1 Rehoboam amaakaa Sekem, sia afịd Isrel emaekaa do adinam anye adidem. 2 Yerobuam ayịn Nebad akekop ñkpọ ami (anye akeba ke Iyib, itie anye akefegheke akpọñ iso Adidem Sọlọmọn aka), anye amaato Iyib adi. 3 Ndin ammọ emaedọñ ekoot Yerobuam, ndin anye ye afịd Isrel emaekaa ebịne Rehoboam enyʌñ ekebo anye: 4 "Ete mfo amainọ ñnyịn ndodoppo mbiomo, ado idahami nam nsaad utom ye ndodoppo akpọnọ ake anye akinọọhọ ñnyịn afeere, ndin ñnyịn iyainam ñkpọ unọ fiin."

5 Rehoboam amaabọọrọ, "Ikaa, ndin itịmme idi imbịne miin ke ayọhọ usen ita." Ndin mbon ado emaenyọñọ.

6 Ndin Adidem Rehoboam amaakekọọk iwuod ye mme ñkpisọñ e-ekenamma utom enọ ete amọ Sọlọmọn ke ayio uwem amọ. Anye amaabịp, "Nsoo item ke ndufo ekpennọọ miin nọ mbọọrọ ibon ami?"

7 Ammọ emaebọọrọ, "Adieke afo uduufọn ido ye ibon ami anyʌñ anam ñkpọ se inem ammọ esịd anyʌñ anọ ammọ ibọọrọ a-afọnnọ, ammọ eyaedo mbon mfo ke nsi-nsi."

8 Ado Rehoboam amaasịn item ake mme ñkpisọñ ekenọọhọ anye ndin anye amaakesoobo ye mme iwaad e-ekedooho ñka ye anye ekenyʌññọ enam ñkpọ enọ anye. 9 Anye amaabịp ammọ, "Nsoo ido item ndufo? Ñnyịn idiibọọrọ die ibon ami embooho miin, ‘Nam mbiomo ake ete mfo akinọọhọ ñnyịn afeere’?"

10 Mme iwaad e-ekedoññoke ubọkñka ye anye emaebọọrọ, "Ibon ami edubo fiin, ‘Ete mfo amainọ ñnyịn ndodoppo mbiomo, ado nam mbiomo ñnyịn afeere.’ Idahami dọkkọ ammọ bo, ‘Etək nnuunubọk mmi akpon akan itakisịn ete mmi. 11 Ete mmi amaikọọñ ndufo ndodoppo akpọnọ; ami ñyaanam anye anenekke adoppo. Ete mmi akimia ndufo ke ikpa; ami ndiimia ndufo ke ikpeyen.’ "

12 Usen ita akeboiyo Yerobuam ye afịd mbon awo emaetịmme ebịne Rehoboam, kpa naña adidem akebo, "Itịmme idi ke ayọhọ usen ita." 13 Adidem Rehoboam amaabọọrọ ammọ ke iyadesịd. Asịn item mme ñkpisọñ ekenọọhọ anye, 14 anye amaadat item ake mme iwaad ekenọọhọ anye ndin amaabo, "Ete mmi amaanam akpọnọ ndufo adoppo; ami ñyaanam adoppo akan ado. Ete mmi akekama ikpa imia ndufo; ami ndiimia ndufo ke ikpeyen." 15 Ndin adidem ikikpañña utọñ inọ mbon awo, sia adinam ami aketo ubonoñkpọ Abasi, nọ uyio Abọọñ akenọọhọ Yerobuam ayịn Nebad ato Ahiya awo Silo asu.

16 Ndin afịd Isrel ekekịt ke adidem asịn adikpañ utọñ inọọ mmimọ, ammọ emaebọọrọ adidem:

"Nsoo udeeme ke ñnyịn inie ye Defid,

nsoo ubaak ke ayịn Yesi?

Inyọñọ mme atayad ndufo, Isrel!

Se ñkpọ baña ufọk mfo, Defid!"

Ndin afịd mbon Isrel emaenyọñọ ufọk. 17 Ado amaado mbon Isrel e-ekedʌññọ ke mme abio Yuda, Rehoboam akesʌk akakara ammọ.

18 Adidem Rehoboam amaadọñ Adọniram*, a-akedooho aseñkpọ mbaña unyenyịk utom, ado mbon Isrel emaetọọñ anye ke itiad ewot. Ado Adidem Rehoboam amaanwana akedʌk sariọd amọ abọkkọ anyọñ Yeruselem. 19 Ke ntoro ke Isrel asʌk ababa ke nsọñiwuod ye ufọk Defid tutu usen mfịn.