1 Ke utịd isua edịb, idaha Sọlọmọn akedatta abọp tembịd Abọọñ ye ufọkadidem amọ, 2 Sọlọmọn amaamaana abọp mme idʌñ ake Hiram akenọọhọ anye, anyʌñ anam mbon Isrel ekedʌñọ ke ammọ. 3 Akem Sọlọmọn amaadakka akaa Hamad Soba anyʌñ akeben anye adat. 4 Anye amaanyʌñ abọp Tadmọọ ke akpautatan ye afịd mme abio unịm ñkpọ a-anye akebọppọ ke Hamad. 5 Anye amaamaana abọp Adoro Bed Họrọn ye Usuuk Bed Họrọn nte ñkpọsọñ abio, ye ndibene ye inuaatob ye mme ñkpahausʌñ, 6 ñko ke Baalad ye afịd mme abio ubonoñkpọ Sọlọmọn, ye afịd mme abio ake mme sariọd ye mme enañmbakara amọ, se adodo ake anye akpekeyemme adibọp ke Yeruselem, ke Lebanọn ye ke afịd itie se anye akekara.

7 Akesʌk ababa mbon awo ekesʌhọke ke atu mbon Hed, mbon Amọọ, mbon Peris mbon Hif, ye mbon Yebus (mbon ami ikidoññoke mbon Isrel). 8 Sọlọmọn amaanyịk anyʌñ akoono mme ubon afịd mbon ekesʌhọke ke isọñ ake mbon Isrel imiikikanna isobo ima nọ enam utom enọ ammọ nte ifʌn mbon utom, kpa naña asʌk aba tutu adiwuọ mfịn. 9 Ado Sọlọmọn ikidatta mbon Isrel nte ifʌn nọ enam utom amọ; ammọ ekedoñño mme anwana ekọñ, mme etubom ukpeme amọ, ye mme etubom ukpeme mme sariọd ye mme andiwad mme sariọd. 10 Ñko ammọ ekedoñño mme ikpọ mbọọñ enọ Adidem Sọlọmọn, mme adaaha ikie iba mme aba mme duob (250) eseeghe ñkpọ ebaña mbon utom.

11 Sọlọmọn amaaben ayịn Fero awonwaan ato ke Abio Defid adi ke ufọkadidem a-anye akebọppọ anọ anye akpọ-akpọ, sia anye akebo, "Anwaan mmi inaaha adʌñ ke ufọkadidem ake Defid adidem Isrel, sia mme itie ake akebe edioomo Abọọñ adʌkkọ edoñño adisana."

12 Ke akpokoro uwa Abọọñ a-anye akebọppọ ke iso atekke, Sọlọmọn amaawa ufọfọb uwa anọ Abọọñ, 13 naña asaña akekem ye mme ubonoñkpọ mme usen unam uwa kpa naña ewʌhọ Moses aketemme abaña Sabad, mme Ufa Afiọñ ye mme usọrọ ita ke isua e-edooho: Usọrọ Uyo ake yiis imiisịneke, Usọrọ mme Udua ye Usọrọ mme Tabanakịd. 14 Ke adikeene ido ake ete amọ Defid akenịmme, anye amaamek mme ikpeghe mme aku anọ ammọ mme utom, ndin mme Lifai nọ edat usʌñ ke itooro enyʌñ enwam mme aku nte asañake akekem ke mme utom usen keedekeed. Anye amaanyʌñ amek mme akpeme inuaatob ke mme ikpeghe anọ nsio-nsio inuaatob, sia ami ado se Defid awo Abasi aketemme. 15 Ammọ ikikpọññọ item ake adidem akenọọhọ mme aku me akenọọhọ mme Lifai ke ñkpọ akeedodo, kpa ye anye a-akebañake mme itie unịm ñkpọuto.

16 Emaenam afịd utom Sọlọmọn, tọọñọ ke usen ekesịnne itiad idakisọñ ake tembịd Abọọñ tutu ekweeñe.

17 Akema Sọlọmọn amaakaa Esiọn Keba ye Elad ke esʌk Edọm. 18 Ndin Hiram amaanọ mme nsʌñikañ ake mbon amọ ekedooho mme adaiwuod esọk anye, mme awadinyañ ekediọọñọke akpa. Mbon ami, ye mbon Sọlọmọn, emaewat ekaa Ọfia enyʌñ ekeben talen kold ikie inaañ mme aba mme duob (450)* enyọñ edi, a-ammọ ekeyaaha enọ adidem Sọlọmọn.