1 Ke ayọhọ isua edịb mme duob mme itiokeed ke ukara Asa, Baasa adidem Isrel amaadakka adọọk akaa anwan ye Yuda amaanyʌñ asọọñọ Rama adaaha mbaak awo ndomokeed adiwọwuọ me adidọdʌk isọñ Asa adidem Yuda.

2 Asa ndin amaakekoono silfa ye kold asịññe ke itie unịm ñkpọ ke tembịd Abọọñ ye ke ufọkadidem amọ anọ esọk Ben-Hadad adidem Aram, a-akekarake ke Damaskọs. 3 Anye amaabo, "Yak edioomo aba ke ufọọd mmi ye afo," "kpa naña akeba ke ufọọd ete mmi ye ete mfo. Se, ami mmenọ silfa ye kold usọk. Idahami biat edioomo mfo ye Baasa adidem Isrel nọ anye asịññe idem añkpọñ miin."

4 Ben-Hadad amaanyịmme ye adidem Asa anyʌñ anọ mme adaiso ekọñ amọ ekenwana ye mme abio ke Isrel. Ammọ emaekan Iyon, Daan, Ebeel Maim ye afịd mme abio unịmñkpọ ke Naftali. 5 Ke ini Baasa akekoppo ami, anye amaatre adibọp Rama anyʌñ adakka akpọñ utom amọ. 6 Akem Adidem Asa amaakoono afịd ideen Yuda adi, ndin ammọ emaetañ mme itiad ye adukpọk ake Baasa akesidatta anam ñkpọ esịññe ke Rama. Anye amaadat mme ñkpọ ado abọp Keba ye Mispa.

7 Ke ini ado Hanani akịdñkukịd amaadi abịne Asa adidem Yuda anyʌñ abo anye: "Sia afo akenieghe mbuọdidem ke adidem Aram idooho ke Abọọñ Abasi mfo, mbon ekọñ ake adidem ke Aram emaebọkkọ ewuọ ekpọñ ubọk mfo. 8 Nte mbon Kuus ye mbon Libia ikinieghe ñkpọsọñ mbon ekọñ ye uwak ibad mme sariọd ye mme awad enañmbakara? Ado ke ini afo akebuọttọ idem ye Abọọñ, anye amaayaak ammọ usịn fiin ke ubọk. 9 Sia anyen Abọọñ asañake ke afịd ederimbod adisọọñ esịd mbon e-eketuakka eda ayọhọ-ayọhọ ye anye. Afo amaanam ndisịme ñkpọ, ndin tọọñọ ke idahami kaa iso afo uduuba ke ekọñ."

10 Asa amaayat esịd ye akịdñkukịd ami; anye amaakpakka esịd tutu asịn anye ke ñkpakọb. Ke ukem ini ado Asa amaatʌkkọ usʌk mbon awo.

11 Mme edinam ke ukara Asa, tọọñọ ke ntọọñọ tutu asịm utịd, ewet ke ñwed mme ndidem Yuda ye Isrel. 12 Ke ayọhọ isua edịb mme duob mme usʌkkeed ke ukara amọ, Asa amaaduọ udọñọ ke ukod. Akpesʌkado udọñọ amọ akesọññọ adudu, ke nnaa udọñọ ado anye ikiyemme unwam ito Abọọñ, ado akebịne mme mbiaibọk kpọd. 13 Ndin ke ayọhọ isua ukara amọ aba mme keed, Asa amaakpa anyʌñ akeduọk adudu ye mme eteete amọ. 14 Ammọ emaebuuk anye ke udi a-anye akekpịkkeke asio anọ idem amọ ke Abio Defid. Ammọ emaenịm anye ke ñkpana ekefʌkkọ ye mme mfiọññọ ye nsio-nsio ñwuaha pefium, emaenyʌñ enam ekamba ebohoikañ ke ukpono amọ.