1 Manase akedo isua duob mme iba idaha anye akedooho adidem, ndin anye amaakara ke Yeruselem isua aba mme duob mme ition. 2 Anye amaanam idiọọkñkpọ ke iso Abọọñ, akeene mme abʌd-abʌd mbubiam ido ake mme idịd Abọọñ akebịnne asio anọ mbon Isrel. 3 Anye amaamaana abọp mme ñkoñ-ñkoñ itie ake ete amọ Hesikaiya amaakewuut; anye amaanyʌñ awui mme akpokoro uwa anọ mme Baal anyʌñ anam mme abai anọ Asera. Anye amaatuak iwuod anọ afịd udịmanyọñ anyʌñ akpono ammọ. 4 Anye amaabọp mme akpokoro uwa ke tembịd Abọọñ, a-adooho Abọọñ amaabobo, "Anyịñ mmi adiiba ke Yeruselem ke nsi-nsi." 5 Ke naña akwere iba ke tembịd Abọọñ, anye amaabọp mme akpokoro uwa anọ afịd mme udịmanyọñ. 6 Anye amaawa nditọ amọ ke ikañ ke Abedeñ Ben Hinọm, abre idiọñ ye ifọd, aduuñọ ñkpọ, anyʌñ akaa abịne mbon useñkpọ ye mbiamfa. Anye amaanam uwak mbubiam ndiọiñkpọ ke iso Abọọñ, anam iyadesịd amọ ademme.

7 Anye amaaben ukakab ñkpọ a-anye akenamma akewuuk ke esịd tembịd Abasi, a-adooho Abasi amaabo Defid ye ayịn amọ Sọlọmọn, "Ke tembịd ami ye ke Yeruselem, ake ami mmekke nsio ke atu mme esiin Isrel, ke ndiinịm Anyịñ mmi ke nsi-nsi. 8 Ami ndiinamma aba ñkpad mbon Isrel akpọñ isọñ ake ami ñkemekke nnọ mme eteete ndufo, adieke ammọ ediikpeme edinam afịd ñkpọ se ami ñkewuuk nnọ ammọ ke abaña afịd mbed, mme ewʌhọ ye mme item añkenọọhọ nto Moses." 9 Ado Manase amaadat Yuda ye mbon Yeruselem atịn usʌñ, ke ntoro ammọ emaenam ndiọiñkpọ a-akekanna ake mme idịd ake Abọọñ akesoboke mbemiso mbon Isrel.

10 Abọọñ amaatañ ikọ anọ Manase ye mbon amọ, ado amọ ikikpañña utọñ. 11 Ke ntoro Abọọñ amaadat mme adaiso ekọñ ake adidem Asiria, e-ekebenne Manase nte awo ñkpakọb, esịn ekọb ke iwuo amọ, ebọp anye ke akpoho ubọbubọk enyʌñ eben anye enyọñ Babilọn. 12 Ke nnananyen amọ anye amaayem mfọn ato Abọọñ Abasi amọ anyʌñ anekke asuukidem amọ ekamba-ekamba ke iso Abasi mme eteete amọ. 13 Ndin ke ini anye akebọññọ akam anọ anye, Abọọñ amaanie mbọm abaña aseeme amọ anyʌñ akop ñkpeubọk amọ; ntoro ke anye akeben anye atịmme anyọñ Yeruselem ye ubọọñ amọ. Ndin Manase amaadiọọñọ ke Abọọñ ado Abasi.

14 Ami amaakeboiyo anye amaatịmme abọp iso ndibene Abio Defid, ke usobutịn idịm Kihọn ke abedeñ, tutu akesịm inuausʌñ ke Inuaatob Iyak anyʌñ akanna abod Ofel akʌk; anye ñko amaanam anye akoñño akan akpa. Anye amaanịm mme adaiso ekọñ ke mme abio ndibene ke Yuda.

15 Anye amaasịññe mme isen abasi anyʌñ akesio mbid usioidem ke tembịd Abọọñ, kpa ye afịd akpokoro uwa a-anye akebọppọ ke tembịd ye ke Yeruselem; anyʌñ asịññe ammọ ke abio atoomo aduọọñọ. 16 Anye amaatịmme abọp akpokoro uwa Abọọñ anyʌñ awa uwa ewuana keed ye uwa ekọọm do, amaanyʌñ adọkkọ Yuda ate yak enam ñkpọ enọ Abọọñ, Abasi Isrel. 17 Kpayeado, mme awo emaekaa iso adiwa uwa ke mme ñkoñ-ñkoñ itie, ado ekenam enọ Abọọñ Abasi ammọ kpọd.

18 Mme ñkpọ mfen se ikitịppe ke ukara Manase, diana ye akam anye akebọññọ anọ Abasi amọ ye mme ikọ ake mbon ñkukịd eketañña enọ anye ke anyịñ Abọọñ, Abasi Isrel, ado se ewet esịn ke mme ñwed mbʌkutom ndidem Isrel. 19 Akam amọ ye naña Abasi akebenne idem ke eseeme amọ, ukem ye afịd mme idiọọkñkpọ ye unana mbuọdidem, ye mme itie a-anye akebọppọ mme ñkoñ-ñkoñ itie anyʌñ awuuk mme abai Asera ye mme usọsọi ñkpọ mbemiso anye asuuk idem amọ, afịd ami emaewet ke mme ñwed mme akịdñkukịd. 20 Manase amaaduọk adudu ye mme eteete amọ emaenyʌñ ebuuk anye ke ufọkubọọñ amọ. Ndin Amọn ayịn amọ awodeen amaadat itie amọ nte adidem.

21 Amọn akedo isua edịb mme iba idaha anye akedooho adidem, ndin anye amaakara ke Yeruselem isua iba. 22 Anye amaanam idiọọkñkpọ ke iso Abọọñ, kpa naña ete amọ Manase akenam. Amọn amaakpono anyʌñ awa mme uwa anọ afịd ndem ake Manase akenamma. 23 Anye ikisuuhọke idem amọ ke iso Abọọñ, nte ete amọ Manase; Amọn amaanam ndudue amọ atọt.

24 Mme adaaha Amọn emaedʌk idiọọk adu ebaña anye enyʌñ ewot anye ke ufọkubọọñ amọ. 25 Akem mbon abio emaewot afịd mbon se ikidʌk idiọọk adu ibaña Adidem Amọn, ndin ammọ emaenam Yosaiya ayịn amọ adidem ke itie amọ.