1 Ke ini Sọlọmọn amaakekweeñe adibọñ akam, ikañ amaato ke anyọñ asọiyọ adita ufọfọb uwa ye mme uwa, ndin ubọọñ Abọọñ amaayọhọ ke tembịd. 2 Mme aku ikikanna edidʌk ke tembịd Abọọñ sia ubọọñ Abọọñ amaayọhọ ke esịd. 3 Ke ini mbon Isrel ekekịtte ikañ naña asọiyọ adi ye ubọọñ Abọọñ naña adoro ke tembịd, ammọ emaetọọñọ edọñ ke mbood ye iso ammọ ke isọñ, ndin ammọ emaekpono enyʌñ enọ Abọọñ ekọọm, ebo,

"Anye afọn;

ima amọ aba ke nsi-nsi."

4 Akem adidem ye afịd mme awo emaewa uwa ke iso Abọọñ. 5 Ndin adidem Sọlọmọn amaawa uwa ke iwuod enañ tọsịn edịb mme iba (22,000) ye mme edọñ ye mme ebod tọsịn ikie mme edịb (120,000). Ndin adidem ye afịd awo emaediọñ tembịd Abasi. 6 Mme aku emaedat itie ammọ, kpa naña mme Lifai ekenam ye mme ndido mbre ikwọ Abọọñ, ake adidem Defid akenamma nọ esikama etooro Abọọñ ekenyʌññọ esikama ke ini anye akenọọhọ ekọọm, abo, "Ima amọ asʌk abaaba ke nsi-nsi." Ke nsakiso mme Lifai, mme aku emaefịt adukpoñ, ndin afịd mbon Isrel ekedaada.

7 Sọlọmọn amaasio ufọọd itie esa ke iso tembịd Abọọñ anịm asaña-asaña adiọñ, ndin ke itie ado anye amaanam ufọfọb uwa ye uwa akpọñ unam ewuana, sia akpokoro uwa e-ekenamma ke brọns ikikanna adidọñọ ufọfọb uwa, uwa ñkpasi ye mme uwa akpọñ unam ewuana.

8 Ntoro ke Sọlọmọn akenam usọrọ ke ini ado ke usen itiaba, ndin afịd Isrel ekeba ye anye, ataa ekamba esob, mme awo emaeto ke Lebo Hamad tutu asịm ke Wadi ke Iyib edi. 9 Ke ayọhọ usen itiaita ammọ emaenịm esob, sia ammọ emaedia usọrọ adidiọñ akpokoro uwa ke usen itiaba enyʌñ enam usọrọ ke usen itiaba mfen. 10 Ke ayọhọ usen edịb mme ita ke ayọhọ afiọñ itiaba anye amaanam mme awo enyọñọ ufọk ammọ, edaara enyʌñ enem esịd ke mme nti ñkpọ ake Abọọñ akenamma anọ Defid ye Sọlọmọn ye mbon amọ Isrel.

11 Ke Sọlọmọn amaakekweeñe tembịd Abọọñ ye ufọkadidem, akenyʌñ anam afịd se anye akenie ke akikere amọ adinam ke tembịd Abọọñ mfọn-mfọn ye ke ufọkadidem amọ, 12 Abọọñ amaayaara idem awọt Sọlọmọn ke akonayio amaanyʌñ abo:

"Ami mmekop akam mfo ndin mmenyʌñ mmek itie ami nnọ idem mmi nte tembịd se ekama enam mme uwa.

13 "Ke ini ami mmaasiit mme hefịn nọ edịm imiideppe, me ndọñ mme ñkukuñkpọyọriyọ nọ ata isọñ me ndọñ idiọọk udọñọ ke atu mbon mmi, 14 adieke mbon mmi, e-ekoodo edian anyịñ mmi, ediisuuhọ idem ammọ enyʌñ ebọñ akam enyʌñ eyem iso mmi enyʌñ ediañña idem ekpọñ mme usʌñ ibak ammọ, ndin ami ñyaatie ke hefịn ñkop, ñyaanyʌñ mfeen idiọọkñkpọ ammọ ñnyʌñ ñkọk udọñọ ke isọñ ammọ. 15 Ke ami, anyen mmi ayaatara ñnyʌñ ñkpañutọñ mmi nnọ mme akam se ebọñ ke itie ami. 16 Ami mmemek ñnyʌñ nsio tembịd ami nnịm asaña-asaña ndiọñ nọ ato do Anyịñ mmi aba do ke nsi-nsi. Anyen mmi ye esịd mmi ediiba do ke afịd ini.

17 "Amaado afo, adieke afo asañake ke iso mmi ke akpanikọ naña Defid ete mfo akesaña, anyʌñ anam afịd se ami utemme, anyʌñ anịm mme ewʌhọ ye mbed mmi, 18 ami ñyaanam ebekpo ubọọñ mfo asọọñọ ada, kpa naña ñkedioomo ye Defid ete mfo ke ini ami ñkebooho, ‘Afo uduunanake awo ake adiidat itie mfo ke adikara Isrel.’

19 "Ado adieke afo awọññọke akpọñ anyʌñ asịn mme ewʌhọ ye mme item ake ami unọọhọ fiin anyʌñ awuọ akenam ñkpọ anọ mme abasi mfen anyʌñ akpono ammọ, 20 ami ñyaawịppe Isrel nsio ke isọñ ake ami nnọọhọ ammọ, ñnyʌñ nsịn tembịd ake ami nnịmme asaña-asaña nnọ Anyịñ mmi. Ñyaanam anye akappa ado ñkpọ ufiid ye ñkpọ ndọk ke atu afịd mbon awo. 21 Tembịd ami ayaakappa ado itoon mbio. Afịd awo se isaña iboiyo eyaedịkke enyʌñ ebo, ‘Nsoo ñkpọ inam yak Abọọñ anam utọ ñkpọ ami ke isọñ ami ye ke tembịd ami?’ 22 Mbon awo eyaebọọrọ, ‘Sia ammọ ewọññọ ekpọñ Abọọñ, Abasi mme eteete ammọ, a-akesioho ammọ ato Iyib, enyʌñ efat mme abasi mfen, ekpono enyʌñ enam ñkpọ enọ ammọ; ami ado ntak ake anye abenne afịd ukuud ami adoot ammọ ke idem.’ "