1 Mbon Yeruselem emaenam Ahasaiya, akpatre ayịn Yehoram, adidem ke itie amọ, sia mme udịm ekọñ, e-ekesañake edi ye mbon Arab ekedʌkkọ itie nnaaekọñ, emaewot afịd ikpọ nditọ ideen. Ke ntoro Ahasaiya ayịn Yehoram adidem Yuda amaatọọñọ akara.

2 Ahasaiya akesọñ isua edịb mme iba idaha anye akedooho adidem, anyʌñ akara ke Yeruselem isua keed. Anyịñ eka amọ akedo Atalia, ayeyịn awonwaan Omri.

3 Anye ñko amaakeene ke mme usʌñ ufọk Ehab, sia eka amọ amaasọọñọ anye ukod adinam idiọọkñkpọ. 4 Anye amaanam idiọọkñkpọ ke iso Abọọñ, kpa naña ufọk Ehab akenam, sia ke ete amọ amaakekpa ammọ emaekappa edoñño mme anọitem amọ, a-akedatta anye anọ nsobo. 5 Anye amaanyʌñ akeene item ammọ ke ini anye akekeeneke Yoram ayịn Ehab adidem Isrel adinwana ekọñ ye Hasel adidem Aram ke Ramọd Kilied. Mbon Aram emaenọ Yoram unan; 6 ndin Yoram amaanyọñ akaa Yesriil adikisọbọ unan ake ammọ ekenọọhọ anye ke Ramọd ke ekọñ amọ ye Hasel adidem Aram.

Ndin Ahasaiya ayịn Yehoram adidem Yuda amaakaa Yesriil adikise Yoram ayịn Ehab, sia emaenọ anye unan.

7 Ato ke Ahasaiya adika ñkese Yoram, Abasi amaaben iduọ asọk Ahasaiya. Ke ini Ahasaiya akesịmme, anye amaawuọ ye Yoram akesoobo ye Yehu ayịn Nimsi, ami Abọọñ akeyette adan anịm nọ asobo ufọk Ehab. 8 Ke ini Yehu akesʌkkọ anọ ufọk Ehab ufen, anye amaakịt mme adaaha ke Yuda ye nditọ mbon ufọk Ahasaiya, e-ekenamma ñkpọ enọ Ahasaiya, ndin anye amaawoot ammọ. 9 Anye ndin amaakaa akeyem Ahasaiya, mbon amọ ekemʌm anye ke itie anye akedịbeke ke Sameria. Emaeben anye esọk Yehu ndin emaewot anye. Ammọ emaebuuk anye, sia ammọ emaebo, "Anye akedo ayịn Yehosafad, ami akeyemme Abọọñ ke afịd esịd amọ." Ke ntoro ikibaaha awo ke ufọk Ahasaiya a-akenieghe adudu akem adisʌk ñkama abio adidem.

10 Atalia eka Ahasaiya amaakekịt ke ayịn imọ amaakpa, anye amaadakka akesobo afịd mbon ufọk adidem ke Yuda. 11 Ado Yehoseba, ayịn awonwaan Adidem Yehoram, amaaben Yoas ayịn Ahasaiya anyʌñ ayịp anye asio ke atu nditọ ideen adidem ke ufọk ubọọñ a-akenaaha nte ewoot anyʌñ asịn anye ye adeb amọ ke esịd ubeed. Sia Yehoseba, ayịn awonwaan adidem Yehoram akenyʌññọ ado anwaan aku Yehoiyada, akedo ayịneka Ahasaiya, anye amaadịp ayịn ado iyakka Atalia akan awot anye. 12 Anye amaakaa iso adịbe ye ammọ ke tembịd Abasi ke isua itiokeed ke idaha ini Atalia akekarake abio.