1 Ke ini emaekesọọñọ itie Rehoboam nte adidem ndin anye amaanyʌñ akappa ado akpọsọñ, anye ye afịd mbon Isrel emaekpọñ mbed Abọọñ. 2 Sia ammọ ikinamma akpanikọ ye Abọọñ, Sisak adidem Iyib amaanwana ekọñ ye Yeruselem ke ayọhọ isua ition ke ukara adidem Rehoboam. 3 Ye sariọd ikie duob mme iba (1,200) ye mme awad enañmbakara tọsịn ata (60,000) ye ananaibad mbon ekọñ Libia, Sukim ye mbon Kuus ekedieghe ye anye eto Iyib, 4 anye amaadat mme ñkpọsọñ abio ke Yuda anyʌñ adi tutu awuọ Yeruselem.

5 Akem prọfed Semaiya amaadi abịne Rehoboam ye mme adadusʌñ ke Yuda ekesooboke ke Yeruselem, ke ntak ndịk Sisak akenamma ammọ, ndin anye amaabo ammọ, "Ami ado se Abọọñ atañ, ‘Ndufo emaeñkpọñ miin; ke ntoro, ami mme isịn ndufo idahami ñyaak nnọ Sisak.’ "

6 Mme adaiwuod ke Isrel ye adidem emaesuuhọ idem ammọ enyʌñ ebo, "Abọọñ ado adinen."

7 Ke ini Abọọñ amaakekịt ke ammọ emaesuuhọ idem ammọ, ikọ Abọọñ ami amaadi abịne Semaiya: "Sia ammọ emaekesuuhọ idem ammọ, ami ndiisoboke ammọ ado ñyaasọp nnọ ammọ adinyaaña. Mbooho nduọk iyadesịd mmi ndot Yeruselem ato Sisak. 8 Ammọ, eyaekappa edo ifʌn enọ anye, nọ ato do ammọ ekịt ukpʌhọde a-abaaha ke adinam ñkpọ innọọ miin ye adinam ñkpọ nnọọ mme ndidem abio mfen."

9 Ke ini Sisak adidem Iyib akenwanake ekọñ ye Yeruselem, anye amaabiom mme ñkpọuto ke tembịd Abọọñ asioño ye mme ñkpọuto ke ufọkadidem. Anye amaakoono afịd ñkpọ, tutu awuọ mme atuekọñ kold ake Sọlọmọn akenaññake. 10 Ke ntak ado, Adidem Rehoboam amaanam mme atuekọñ ke akpoho nọ edat itie mbon ekekoonoke do anyʌñ abakka ammọ anọ mme adaiso mbon ukpeme ekebaaha ke utom ke inuaatob ufọkadidem. 11 Ini akeedodo adidem akekaaha tembịd Abọọñ, mme mbon ukpeme emaekama mme atuekọñ, ndin ekoono ammọ ekebono ke ufọk ukpeme ke emaekema.

12 Sia Rehoboam amaasuuhọ idem amọ, iyadesịd Abọọñ amaawọññọ akpọñ anye, ndin ikisoboke anye afịd-afịd. Ke aditịm ntañ, usʌk nti ñkpọ emaeba ke Yuda.

13 Adidem Rehoboam amaasọọñọ itie amọ mfọn-mfọn ke Yeruselem anyʌñ akaiso nte adidem. Anye akedo isua aba mme keed idaha anye akedooho adidem, ndin anye amaakara isua duob mme itiaba ke Yeruselem, abio ake Abọọñ akemekke asio ke atu mme esiin Isrel nọ anịm Anyịñ Amọ. Anyịñ eka amọ akedo Naama; anye akedo awonwaan Amọn. 14 Anye amaanam idiọọk sia anye ikinịmme esịd amọ ke adiyem Abọọñ.

15 Amaado mme edinam ke ukara Rehoboam, tọọñọ ke ntọọñọ tutu asịm utịd, ado nte awo iwette ammọ isịn ke mme ñwed prọfed Semaiya ye ake Iddo akịdñkukịd a-aseeghe ñkpọ abaña mme mbʌk emana? Ekọñ akekaaka iso aba ke ufọọd Rehoboam ye Yerobuam. 16 Rehoboam amaakeduọk adudu ye mme eteete amọ ndin emaebuuk anye ke Abio Defid. Ndin Abiya ayịn amọ amaadat itie amọ nte adidem.