1 Yehosafad ayịn amọ amaadat itie amọ nte adidem anyʌñ asọọñọ idem amọ abeeñe abet Isrel. 2 Anye amaanịm mme udịmekọñ ke afịd akpọsọñ abio ke Yuda anyʌñ anịm mme itie ubono ñkpọ ekọñ ke Yuda ye ke mme abio Ifrem ake ete amọ Asa akewappake abọ.

3 Abọọñ amaaba ye Yehosafad sia anye amaakeene mme usʌñ ete amọ Defid a-akebemme anye iso. Anye ikiikaaha ikibọ uyio ito Baal 4 ado anye amaayem Abasi ete amọ anyʌñ akeene mme ewʌhọ amọ akan mme adinam Isrel. 5 Abọọñ amaanam abio adidem asọọñọ ada ke ukara amọ; ndin afịd Yuda emaeben mme enọ esọk Yehosafad, ke ntoro anye amaanie ekamba uwak inie ye ukpono. 6 Esịd amọ akenekke ase usʌñ Abọọñ; mfen ñko, anye amaasịññe mme ñkoñ-ñkoñ itie ye mme abai Asera ke Yuda.

7 Ke ayọhọ isua ita ke ukara amọ anye amaadọñ mme adaaha amọ Ben-Heel, Obadaiya, Sakaraiya, Netanel ye Maikaiya ate ekekpeep mme awo ñkpọ ke mme abio Yuda. 8 Ammọ ekeka ye usʌk mme Lifai, Semaiya, Netania, Sebadaiya, Asahel, Semiramod, Yehọnatan, Adọniya, Tobiya ye Tob-Adọniya, ye mme aku Elisama ye Yehoram. 9 Ammọ emaekpeep ñkpọ ke afịd Yuda, ammọ ekekama Ñwed Mbed Abọọñ; ammọ emaesaña ekanna afịd mme abio ke Yuda enyʌñ ekpeep mme awo.

10 Ndịk Abọọñ amaadoro afịd abio mme ndidem ke isọñ e-ekekannake Yuda ekʌk, ke ntoro ammọ ikikaaha ekọñ ye Yehosafad. 11 Usʌk mbon Filistia emaeben mme enọ ye silfa esọk Yehosafad nte utịb, ndin mbon Arab emaeben mme ufene esọk anye: akukịmedọñ tọsịn itiaba mme ikie itiaba (7,700) ye ebod tọsịn itiaba mme ikie itiaba (7,700).

12 Yehosafad amaakaa iso akpon ke adudu; anye amaabọọp mme ñkpọsọñ itie ekọñ ye mme abio unịmñkpọ ke Yuda 13 anyʌñ anie ata uwak ñkpọ ke mme abio ke Yuda. Anye amaanyʌñ anịm mbon unie ifiọk ke ekọñ ke Yeruselem. 14 Ekesịn ammọ anyịñ ekeene mme ufọk ntom:

Ke Yuda, ikpeghe mme adaiso ekọñ ke 1,000:

Adna nte adaiso, ye mbon ekọñ tọsịn ikie ita (300,000);

15 udiana, Yehohanan nte adaiso ekọñ, ye mbon ekọñ tọsịn ikie iba mme anaañ (280,000);

16 udiana, Amasia ayịn Sikri, a-akefiọkkọfiọk ayaak idem amọ anọ adinam utom Abọọñ, ye mbon ekọñ tọsịn ikie iba (200,000).

17 Ke ukañ Benyamin:

Eliada, awo uko ke ekọñ, ye ideen tọsịn ikie iba (200,000) ekekaamake utịgha ye mme atuekọñ;

18 udiana, Yehosabad, ye ideen tọsịn ikie keed mme anaañ (180,000) e-eketịmme idem enọ ekọñ.

19 Mbon ami edo mbon e-ekenamma utom enọ adidem, akọrọ ye mbon ekenịmme ke mme akpọsọñ abio ke afịd Yuda.