1 Ke ami amaakeboiyo, mbon Mọb ye mbon Amọn ye usʌk mbon Meun emaeditịppe ekọñ ye Yehosafad.

2 Usʌk awo emaedidọkkọ Yehosafad, "Akwa atu mbon ekọñ esʌk eto ke Edọm edinwana ye afo, eto ke edem ñkañ Ñkpaikpa Inyañ ako. Ammọ ebaba ke Hasesọn Tama" (a-adooho, En Kedi). 3 Akedịkke, Yehosafad amaabiide adiyem iso Abọọñ, anyʌñ abo etie utreudia ke afịd Yuda. 4 Mbon Yuda emaedi atọ keed ediyem unwam nto Abọọñ; ke akpan, ammọ emaeto afịd abio ke Yuda ediyem anye.

5 Akem Yehosafad amaadakka ada ke esob Yuda ye Yeruselem ke tembịd Abọọñ ke iso ufa akwere 6 anyʌñ abo:

"Abọọñ, Abasi mme eteete ñnyịn, nte idooho afo ado Abasi a-abaaha ke anyọñ? Afo akara afịd mme ebekpo ke mme idịd. Adudu ye ukeme esịne ke ubọk mfo, ndin awo ndomokeed ikemeke adida ñka-ñka ye afo. 7 Abasi ñnyịn, nte afo ukubịneke mme awo ekedʌññọ ke isọñ ami usịññe ke iso mbon mfo Isrel unyʌñ uyaak anye unọ ubon Ebraham ufan mfo ke nsi-nsi? 8 Ammọ emaedʌñọ ke esịd amọ enyʌñ ebọp ke esịd amọ adisana itie enọ Anyịñ mfo, enyʌñ ebo, 9 ‘Adieke ñkpọntịppe adiighe ibịne ñnyịn, me ado ubiomikpe ake akañkañ, me idiọọk udọñọ me akañ, ke ñnyịn iyaida ke iso mfo ke tembịd ami a-akereke Anyịñ mfo inyʌñ iseeme unọ fiin ke mfịna ñnyịn, ndin afo ayaakop anyʌñ inyaaña ñnyịn.’

10 "Ado idahami se mbon Amọn mi, Mọb ye Abod Sei, a-adooho afo ukuyakka Isrel edʌk idʌñ ammọ ke ini ammọ ekewuọñọke ke Iyib; ammọ emaekanna edem ekpọñ ammọ ikinyʌññọ isobo ammọ. 11 Se naña ammọ isio ñnyịn usiene ke adidibịne ñnyịn nsioño ke inie afo akinọọhọ ñnyịn nte udeeme. 12 Abasi ñnyịn, nte afo uduukpeeghe ikpe unọ ammọ? Sia ñnyịn inieghe adudu adinwana ye ekamba udịm ekọñ e-ediighe anwan ye ñnyịn. Ñnyịn idiọọñọke se ikpinam, ado anyen ñnyịn use fiin."

13 Afịd ideen ke Yuda, ye mme ibaan ammọ, ye nditọ ye ntəkayịn, emaeda do ke iso Abọọñ.

14 Akem Sịbidịd Abọọñ amaadidoro Yahasiel ayịn Sakaraiya, ayịn Benaiya, ayịn Yeiyel, ayịn Matania, awo Lifai ye awo ubon Asaf, naña anye akedaaha ke esob.

15 Anye amaabo: "Ikpañ utọñ, adidem Yehosafad ye afịd mbon e-edʌñọke ke Yuda ye Yeruselem! Ami ado se Abọọñ idọkkọ ndufo: ‘Ikiifeghe ndịk ikiinyʌñ inie iduọesịd ke ntak ekamba udịm ekọñ ami. Sia ekọñ unieghe fiin, ado anie Abasi. 16 Ñkpọñ imia ikpad isọiyọ ikinwana ye ammọ. Ammọ ediidọdọọk ke Mfrọ Siis, ndin ndufo eyaekịt ammọ ke utịd abedeñ ke Akpautatan Yeruel. 17 Ndufo idiinieghe adinwana ekọñ ami. Idat itie ndufo; isọọñọ ida inyʌñ ikịt adinyaaña ake Abọọñ adiinọ ndufo, Yuda ye Yeruselem. Ikiifeghe ndịk; ikiinie iduọesịd. Iwuọ ikaa ikinwana ye ammọ ñkpọñ, ndin Abọọñ ayaaba ye ndufo.’ "

18 Yehosafad amaanyuuk iwuod ye iso amọ ase isọñ, ndin afịd mbon Yuda ye Yeruselem emaeduọññọ enọ ukpono ke iso Abọọñ. 19 Akem usʌk mme Lifai e-eketooho ubon Kohad ye ubon Kora emaedakka eda etooro Abọọñ, Abasi Isrel, ke ataa akpọsọñ uyio.

20 Ke usiere ubakusen ammọ emaekpọñ ekaa ke Akpautatan Tekoa. Idaha ammọ ekedakkake, Yehosafad amaada anyʌñ abo, "Ikpañ utọñ innọ miin, Yuda ye mbon Yeruselem! Inie mbuọdidem ke Abọọñ Abasi ndufo ndin eyaibenne ndufo; inie mbuọdidem ke ikọ mme prọfed ndin ndufo eyaenie unen." 21 Ke anye amaakekọọk iwuod ye mme awo ama, Yehosafad amaamek mme awo nọ ekwọ ikwọ enọ Abọọñ enyʌñ etooro anye ke adisana uyai amọ nte ammọ ewuọñọke enyʌñ edat mbon ekọñ usʌñ, ebo:

"Inọ Abọọñ ekọọm,

sia ima amọ aba ke nsi-nsi."

22 Naña ammọ eketọọñọke edikwọ ñnyʌñ ntooro, Abọọñ amaanịm mbon udịbe ke ikọd ebịne mbon Amọn ye Mọb ye Abod Sei e-ekediighe ekọñ ye Yuda, ndin emaekan ammọ. 23 Mbon Amọn ye mbon Mọb emaedakka eda enwana ye mbon e-etooho Abod Sei esobo enyʌñ esuan ammọ. Ke ammọ emaekekweeñe adiwoot mbon e-etooho Sei, ammọ emaenwam edisobo emọ-emọ.

24 Ke ini mbon Yuda ekedisịmme itie a-asakkaiso ase akpautatan enyʌñ eda ese ñkañ itie ekamba mbon ekọñ, ammọ ekekịt akpo awo ikpọọñ nte ebono ke isọñ; awo ndomokeed ikibọkkọke. 25 Ke ntoro Yehosafad ye mbon amọ emaekaa ekekoono mbịme ammọ, ndin ammọ emaekịt ke atu ammọ ekamba mme ñkpọ utom ye nsiine akọrọ ye mme ñkpọuto, awakka akan se ammọ ekekan eben enyọñọ. Mbịme amaawak tutu ndin akedat usen ita adikoono mmaa. 26 Ke ayọhọ usen inaañ ammọ emaeboho ke Abedeñ Beraka*, itie ake ammọ eketooroke Abọọñ. Ami ado ntak e-ekoodo anye Abedeñ Beraka tutu mfịn ami.

27 Amaakekem, ke ndadusʌñ Yehosafad, afịd mbon Yuda ye Yeruselem emaetịmme enyọñọ Yeruselem ke idaara, sia Abọọñ amaanọ ammọ ntak edidaara ke iwuod mme asua ammọ. 28 Ammọ emaekedʌk Yeruselem enyʌñ ekaa ke tembịd Abọọñ ye mme ekpa ye mme ndidoudʌk ye mme adukpoñ.

29 Ndịk Abasi amaamʌm afịd mme ñkanñkʌk abio ndidem ke ini ammọ ekekoppo naña Abọọñ akenwana akan mme asua Isrel. 30 Ndin abio adidem Yehosafad amaanie emem, sia Abasi amọ amaanọ anye nduọkadudu ke afịd usʌñ.

31 Ndin Yehosafad amaakara ke Yuda. Anye akedo awo isua edịb mme duob mme ition idaha anye akedooho adidem ke Yuda, ndin anye amaanyʌñ akara ke Yeruselem isua edịb mme ition. Anyịñ eka amọ akedo Asuba ayịn awonwaan Silhi. 32 Anye amaakeene ke mme usʌñ ete amọ Asa, ikinyʌññọ iwọññọ ikpọñ ammọ; anye amaanam se inen ke iso Abọọñ. 33 Ado anye ikisịññeke mme ñkoñ-ñkoñ itie, ndin mme awo ikisịnne esịd ammọ ke Abasi mme eteete ammọ.

34 Mme edinam mfen ke ukara Yehosafad, tọọñọ ke ntọọñọ tutu akpatre, ewet ke ñwed mbʌk Yehu ayịn Hanani, naña ewet esịn ke ñwed mme ndidem Isrel.

35 Akema, Yehosafad adidem Yuda amaanam unyịmme adidiana keed ye Ahasaiya adidem Isrel, a-adooho mme usʌñ amọ ekedo ibak. 36 Anye amaanyịmme ye anye adibọp mme udịm ubom udua aka Taasis. Ke emaekebọp ammọ ke Esiọn Keba, 37 Eliesa ayịn Dodafahu ake Maresa amaatañ prọfesi abaña Yehosafad, ate, "Sia afo amaakedian idem ye Ahasaiya, Abọọñ ayaasobo se afo anam." Mme ubom emaesịp ndin ikikanna ika mbịn ke Taasis.