1 Yosaiya amaanam Usọrọ Nsaña Mboiyo anọ Abọọñ ke Yeruselem, ndin emaewot ayịnedọñ Nsaña Mboiyo ke ayọhọ usen duob mme inaañ ke akpa afiọñ. 2 Anye amaamek mme aku anọ mme utom ammọ anyʌñ asọọñọ ammọ idem adinam utom ke tembịd Abọọñ. 3 Anye amaabo mme Lifai, e-ekenọọhọ mbon Isrel ukpeebñkpọ e-ekenyʌññọ enịm asaña-asaña enọ Abọọñ: "Inịm adisana akebe edioomo ke tembịd ake Sọlọmọn ayịn Defid adidem Isrel akebọppọ. Inaaha nte edot anye ke afara ndufo ekama esaña. Idahami inam ñkpọ inọ Abọọñ Abasi ndufo ye mbon amọ Isrel. 4 Inam mbeeñeidem ke mme ufọk ke mme ikpeghe ndufo, nte asañake akekem ke mme ukpeeb ñkpọ ake Defid adidem Isrel akewette ye ayịn amọ Sọlọmọn.

5 "Ida ke adisana itie ye atu mme Lifai ke ikpeghe keedekeed ke mme ufọk ake nditọete ndufo mbon Isrel, ñkaña awo. 6 Iwoot mme ñyịn edọñ Usọrọ Nsaña Mboiyo, inịm idem ndufo asaña-asaña inyʌñ idiọñ ñyịn edọñ inịm inọ mbon Isrel nditọete ndufo, inam ewʌhọ se Abọọñ akenọọ ato Moses."

7 Yosaiya amaanọ afịd mbon abio se ikiba do ñyịn edọñ tọsịn edịb mme duob (30,000) ye mme ebod ke enọ Usọrọ Nsaña Mboiyo, ye enañ tọsịn ita (3,000), afịd eketo inie adidem.

8 Mme adaaha amọ emaenyʌñ etịp ñkpọ ke imaesịd enọ mme ñkaña awo ye mme aku ye mme Lifai. Hilkia, Sakaraiya ye Yehiel, mme adaaha eseeghe ñkpọ ebaña tembịd Abasi, emaenọ mme aku enọ Usọrọ Nsaña Mboiyo ikie edịb mme itiokeed (2,600) ye enañ ikie ita (300). 9 Konania, ñkọrọ ye Semaiya ye Netanel, nditọeka amọ, ye Hasabaiya, Yeiyel ye Yoosabad, mme adadusʌñ mme Lifai, emaenọ mme Lifai enọ Usọrọ Nsaña Mboiyo tọsịn ition (5,000) ye enañ ikie ition (500).

10 Emaenam ndutʌm ado ndin mme aku emaeda ke mme itie ammọ ye mme Lifai ke ndaha ikpeghe ammọ naña adidem akenọọ uyio. 11 Emaewot nditọ edọñ ake Usọrọ Nsaña Mboiyo, ndin mme aku emaesiime iyiib ekenọọhọ ammọ ke akpokoro uwa, ke ini mme Lifai ekeyaarake ikpa mme unam ado. 12 Ammọ emaesio ufọfọb uwa enịm nọ enọ mme ikpeghe ake mme ufọk mme awo nọ ammọ ewa enọ Abọọñ, nte ekewette ke Ñwed Moses. Ammọ emaenam ukem ado ye mme enañ. 13 Ammọ emaefọp mme unam Usọrọ Nsaña Mboiyo ke ikañ naña ekenịm, enyʌñ etem mme ndisana uwa ke mme ako, aketịd ye mme ako ufrañ ñkpọ enyʌñ eben enọññọ mme awo usọp-usọp. 14 Ke ami amaakeboiyo, ammọ emaenam mbeeñeidem enọ idem ammọ ye mme aku ñko, sia mme aku e-eketooho ubon Erọn, ekesʌk enam ufọfọb uwa ye udeeme akpọñ tutu ayio akịm. Ke ntoro mme Lifai emaenam mbeeñeidem enọ idem ammọ ye mme aku ubon Erọn.

15 Mbon ukwọ ikwọ, mbon ubon Asaf, ekeba ke itie Defid, Asaf, Heman ye Yedutun akịdñkukịd nnọọ adidem ekenịmme enọ ammọ. Mme akpeme inuaatob ikinaaha nte edakka ekpọñ itie utom ammọ, sia Lifai nditọete ammọ emaenam mbeeñeidem enọ ammọ.

16 Ntoro ke ini ado ke ekenam afịd adinam Abọọñ ke Usọrọ Nsaña Mboiyo ye adinọ ufọfọb uwa ke akpokoro uwa Abọọñ, kpa naña adidem Yosaiya akenọọ uyio. 17 Mbon Isrel e-ekebaaha do emaedia Usọrọ Nsaña Mboiyo ke ini ado enyʌñ enam Usọrọ Uyo ake Yiis imiisịneke ke usen itiaba. 18 Kpaanam awo ikinamma Usọrọ Nsaña Mboiyo a-akebaaha ntoro ke Isrel tọọñọ ke ayio prọfed Samwel; ñko ibaaha adidem ke Isrel a-akenamma utọ Usọrọ Nsaña Mboiyo naña Yosaiya akenam, ye mme aku, mme Lifai ye afịd Yuda ye Isrel e-ekebaaha do ye mbon Yeruselem. 19 Emaenam Usọrọ Nsaña Mboiyo ami ke ayọhọ isua duob mme itiaita ke ukara Yosaiya.

20 Ke afịd ami amaakeboiyo, ke ini Yosaiya amaakeneeñe ñkpọ ibono ke tembịd nọ afọn, Neko adidem Iyib amaadọọk akaa adinwana ekọñ ke Kaakemis a-abaaha ke Yufretis, ndin Yosaiya amaawuọ akaa adisoobo ye anye ke ekọñ. 21 Ado Neko amaadọñ isʌñutom anọ anye abo, "Nsoo utọk iba do, adidem Yuda, ke ufọọd mmi ye afo? Idooho afo ke ami ñnwana ekọñ ke ini ami, ado ufọk ake ami ñnwanake ekọñ. Abasi andọkkọ miin abo yak nsọp idem; ke ntoro tre adinam ikọ ye Abasi, a-abaaha ye ami, imiidooho anye ayausobo fiin."

22 Yosaiya, naña akeba, ikitịmmeke edem ikpọñ anye, ado amaakpuhọ idem amọ akenwana ekọñ ye anye. Anye ikikpañña utọñ inọ se Neko aketañ ke ewʌhọ Abasi, ado amaakaa akenwana ye anye ke unaisọñ Mekido.

23 Mbon utịgha emaetịgha adidem Yosaiya, ndin anye amaadọkkọ mme adaaha amọ, "Imben miin isio; ennọ miin unan idiọọk-idiọọk." 24 Ndin ammọ emaeben Yosaiya esio ke sariọd amọ, esịn anye ke sariọd amọ mfen emaenyʌñ eben anye edi Yeruselem, do ke anye akekpa. Emaebuuk anye ke udi mme eteete amọ, ndin afịd Yuda ye Yeruselem emaefʌhọ anye.

25 Yerimaiya amaawet mme aseeme anọ Yosaiya, ndin tutu usen mfịn ami afịd ideen ye ibaan ukwọ ikwọ esitoiyo Yosaiya ke mme aseeme ado. Afịd ado amaakappa ado ido unam ñkpọ ke Isrel ndin ewet ammọ ke mme Aseeme ado.

26 Mme ñkpọ mfen se ikitịppe ke ini ukara Yosaiya ye mme adinam ñwaidem amọ nte asañake akekem ye se ekewet ke Mbed Abọọñ, 27 afịd ñkpọntịppe, tọọñọ ke ntọọñọ tutu utịd, ewet ke ñwed mme ndidem Isrel ye Yuda.