1 Ke afịd utom se Sọlọmọn akenam ke tembịd Abọọñ amaakekweeñe, anye amaakoono mme ñkpoduoho se ete amọ Defid akenịm asaña-asaña adidọñ mme ñkpọ mbana ake silfa ye ake kold, ndin anye amaabono ammọ ke ekpurikpu ke tembịd Abasi.

2 Ndin Sọlọmọn amaakoot mme ñkpisọñ ke Isrel edi ke Yeruselem, afịd mme adaiwuod ke mme esiin ye mme mbọọñ ke mme ufọk mbon Isrel, yak ammọ ediben akebe edioomo Abọọñ edọọk eto ke Saiyọn, Abio Defid. 3 Ndin afịd nditọ Isrel emaedisoobo keed ebịne adidem ke ini usọrọ ke ayọhọ afiọñ itiaba.

4 Ke ini afịd mme ñkpisọñ ke Isrel emaekediwuọ, mme Lifai emaeben akebe edioomo, 5 ndin ammọ emaeben akebe edioomo ye atayad mbono ye afịd ndisana ñkpọ mbana ufọk ke esịd amọ. Mme aku Lifai emaekoono mme ñkpọ ami edọọk; 6 ndin Adidem Sọlọmọn ye afịd esob Isrel e-ekediighe edisoobo ye anye ekeba ke iso akebe edioomo, esʌk ewa uwak-uwak edọñ ye mme enañ ake awo imiikikanna adiwewet me adibabat.

7 Mme aku ndin emaeben akebe edioomo Abọọñ ekaa itie amọ ke ata esịd ubeed tembịd, Ata Adisana Itie, ekenịm anye ke idak mme mba serubim. 8 Mme serubim emaetat mme mba ammọ ke anyọñ itie akebe edioomo emaenyʌñ efʌk akebe edioomo ye mme mboi edatta eben anye. 9 Mme mboi ami emaenyọọñ tutu utịd ammọ, akesannake akpọñ akebe edioomo, amaado se eda ekịt ke iso ata esịd ubeed, ado awo ikikịtte ito anwa Adisana Itie; ndin ammọ mmọdo esʌk eba tutu mfịn ami. 10 Ñkpọ ndomokeed ikisịneke ke akebe edioomo ikan itiadñwed iba ake Moses akesịnne ke Họreb, ke itie Abọọñ akenamma edioomo ye mbon Isrel ke ammọ emaekewuọñọ eto Iyib.

11 Akem mme aku emaediwuọñọ ke Adisana Itie. Afịd mme aku se ikibañña do emaenam idem ammọ asana, ikeeneke me ubakka ñka ammọ ado akee. 12 Afịd mme Lifai ake ekedooho mbon ukwọ ikwọ: Asaf, Heman, Yedutun ye nditọ ammọ ye mbon ammọ ewanake ñkpọ emaeda ke ñkañ edem usakkautịn akpokoro uwa, esiine ata nti linen enyʌñ ebre mme simbal, mme ekpa ye mme ndidoudʌk. Mbon se ikisaña ye ammọ ekedo aku 120 (ikie keed mme edịb) ekesʌkọ efịt mme adukpoñ. 13 Mbon ufịt adukpoñ ye mbon ukwọ ikwọ emaedian uyio keed enọ Abọọñ itooro ye ekọọm. Mme adukpoñ emaediana, ye mme akpañkpañ ye mme ñkpọ mbre mbon mfen, mbon ukwọ ikwọ emaenekke ebenne uyio ke adinọ Abọọñ itooro ke adikwọ:

"Anye afọn;

ima amọ ada ke nsi-nsi."

Akem tembịd Abọọñ amaayọhọ ye ntọñanyọñ, 14 ndin mme aku ikikanna adinam utom ammọ ke ntak ntọñanyọñ, sia ubọọñ Abọọñ amaayọhọ tembịd Abasi.