuod ekan afịd ñkpọ.

12 Inie ye ukpono uto fiin awuọ;

afo ado andikara afịd ñkpọ.

Inweek ye adudu usịne fiin ke ubọk

aditọọrọ ñnyʌñ nnọọ afịd ñkpọ ukeme.

13 Idahami, Abasi ñnyịn, imunọ fiin ekọọm,

inyʌñ itooro uyaiya anyịñ mfo.

14 "Ado ami ndo anie, mbon mmi edoñño mme anie, nọ ñnyịn ikpikeme adinọ ke ntadubọk ntom? Afịd ñkpọ uto fiin, ndin ñnyịn imunọ fiin se ikito ubọk mfo. 15 Ñnyịn idoñño isenawo ye mme adidʌñ ke iso mfo, naña mme eteete ñnyịn ekedoñño. Mme usen ñnyịn ke ederimbod atie nte ndukpọñ, idodanyen ibaaha. 16 Abọọñ Abasi ñnyịn, afịd mme ñkpọ ami ake ñnyịn inọọhọ ke edidat mbọp tembịd nnọọ Adisana Anyịñ mfo ato ubọk mfo, ndin afịd ammọ unie fiin. 17 Abasi mmi, ami mmediọọñọ ke afo amesiduuñọ esịd anyʌñ anem esịd ye nsọọñọnda. Afịd mme ñkpọ ami nnọ ke ntadubọk ye esịd akpanikọ. Ndin idahami ami mmekịt ye idadesịd naña ikọd mfo e-ebaaha mi unọọ fiin ke ntadubọk. 18 Abọọñ, Abasi mme ete ñnyịn Ebraham, Aisik ye Isrel, nịm mme udọñ ye akikere ami ke esịd ikọd mfo ke nsi-nsi, nyʌñ nam esịd ammọ enam akpanikọ unọ fiin. 19 Ndin nọ ayịn mmi Sọlọmọn ataa ayọhọ ukpono adinịm mme ewʌhọ mfo, mme mbed ye ubiere mfo adinyʌñ nnam afịd ñkpọ adibọp ekamba ufọkubọọñ ake ami mmaakebono ñkpọ nnọ."

20 Akem Defid amaabo afịd esob ate, "Itooro Abọọñ Abasi ndufo." Ndin afịd ammọ emaetooro Abọọñ, Abasi mme ete ammọ; ammọ emaenyuuk iwuod, eduọ ke isọñ enọ Abọọñ ye adidem.

21 Edem usen ammọ emaenam uwa enọ Abọọñ enyʌñ enọ anye mme ufọfọb uwa: ñyaaraenañ tọsịn keed (1,000), akukịmedọñ tọsịn keed (1,000) ye ñyịn akukịmedọñ tọsịn keed (1,000), adiana ye mme enọ ukọd, ye mme uwak uwa mfen anọ afịd Isrel. 22 Ammọ emaeta enyʌñ enwọñ ye ayọhọ idadesịd ke iso Abọọñ ke usen ado.

Akem ammọ emaenyịmme Sọlọmọn ayịn Defid nte adidem ayọhọ akañ iba, eyet anye adan ke iso Abọọñ adido adaukara ye Sadọk adido aku. 23 Ndin Sọlọmọn amaatie ke ebekpo Abọọñ nte adidem ke itie ete amọ Defid. Anye amaaforo ndin afịd Isrel emaekop uyio amọ. 24 Afịd mme adaaha ye mme anwana ekọñ, ukem ye afịd nditọ ideen Adidem Defid, emaenwọñọ adisuuk iwuod nnọọ Adidem Sọlọmọn.

25 Abọọñ amaanekke adịppe Sọlọmọn ke iso afịd Isrel anyʌñ anọ anye uku ufọkubọọñ a-adooho akenaanam awo inọọhọ adidem ndomokeed ke afịd Isrel.

26 Defid ayịn Yesi akedo adidem ke afịd Isrel. 27 Anye amaakaara Isrel ke isua aba, isua itiaba ke Hibrọn, ndin isua edịb mme duob mme ita ke Yeruselem. 28 Anye akekpa ke ataa eti isua, ke amaakekop inem anyan uwem, inie ye ukpono. Ayịn amọ Sọlọmọn amaadat itie amọ nte adidem.

29 Ke abaña mme ñkpọ ukara Adidem Defid, ke ntọọñọ tutu asịm utịd, emaewet ammọ ke ñwed Samwel abia ñkukịd, ñwed ake prọfed Natan ye ñwed ake Kad abia ñkukịd, 30 adiana ye mme ñkpọ ubọọñ amọ ye adudu, ndin ye mme naña itie amọ akeba ye Isrel ye mme ebekpo ke afịd mme isọñ mfen.