1 Ke ayọhọ isua itiaba Yehoiyada amaawọt adudu amọ. Anye amaadʌk edioomo ye mme adaiso udịmekọñ ke mme ikpeghe ikie ikie (100): Asaria ayịn Yeroham, Ismeel ayịn Yehohanan, Asaraiya ayịn Obed, Maaseiya ayịn Adaiya, ye Elisafad ayịn Sikri. 2 Ammọ emaekaa ke afịd Yuda enyʌñ ekebon mme Lifai ye mme adaiwuod ke mme ufọk ke Isrel ke afịd mme abio ke itie keed. Ke ini ammọ ekedieghe Yeruselem, 3 afịd esob emaenam edioomo ye adidem ke tembịd Abasi.

Yehoiyada amaabo ammọ, "Ayịn awodeen adidem adiikara, kpa naña Abọọñ akenwọñọ abaña ubon Defid. 4 Idahami se ana nte ndufo enam ado ami: mbakka keed ke itie ita ke atu mme aku ye mme Lifai e-ebaaha ke utom ke Sabad eyaeda ukpeme ke mme usʌñ, 5 mbakka keed ke itie ita ndufo eba ke akwere abọọñ ndin mbakka keed ke itie ita eyaeda ke Inuaatob Itiad idakisọñ, ndin afịd mbon mfen ana nte eba ke anwa tembịd Abọọñ. 6 Awo ndomokeed inaaha nte adʌk tembịd Abọọñ ke imiibọhọke mme aku ye mme Lifai ebaññake ke utom; ammọ ekeme edidʌk sia ammọ esana, ado afịd mbon mfen ana nte ekpeme ewʌhọ Abọọñ editre edidʌk esịd tembịd. 7 Ana nte mme Lifai eda ekanna adidem ekʌk, keedekeed ye ñkpọekọñ amọ ke ubọk. Awo ndomokeed a-adʌkkọ tembịd ana nte ewot anye. Ida ikpere adidem itie nte anye akaka."

8 Mme Lifai ye afịd ideen ke Yuda emaenam kpa ukem-ukem naña aku Yehoiyada akenọọ uyio. Etubom keedekeed amaaben ideen amọ, mbon e-ekekaahaka utom ke Sabad ye mbon ekenyọñọkenyọñọ ke utom, sia aku Yehoiyada ikisuanna mme ikpeghe ndomokeed. 9 Ndin aku Yehoiyada amaanọ mme adaiso ekọñ ke mme ikpeghe ikie keed (100) mme eduad ye mme ñkpoon ye mme ntək atuekọñ a-adidem Defid akenieghe, e-ekenyʌññọ ebono ke tembịd Abasi. 10 Anye amaadaaha afịd mme ideen, keedekeed akama ñkpọekọñ amọ ke ubọk, ekanna adidem, ekpere akpokoro uwa ye tembịd, ke ñkañ usuuk-usuuk tutu ke ñkañ adoro-adoro tembịd.

11 Yehoiyada ye nditọ ideen amọ emaesio ayịn adidem ewuọ edi enyʌñ eyat anye anyanya; ammọ emaenọ anye ñwed edioomo enyʌñ esọọñọ etañ ke anye ado adidem. Ammọ emaeyet anye adan enyʌñ ekpọk ukịbe ete, "Itọñ uwem asọñ adidem!"

12 Atalia akekop uyom mbon awo ekefeeñeke enyʌñ edaara adidem, anye amaadakka abịne ammọ ke tembịd Abọọñ. 13 Anye amaase, anyʌñ akịt adidem, nte ada adiana abai amọ ke anyenusʌñ. Mme adaaha ye mme afịd adukpoñ emaeda ke ñkañ adidem, ndin afịd awo ke abio ekesʌk edaara enyʌñ efịt mme adukpoñ, ye mme akwọikwọ ye mme ñkpọ ubre ikwọ ammọ ekesʌk edat usʌñ ke itooro. Ndin Atalia amaawai afọñidem amọ amaanyʌñ asio ñkpo, "Abiaña! Abiaña!"

14 Aku Yehoiyada amaadọñ mme adaiso udịmekọñ ke mme ikpeghe ikie keed (100), e-ekeseeghe ñkpọ ebaña mme udịmekọñ ewuọ, amaanyʌñ abo ammọ: "Imʌm anye isio ke ufọọd udịmekọñ ndin iwot ke akañkañ awo akeedodo a-akeeneke anye." Sia aku amaabo, "Ikiiwot anye ke tembịd Abọọñ." 15 Ndin ammọ emaemʌm anye ke idaha anye akekesịmme inuausʌñ ke Inuaatob Enañ ke anwa akwere ufọk adidem, ndin emaenyʌñ ewot anye ke itie ado.

16 Ndin Yehoiyada amaanam edioomo ke imọ, mbon awo ye adidem eyaedo ikọd Abọọñ. 17 Afịd awo emaekaa tembịd Baal enyʌñ ekewuut ebono. Ammọ emaeboom mme akpokoro uwa ndem ye mme ubobodñkpọ enyʌñ ewot Matan aku Baal ke iso mme akpokoro uwa.

18 Akem Yehoiyada amaanam mme aku Lifai ese ñkpọ ebaña utom ke tembịd Abọọñ, nte mbon ake Defid akesioho anịm ke tembịd, nọ ammọ enam ufọfọb uwa ake Abọọñ naña ekewet ke mbed Moses, ke idaara ye ikwọ, naña Defid aketemme. 19 Anye amaadaaha mbon ukpeme ke inuaatob tembịd Abọọñ mbaak awo ndomokeed ake imiisanake adikan adʌk.

20 Anye amaaben mme adaiso udịmekọñ ikie, mme mbọọñ, mme andikara mbon awo ye afịd mme awo ke abio nọ esaña ye anye, enyʌñ ekeben adidem esọiyọ eto ke tembịd Abọọñ. Ammọ ekesaña eto Anyọñ-Anyọñ Inuaatob edʌk ufọkadidem enyʌñ eketem adidem ke ebekpo ubọọñ. 21 Afịd awo ke isọñ emaedaara, ndin abio amaadobo, sia emaewot Atalia ke akañkañ.