1 Sọlọmọn ayịn Defid amaasịn ñkam anyʌñ anie nsọọñọnda akara abio amọ, sia Abọọñ Abasi amọ amaaba ye anye anyʌñ anam anye akpon eti-eti.

2 Akem Sọlọmọn atañ ikọ anọ afịd Isrel, anọ mme adaiso ekọñ ke mme tọsịn (1,000) ye mme adaiso ekọñ ke mme ikie (100), mme abiideikpe ye afịd mme adadusʌñ ke Isrel, mme iwuod ufọk; 3 ndin Sọlọmọn ye afịd esob emaekaa ke ñkoñ-ñkoñ itie ke Kibiọn, sia atayad mbono Abasi akeba do, ake Moses awo Abọọñ, akenamma ke anaan. 4 Idahami Defid amaakeben akebe edioomo Abasi ke Kiriad Yerịm adọọk adi ke itie ake anye akenamma anịm anọ anye, sia anye amaawuuk atayad anọ anye ke Yeruselem. 5 Ado akpokoro uwa akpoho ake Besalel ayịn Uri, ayịn Họọ, akenamma akeba ke Kibiọn ke iso tabanakịd Abọọñ; ndin Sọlọmọn ye esob ado emaebịp ebaña anye ke udo. 6 Sọlọmọn amaadọọk akaa ke iso Abọọñ ke akpokoro uwa akpoho ke atayad mbono anyʌñ akewa ufọfọb uwa tọsịn keed (1,000) do.

7 Ke akonayio ado Abasi amaabiọññọ anọ Sọlọmọn anyʌñ abo anye, "Beeñe se afo akpeyeyem nọ ami unọ fiin."

8 Sọlọmọn amaabọọrọ Abasi abo, "Afo amaawọt ekamba mfọnido ye ete mmi Defid anyʌñ annam miin adidem ke itie amọ. 9 Idahami, Abọọñ Abasi, yak se akenwọñọ anọọ ete mmi Defid asọọñọ ada, sia afo amennam miin adidem anọ mbon awo ake ewakka nte ntan ke isọñ. 10 Nnọ miin aniọñ ye ifiọk, se ndiikama ndat mbon ami usʌñ, sia anie awo akeme adikara utọ atu awo mfo ami?"

11 Abasi amaabo Sọlọmọn, "Sia ami adooho uduak esịd mfo ndin afo ukubeeñeke uforo, inie me ukpono, me adiyem mme asua mfo ekpañña, ndin sia afo umuubeeñeke anyan uwem ado aniọñ ye ifiọk adikaara mbon mmi ake ami ñkenamma afo ado adidem, 12 ke ntoro eyaunọ fiin aniọñ ye ifiọk. Ndin ñyaanyʌñ unọ fiin uforo, inie ye ukpono ñkọrọ, utọ a-adooho akenaanam adidem ndomokeed se ikiba mbemiso afo ikinieghe ndin ndomokeed se iduukeene fiin idiinyʌññọ inie."

13 Akema Sọlọmọn amaato ke ñkoñ-ñkoñ itie ke Kibiọn akaa ke Yeruselem, ke iso atayad mbono. Ndin anye amaakara Isrel.

14 Sọlọmọn amaanie mme sariọd ye mme enañmbakara; anye akenie sariọd tọsịn keed mme ikie inaañ (1,400) ye enañmbakara tọsịn duob mme iba (12,000) ake anye akenyʌññọ abono ke mme abio sariọd ye adidem ke Yeruselem. 15 Adidem amaanam silfa ye kold awak ke Yeruselem nte ñkaña itiad, ndin eto sida awak nte mme eto fik-sikamọ ke mme mben abod. 16 Eketobo mme enañmbakara Sọlọmọn eto Iyib ye Kue; mbon unyam udua adidem ekedep ammọ eto Kue* ke ekọmudua idaha ado. 17 Ammọ emaetobo sariọd keed eto Iyib ke ekọmudua sekel silfa ikie itiokeed* (600), ye enañmbakara keed ke ikie keed mme aba mme duob* (150). Ammọ emaenyʌñ esịññe ammọ enọ esọk afịd ndidem mbon Hed ye ake mme Aram.