* 1 Sọlọmọn amaanọ uyio ate ebọp tembịd enọ Anyịñ Abọọñ ye akwere abọọñ enọ anye ke idem amọ. 2 Sọlọmọn amaadat ideen tọsịn ata mme duob (70,000) nte mme abiom mbiomo ye tọsịn anaañ (80,000) nte mme akpịkke itiad ke mme abod ye tọsịn ita mme ikie itiokeed (3,600) nte mme adaiso nnọọ ammọ.

3 Sọlọmọn amaanọ etob ami esọk Hiram* adidem ke Tai:

Nọ usasiak eto sida ensọk miin kpa naña afo akenam ye ete mmi Defid ke ini afo akenọọhọ sida esọk anye nọ edat ebọp itieidʌñ adidem enọ anye adʌñ. 4 Idahami ami ñyem adibọp tembịd nnọọ Anyịñ Abọọñ Abasi mmi ñnyʌñ ñyaak anye nnọọ nte itie adidat mfọp inem ufịk insensi ke iso amọ, ke adisio uyo emaekediọñ asaña-asaña nnịm ke afịd ini, ke adinyʌñ nnam ufọfọb uwa afịd ubakusen ye ndubiayio ye ke mme Sabad, ke mme Ufa Afiọñ ye ke adimek mme usọrọ Abọọñ Abasi ñnyịn. Ami ado nsi-nsi ewʌhọ anọ Isrel.

5 Tembịd ake ami ñyemme adibọp ayaakpon, sia Abasi ñnyịn akpon akan afịd mme abasi mfen. 6 Ado anie awo anie ukeme adibọp tembịd nnọọ anye, sia mme anyọñ, kpa mme anyọñ akoñño akan, ikemeke adikem anye? Ami ndin ndo anie awo ake ñkemeke adibọp tembịd nnọọ anye, ke imiibọhọke itie se efọp uwa enọ anye?

7 Ke ntoro, nọ awo a-anekkeke anieghe ifiọk usọ ke kold ye silfa akpəho ye ukwak, ye ke ndad-ndad, ididuod ye bru-bru afọñ nọ ensọk miin, a-anyʌññọ anie ifiọk adimịñ ñkpọ, yak adinam utom ke Yuda ye ke Yeruselem ye nta mbon ubọkutom mmi, ake ete mmi Defid akenịmme.

8 Nyʌñ nọ adukpọk eto sida, yunipa ye alkọm e-etooho Lebanọn ensọk miin, sia ami mmediọọñọ ke nditọufọk mfo e-enekke ediọọñọ ukpịkke adukpọk do. Nditọufọk mmi eyaenam utom ye nditọufọk mfo 9 edinnọọ miin uwak-uwak adukpọk, sia tembịd a-ami mbọppọ ana akpon anyʌñ atara. 10 Ami ñyaanọ nditọufọk mfo, mbon e-ekekpịkkeke adukpọk, udomo kọọs ukọkọk wiid tọsịn edịb (20,000)*, udomo kọọs baali tọsịn edịb (20,000)*, udomo atu ukọd tọsịn edịb (20,000) ye udomo abañ adan ọlif tọsịn edịb (20,000)*.

11 Hiram adidem ke Tai amaabọọrọ ke adiwet nnọọ Sọlọmọn:

"Sia Abọọñ amaaha mbon amọ, anye amaunam fiin adidem ammọ."

12 Ndin Hiram amaadian:

"Itooro anie Abọọñ, Abasi Isrel, a-akenamma anyọñ ye isọñ! Anye amaanọ adidem Defid ayịn a-anieghe aniọñ, a-anieghe ifiọk ye ikike, a-adiibọp tembịd inọ Abọọñ ye akwere abọọñ inọ idem amọ.

13 "Ami nsʌk nnọ Huram-Abi usọk fiin, awo a-anieghe akpọsọñ ifiọk ke utomusọ, 14 eka amọ aketo Daan ndin ete amọ aketo Tai. Anye akekpeep adinam ñkpọ ke kold ye silfa, brọns ye ukwak, itiad ye eto, ye ke ndad-ndad ye abubịd ye iduod-iduod afọñ ye linen. Anye anie ifiọk abaña afịd adimịñ ñkpọ anyʌñ akeme adimịñ se utọ ñkpọ akeedodo e-enọọhọ anye. Anye ayaanam utom ye mbon unie ifiọk utom mfo ye mbon utom abọọñ mmi, Defid ete mfo.

15 "Ke ami yak abọọñ mmi anọ nditọufọk amọ abakpa ye baali ye adan ọlif ye ukọd ado anye akenwọñọke, 16 ñnyịn iyainyʌñ ikpịkke afịd ukpịd eto ke Lebanọn ake afo ayemme inyʌñ ibọọp ammọ idian inam efiọọrọ ke akpainyañ esuuk eka Yopa. Afo amekeme adikoono ammọ ndin akaa Yeruselem."

17 Sọlọmọn amaanam ibad afịd isenawo ekedʌññọ ke Isrel, ke ubadawo ete amọ Defid akenamma amaakeboiyo; anyʌñ akịt ke ammọ ekedo tọsịn ikie keed mme aba mme duob mme ita mme ikie itiokeed (153,600). 18 Anye amaasịn mbon awo tọsịn ata mme duob (70,000) ke ufʌn adinam utom ubiom mbiomo ye mbon awo tọsịn anaañ nte mbon ukpịkke itiad ke mme abod, ye mbon awo tọsịn ita mme ikie itiokeed (3,600) edise ñkpọ mbaña mbon e-enamma utom ñnyʌñ ñkịt mbo ke ammọ enam utom.