1 Ahas akedo isua edịb idaha anye akedooho adidem, ndin anye amaakara ke Yeruselem isua duob mme itiokeed. Ikinamma naña Defid ete amọ akenam, anye ikinamma se inen ke iso Abọọñ. 2 Anye amaakeene mme usʌñ ndidem Isrel anyʌñ anam mme ubobodñkpọ adidat ñkpono mme Baal. 3 Anye amaafọp mme uwa ke Itịkke Ben Hinọm anyʌñ awa nditọ amọ ke ikañ ado, asịn ifịk anam mme mbubiam ido mme idịd ake Abọọñ akebịneke asioño anọ mbon Isrel. 4 Anye amaanam mme uwa anyʌñ afọp insensi ke mme ñkoñ-ñkoñ itie, ke mme anyọñ abod ye ke idak afịd eto a-atarake.

5 Ke ntoro Abọọñ Abasi amọ amaayaak anye asịn ke ubọk adidem Aram. Mbon Aram emaekan anye enyʌñ emuum uwak awo nte mbon ñkpakọb enyʌñ eben ammọ ekaa Damaskọs.

Amaanyʌñ ayaak anye ñko asịn ke ubọk adidem Isrel, a-akenọọhọ anye ukuud ke adiwoot mbon amọ. 6 Ke usen keed Peka ayịn Remalia amaawoot mbon ekọñ tọsịn ikie ye edịb ke Yuda, sia Yuda amaasịn Abọọñ, Abasi mme eteete ammọ. 7 Sikri, awo ekọñ a-aketooho ubon Ifrem, amaawot Maaseiya ayịn adidem, Asrikam adaaha a-aseeghe ñkpọ abaña akwere adidem, ye Elkana, udiana adidem. 8 Ideen Isrel emaemuum ibaan ndọ emọ-emọ mbon Isrel e-eketooho Yuda tọsịn ikie iba (200,000), nditọ ideen ye nditọ ibaan ukad. Ammọ ñko emaekoono ataa uwak mbịme, ake ammọ eketañña enyọñ Sameria.

9 Ado prọfed Abọọñ keed a-akekereke Oded amaaba do, ndin anye amaawuọ akaa akesoobo ye mbon ekọñ ke ini emaeketịmme enyọñọ Sameria. Anye amaabo ammọ, "Sia Abọọñ, Abasi mme eteete ndufo, amaayat esịd ye Yuda, anye amaaben ammọ isịn ndufo ke ubọk. Ado ndufo emewot ammọ ke iyadesịd asịmme hefịn. 10 Ndin idahami ndufo eduak edinam mme ideen ye ibaan Yuda ye Yeruselem edoñño mme ifʌn ndufo. Ado nte ndufo ñko idoññoke mbon ndudue ye mme anam idiọọkñkpọ ke iso Abọọñ Abasi ndufo? 11 Idahami ikpañ utọñ innọ miin! Iyaak emọ-emọ mbon Isrel nditọeka ndufo ake ndufo ekemuumọ nte mbon ñkpakọb enyọñọ, sia ikañ-ikañ iyadesịd Abọọñ idoro ndufo ke idem."

12 Akekem usʌk mme adaiso ke Ifrem, Asaria ayịn Yehohanan, Berekia ayịn Mesilemod, Yehiskia ayịn Salum, ye Amasa ayịn Hadlai, emaenam ikọ ye mbon ekenyọññọ ekọñ edi. 13 Ammọ emaebo, "Inaaha nte ndufo eben mbon ñkpakọb ado edi mi, imiidooho ntoro ñnyịn iyaido mbon ndudue ke iso Abọọñ. Nte ndufo eduak adidian ke idiọọkñkpọ ye ukwañido ñnyịn? Sia ukwañido ñnyịn amaakekpokpon, ndin ikañ-ikañ iyadesịd amọ adoro ke Isrel."

14 Ke ntoro mbon ekọñ emaesaana mbon ñkpakọb eyaak ye mbịme ke iso mme adaaha ye afịd esob. 15 Mme ideen se ekesioño ke anyịñ enịm emaeben mbon ñkpakọb, ndin ke atu mbịme ammọ emaesiin mbon e-ekesañake ifed afọñ. Ammọ emaenọ ammọ afọñ ye ikpaukod, udia ye ukọd, ye ufiob adan ukọk unan. Afịd mbon se idem akemem emaedoot ammọ ke edem dọñki. Ke ntoro ammọ emaeben ammọ etịmme esọk emọ-emọ mbon Isrel ammọ ke Yeriko, Abio mme Ayob, enyʌñ etịmme enyọñọ Sameria.

16 Ke ini ado adidem Ahas amaadọñ ebịne ndidem Asiria ate inọ unwam. 17 Mbon Edọm emaetịmme edinwana ekọñ ye Yuda enyʌñ ekoono mbon ñkpakọb enyọñọ, 18 ke ini mbon Filistia ekedʌkkọ efʌñ mme abio ke mben abod ye ke unaisọñ Nekef ke Yuda. Ammọ emaekan enyʌñ eben Bed Semes, Aiyalọn ye Kederọd, ñkọrọ Soko, Timna ye Kimso, ye mme ñkanñkʌk idʌñ ammọ. 19 Abọọñ amaasuuhọ Yuda anịm ke ntak Ahas adidem Isrel, sia anye amaanam idiọọk ido atọt ke Yuda anyʌñ akappa ado andinana mbuọdidem ñkan ke Abọọñ. 20 Tiklad-Pilesa adidem Asiria amaadi abịne anye, ado anye akedi adinọ anye ntịme ke itie unwam. 21 Ahas amaakoono usʌk mme ñkpọ ke tembịd Abọọñ ye ke akwere ubọọñ ye ake mme adaaha anyʌñ aben ammọ anọ adidem Asiria, ado anye ado ikinwamma anye.

22 Ke ini ntịme amọ adidem Ahas amaanenekke ado anana mbuọdidem ke Abọọñ. 23 Anye amaawa mme uwa anọ mme abasi Damaskọs, e-ekekanna anye; sia anye akekere abo, "Sia mme abasi mme ndidem Aram emaenwam ammọ, ami ñyaawa uwa nnọ ammọ nọ ato do ammọ ediiñnwam miin." Ado ammọ ekedoñño iduọ amọ ye ake afịd Isrel.

24 Ahas amaakoono mme ñkpoduoho mbana ke tembịd Abasi abon atọ keed anyʌñ akpok ammọ ñkeñe-ñkeñe. Anye amaakọp mme usʌñ ke tembịd Abọọñ anyʌñ adaaha mme akpokoro uwa ke afịd inuuk usʌñ ke Yeruselem. 25 Ke afịd abio ke Yuda anye amaabọp mme ñkoñ-ñkoñ itie adidat ñwaa uwa nnọọ mme abasi mfen, anyʌñ ademme iyadesịd Abọọñ, Abasi mme eteete amọ.

26 Mme ñkpọntịppe mfen ke ukara amọ ye afịd mme usʌñ amọ, ke ntọọñọ tutu awuọ utịd, ewet esịn ke ñwed ake mme ndidem Yuda ye Isrel. 27 Ahas amaaduọk adudu ye mme eteete amọ emaenyʌñ ebuuk anye ke abio Yeruselem, ado awo ikinịmme anye ke udi mme mbọọñ Isrel. Ndin Hesikaiya ayịn amọ amaadat itie amọ nte adidem.