1 Ke ini ntoro Yehosafad amaanie uwak inie ye ukpono, ndin anye akedian idem amọ ye Ehab ke ndọ. 2 Ke isua ifañ amaakeboiyo anye amaakaa adikikịt Ehab ke Sameria. Ehab amaawot uwak-uwak edọñ ye enañ anọ anye ye mbon awo ekebaaha ye anye anyʌñ akpeiye anye yak anwana ekọñ ye Ramọd Kilied. 3 Ehab adidem Isrel amaabịp Yehosafad adidem Yuda, "Nte afo ayañkeene miin akenwana ekọñ ye Ramọd Kilied?"

Yehosafad amaabọọrọ, "Ami ntie nte afo, mbon mmi nte mbon mfo; ñnyịn iyaukeene ika ekọñ ado." 4 Ado Yehosafad amaanyʌñ abo adidem Isrel, "Ado akpa ñkpọ yem item Abọọñ."

5 Ndin adidem Isrel amaakoono mme prọfed abon itie keed, ideen ikie inaañ (400), anyʌñ abịp ammọ, "Nte ñnyịn ika ekọñ ye Ramọd Kilied, me ke ami ñkaa?"

Ammọ emaebọọrọ, "Kaa sia Abasi ayaayaak anye asịn ke ubọk adidem."

6 Ado Yehosafad amaabịp, "Nte prọfed Abọọñ ibaaha aba se ñnyịn ikeme ibịp nto?"

7 Adidem Isrel amaabọọrọ Yehosafad, "Prọfed keed asʌk aba ake ñnyịn ikemeke adibịp nto Abọọñ, ado ami nsuasua anye sia anye isitañña eti ñkpọ ndomokeed imbaña miin, ado asʌk ado idiọọk afịd ini. Anye ado Maikaiya ayịn Imla."

Yehosafad amaabọọrọ, "Adidem ikpinaaha atañ utọ ikọ ado."

8 Ndin adidem Isrel amaakoot keed ke atu mme adaaha amọ amaanyʌñ abo, "Koot Maikaiya ayịn Imla di ini keed."

9 Ke emaekesịne mme afọñ ubọọñ, adidem Isrel ye Yehosafad adidem Yuda eketie ke mme ebekpo ammọ ke afe ubeek abakpa ke inuaatob Sameria, ye afịd mme prọfed naña esʌk etañ ñkukịd ke iso ammọ. 10 Ndin Sedekaiya ayịn Kenaana amaanam mme nnʌk ukwak ndin anye amaabo, "Ntom ke Abọọñ abo: ‘Ye mme ñkpọ ami afo ayaakuum mbon Aram tutu esobo ammọ.’ "

11 Afịd mme prọfed mbon ñko ekesʌk etañ kpa ukem etob ado. Ammọ emaebo, "Nwana ye Ramọd Kilied nyʌñ bọ edikan, sia Abọọñ ayaayaak anye asịn ke ubọk adidem."

12 Isʌñutom a-akekaaha adikoot Maikaiya amaabo anye, "Se, afịd mme prọfed mbon ñko, isioho awo eto, esʌk ekịt edikan enọ adidem. Yak ikọ mfo asaña akekem ye ake ammọ, nyʌñ tañ inem-inem ikọ."

13 Ado Maikaiya amaabo, "Adaña nte Abọọñ aduuho uwem, ami ndiidọkkọ anye se Abasi mmi atañ kpọd."

14 Anye amaakedisịm, adidem amaabịp anye, "Maikaiya, nte ñnyịn ika ekọñ ye Ramọd Kilied, me ke ami ñkaa?"

Anye amaabọọrọ, "Nwana nyʌñ nie edikan, sia eyaeben ammọ usịn fiin ke ubọk."

15 Adidem amaabo anye, "Akañ ifañ ke ana ami nnam nọ afo anwọñọ aditre aditañ ñkpọ ndomokeed ñkan akpanikọ kpọd innọ miin ke anyịñ Abọọñ?"

16 Ndin Maikaiya amaabọọrọ, "Ami mmaakịt afịd Isrel naña esuana ke mme abod nte mme edọñ ake imiinieghe akpemeedọñ, ndin Abọọñ amaabo, ‘Ibon ami inieghe etubom. Yak awo keedekeed anyọñ ufọk amọ ke emem.’ "

17 Adidem Isrel amaabo Yehosafad, "Ado nte ami ñkudọkkọke mbo ke anye isitañña eti ñkukịd ndomokeed imbaña miin, kpa idiọọk kpọd?"

18 Maikaiya amaakaa iso abo, "Ke ntoro kop ikọ Abọọñ: Ami mmaakịt Abọọñ naña atie ke ebekpo amọ ye afịd mbon udịm anyọñ naña eda ekanna anye ke nnasia ye ke ufiin. 19 Ndin Abọọñ amaabo, ‘Anie awo idiitap Ehab adidem Isrel nọ anye akenwana ekọñ ye Ramọd Kilied ndin anyʌñ akesoobo ñkpa amọ do?’ "

"Nsio-nsio awo emaenọ nsio-nsio akikere. 20 Ke akpatre, sịbidịd keed amaawuọ adi, akeda ke iso Abọọñ ndin amaabo, ‘ami ñyaatap anye.’ "

Abọọñ amaabịp, " ‘Uduunam ke nsoo utọ usʌñ?’ "

21 Anye amaabo, " ‘Ami ñyaakaa ñkedo sịbidịd abiaña ke inua afịd mme prọfed amọ.’ Afo ayaanam afọn ke aditap anye, ‘Kaa nyʌñ kenam ntoro.’

22 "Ndin idahami Abọọñ asịn sịbidịd abiaña ke inua mme prọfed mfo ami. Abọọñ a-abiide nsobo unọ fiin."

23 Ndin Sedekaiya ayịn Kenaana amaadakka akesiak Maikaiya ufia ke iso. Anye amaabịp, "Usʌñ uke ke sịbidịd aketooho Abọọñ akekaa idaha anye akentooho miin aditañ ikọ ye afo?"

24 Maikaiya amaabọọrọ, "Afo ayaadiọọñọ ke usen se afo uduukudịbe ke esịd ubeed keed."

25 Ndin adidem Isrel amaanọ uyio, "Ben Maikaiya nyʌñ nọ anye atịmme abịne Amọn adaukara ke abio ye Yoas ayịn adidem, 26 ndin bo, ‘Ntom ke adidem abo: Sịn awo ami ke ñkpakọb ndin kuunyʌñ unọọ anye ñkpọ mfen ukan uyo ye mmọọñ tutu ñnyọñ ndi ke ifuuro.’ "

27 Maikaiya amaabo, "Afo ukpusʌk unyọñ udi ke ifuuro, awuọ Abọọñ iboiyoke ke ami itañ." Ndin anye amaadian, "Iwet ikọ mmi inịm, afịd ndufo!"

28 Ndin adidem Isrel ye Yehosafad adidem Yuda emaedọọk ekaa Ramọd Kilied. 29 Adidem Isrel amaabo Yehosafad, "Ami ñyaadedịp idem ndʌk ekọñ, ado afo sịne mme afọñ ubọọñ mfo." Ndin adidem Isrel amaadịp idem amọ akaa ekọñ.

30 Ndin adidem Aram amaanọ mme adaiso mme sariọd amọ uyio, "Ikiinwana ye awo ndomokeed, etək me ekamba, ibọhọke adidem Isrel." 31 Ke ini mme adaiso sariọd ekekịtte Yehosafad, ammọ ekekere, "Anye ami ado adidem Isrel." Ke ntoro ammọ emaetịmme ekaa edinwana ye anye, ado Yehosafad amaasio ñkpo, ndin Abọọñ amaanwam anye. Abasi amaadʌt ammọ akpọñ anye, 32 sia idaha mme adaiso sariọd ekekịtte ke idooho anye ado adidem Isrel, ammọ emaetre edibịne anye.

33 Ado awo keed ke idueanyen amaadʌt utịgha amọ ntịme-ntịme ndin amaaketịgha adidem Isrel ke ufọọd usoobo ñkpaha ikpanesịd ye afọñ ekọñ. Adidem amaabo awad sariọd amọ, "Kanna iso nyʌñ mben miin wat sio ke itie anwan ami. Ennọ miin unan." 34 Afịd usen ado ekọñ amaanekke asọñ, ndin adidem Isrel amaasọọñọ abere ke sariọd amọ asak iso ase mbon Aram tutu ndubiayio. Ado ke usobutịn anye amaakpa.